النهارده هيبدأ التصويت علي جايزة الموسيقي الافريقية اللي ذكرنا ان الهضبة مرشح للحصول عليها وأعلن اليوم عن المتنافسين والمراكز اللي بينافسوا عليها ..والهضبة مرشح لـ 4 مراكز دفعة واحدة وهي:
نضال الأحمدية بتطالب الهضبة بالاعتزال عشان بقي عجوز وقالت انها بتتعمد تهاجمه وتقهره بكلامها.
الهضبة عنده 47 سنة وانت عندك 46 سنة واللي يشوفكم جنب بعض يفتكر انه ابنك..ومش انت يا جدتي اللي تحددي مين يعتزل والا كنتي احترمتي نفسك من زمان وقعدتي في بيتكم..اما موضوع انك تقهريه او تهاجميه ده كان غيرك اشطر ولو كان انقهر منك او من كلامك كان رد عليكي بس سكوته ده بيقلل منك قوي وبيظهرك بمظهر النملة اللي واقف قدامها فيل وهي بتزعق عشان يسمعها..موتي بقهرك.
عبقري زمانه حلمي بكر قال ان الهضبة مغني مش مطرب..وقال انه ألفة زمنه يعني التوب بتاع الزمن ده..ولما فرق بين الطرب والغناء قال ان الطرب بيليه في المستوي الغناء!!
حد فاهم حاجة؟!..طول عمر الأول في مجاله بيكون من الفئة الأولي عمر ما كان الأول من المستوي التاني..يعني لما نحب نختار أحسن نادي كورة في مصر لازم يكون من الدرجة الأولي بتوع الدوري الممتاز ما ينفعش نادي درجة تانية يتقال عليه احسن نادي في مصر..حاجة من اتنين..يا انت غلط يا انت غلط!!
مخرج برنامج الكابوس قال انه مش بيقلد برنامج الحلم وكتير ما شافوهوش لانه برنامج فاشل.
طيب والعبارة اللي مكتوبة في تترات الكابوس ان التشابه الموجود بين البرنامجين مقصود ومتعمد نظرا لقيمة الهضبة الفنية مين اللي كتبها؟..يعني سرقت البرنامج ونحته بالمللي وحتي طريقة الاخراج والتصوير وتسلسل الاحداث وعرضها والموسيقي التصويرية واللوجو والبوستر والديكور وتترات البداية والنهاية وتقولي ماشوفتش الحلم وكمان برنامج فاشل..انت متأكد انك المخرج؟!
راغب علامة قال ان الهضبة مش منفرد بالقمة لواحده وانه في ناس تانية كويسة وطبعا شكر في نفسه وانه خارج المنافسة.
ياعم حمد الله ع السلامة .. والله ما بقيت اسمع عنك الا كل ما ينزلك تصريح عن الهضبة..انت بطلت غنا ولا ايه؟
أدعية المطربين لرمضان السنة دي الواحد وسطه بقي يتهز وهو بيسمعها..من الطبلة والرق والدرامزات والشغل العالي اللي فيها.
كويس ان الهضبة مانزلش أدعية السنة دي والا كانوا هيقولوا عليه رجعي..أصل لكل مقام مقال.
مع بداية عرض اعلانات برنامج الكابوس لشخصية سيد ابو حفيظة كل الديابين اعلنوا احتجاجهم علي البرنامج لانه بيسئ للهضبة وبيسخر منه ومن برنامج الحلم لانه ناحت فكرة البرنامج بكل تفاصيله بما فيها طريقة عرض البرومو..فقام أكرم حسني ممثل شخصية أبو حفيظة بارسال بيان بيحمل تقديره للهضبة واسرته ولبرنامج الحلم وان البرنامج لا يتعرضله من قريب ولا من بعيد ولا يمس شخصيته باي صورة.
الهضبة تفهم الموقف وانه مش هيتعرض ليه او لاسرته ورد علي بيان أكرم حسني بانه يرحب بالبرنامج وبيباركله عليه بشرط عدم الاعتداء علي حقوق الملكية الفكرية للبرنامج واتكتبت في البيان بالبنط العريض لان في ناس تعبت عشان تخرج البرنامج بالشكل ده والصورة المبهرة والمستحدثة دي.
واتذاع برنامج الكابوس وهو لا يحمل اي اسائه للهضبة لكن كان ناحت فكرة الحلم بموسيقته التصويرية وديكوره واللوجو بتاعه وفكرته وطريقة تسلسل الاحداث وعرضها..فما كان من الهضبة الا ان قام بارسال انذار للشركة المنتجة لعدم التزامها بما جاء في البيانين السابقين بعدم الاعتداء علي حقوق الملكية الفكرية مستند علي كلام مخرج البرنامج (المغمور) في حواره مع جريدة وشوشة واللي اساء فيه للهضبة وبرنامج الحلم.
وبمراجعة اللي نشر علي لسان المخرج (المغمور) في صحيفة وشوشة ودي صورة توضيحية للحوار اللي نشر في الجريدة:
نلاحظ من الصورة نفي المخرج لتقليد البرنامج رغم ان البرنامج بيظهر في أوله رسالة مضمونها انه التشابه بين الحلم والكابوس تشابه متعمد ومقصود نظرا لقيمة الهضبة الفنية اللي قال في حواره ده انه مابيحبش صوته.
والسؤال هل المخرج (المغمور) ده بيعاني من انفصام في الشخصية يخليه يصرح ان البرنامج مابيقلدش الحلم رغم ان تتراته الرئيسية بتحمل رسالة في اوله انه التشابه متعمد وهي كلمة تعني الكثير؟!!!
طيب لو انت عيان روح اتعالج لكن احنا بقي مش عيانين ولا مرضي نفسيين ولينا عينين ومخ نميز بيهم ونعرف مين بيقلد ومين بيسرق ومين بيكدب ومين مابيفهمش..ياللي مابتفهمش!!
في استطلاعات الرأي الصحفية او التحقيقات اللي بتعملها الصحف او البرامج او حتي في اللقائات اللي بتكون مع الموسيقيين بنلاحظ ان الموسيقيين المعاصرين من شعراء وملحنين وموزعين بيشيدوا بالهضبة وبيوصفوه انه اسطورة غنائية وانه رقم واحد في الوقت الحالي وصنع لنفسه اسم هيستمر مدي الحياة..وانه سبب استمرار الأغنية المصرية ع القمة..ولما تسمع او تقرا رأي الموسيقيين القدامي تلاقيهم بيقولوا انه مجرد موضة اتجمع حواليها الشباب وانه بمجرد ما يعتزل هيختفي وماحدش هيفتكره وانه مؤدي او مغني محدود الامكانيات مايقدرش يغني الطرب وانه لولا ظهر في عصر الصورة ماكنش حقق اللي حققه ده ولو كان ظهر في زمن ام كلثوم وحليم كان انتهي وماقدرش يكمل.
ومن خلال الرأيين المختلفين تماما واللي عكس بعض كليا نقدر نلاحظ ان في بينهم فجوة كبيرة لكنها مش فجوة فنية او موسيقية قد ما هي فجوة زمنية وصراع بين الاجيال ..الفجوة الموجودة سببها الهضبة بتطوره الموسيقي وتمرده علي الواقع والجمود اللي أخد من الفن العربي اكتر ما اضفله!
موسيقيين السبعينات والستينات اللي عاشوا علي الغناء في الفترة دي وتوقفوا تماما عندها وعينوا نفسهم حماة لتاريخ الغناء والفن العربي وبقوا يرفضوا كل جديد وكان بيزعجهم كل تطور لانه هيكون ضدهم وضد ثقافتهم اللي توقفت عند مرحلة معينة وأصبح اي تطور بيبوظ ادمغتهم ويهنجها تماما وبيقفوا عاجزين قدامه .. فيهاجموه ويحاربوه باتهامه بانه اسفاف وافساد للذوق العام وان التطور ده هيكون مرحلة وهتنتهي وهيرجع الغناء للشكل القديم من تاني..الجيل اللي في نظره ام كلثوم و حليم مستحيل انهم يتكرروا وربما شايفين انه برحيلهم انتهي الغناء تماما ومات ومابقاش فيه اي فن حقيقي والموجود مجرد هبوط فني.
المشكلة اللي بيعاني منها الجيل ده في الموسيقي هي نفس المشكلة اللي بيعاني منها نفس الجيل من الصحفيين الرياضيين اللي في نظرهم كورة السبعينات والستينات كانت احسن فترة واحسن لعب وان محمود الخطيب مستحيل انه يتكرر..وان الموجود دلوقتي اغتراف مش احتراف زي ما بيردد بعضهم.
المشكلة المزمنة والآفة العربية اللي بنعاني منها وبنفضل نبص ورانا بدل ما نبص قدامنا ونطور من نفسنا ونواكب العصر..ونفضل نقول احنا اصحاب حضارة واحنا عندنا الفراعنة اللي عملوا وبنوا وسووا وبنفتخر بأمجاد الماضي السحيق واحنا واقفين محلك سر مش بنعمل ولو عملنا يظهر حماة الماضي ويهاجموا اللي عمل ويتهموه بالاسفاف والابتذال والمصطلحات الجاهزة مخصوص للحالات دي.
اذا كان الجيل القديم حقق ونجح فاحنا ولاد جيلنا بنحب مطربينا وبنسمعلهم وبالنسبالنا هما العظام ومن حقنا ننحاز لجيلنا ما دام من حقكم الانحياز لجيلكم ومن حقنا نشوف الهضبة اسطورة غنائية حقق اللي ما حققوش اي حد قبله وانفرد بانه اول مطرب عربي يوصل العالمية ويبقي ليه شعبية في كل شبر في الارض واغانيه تترجم بكل لغات العالم وبيحصل علي جوايز عالمية ماحصلش عليها اي جيل تاني..واذا كان حجتكم انه لو الهضبة ظهر في جيل الستينات والسبعينات ماكنش قدر ينافس وكان انتهي فأتقل مطرب في جيل الستينات والسبعينات لو ظهر في عصرنا في زمن التكنو والهاوس والريجاتون والترانس ماكنش حقق 1% من اللي حققوا..وماكنش قدر ينافس أفشل مطرب في زمن الألفية التالتة.
ياجماعة شوية موضوعية..كل الفنانين القدامي علي عينا وراسنا وليهم احترامهم انما احترموا فنانين جيلنا العظام اللي بنحبهم علي الاقل قوي لما ينجحوا ولو فشلوا قطعوا فيهم براحتكم.
بعد الهضبة ما صور كليب وياه وبقينا في انتظار كليب اغنية بقدم قلبي..طرحنا ع الديابين سؤال..هما يرشحوا اي اغنية تكون كليب والنتيجة كانت كالتالي:
اغنية يهمك في ايه كانت خارج المنافسة وبتسبح في فلك لوحدها وخدت المركز الاول بنسبة 47% وبفارق كبير عن باقي الاغاني اللي نسبهم جت متقاربة بداية من المركز التاني..والترشيح ده لازم الهضبة ياخده بعين الاعتبار لانه طوال تاريخه في 26 سنة ما صورش ولا أغنية حزينة وديما الكليبات بتعتمد ع الرتم الراقص او الرومانسي فقط.
المركز التاني يعتبر بداية المنافسة الحقيقة بين الأغاني المرشحة وبنسبة 17% كان لأغنية عيني وانا شايفه.
13% في المركز التالت لأغنية اه من الفراق وده مركز متقدم بالنسبة لأغنية من نوعية الاغاني المقسوم وخصوصا ان الهضبة من منتصف التسعيات تقريبا ما صورش ولا اغنية باللون ده رغم ان قبلها كان ده اكتر الالوان الموسيقية شعبية وكل الكليبات كانت مقسوم.
المركز الرابع بنسبة 8% وحياتي خليكي..في المركز الخامس طمني بنسبة 7% وفي المركز السادس اغنية حلوة الايام بنسبة 5%.
دي ترشيحات الجمهور والسؤال..ليه الهضبة ما يعملش استفتاء بين الاغاني واحنا داخلين علي موقع رسمي وهيصة وحكاية والجمهور هو اللي يرشح أغنية الكليب؟
مش عارف ليه كل بلوي فيها تامر لازم يتذكر فيها اسم عمرو دياب..كأن الهضبة عامله عمل مايتفكش عنه أبدا..ولامتي هتفضل تستغل الصحافة الصفرا والصحفيين الجهلة اسم عمرو في تسخين الاجواء وخصوصا في اي فضيحة من فضايح تامر الكتير اللي مغرقة الجرايد.
مابقاش ناقص غير اننا نشتري جرنال ونلاقي مكتوب فيه ان عمرو هو اللي جاب البنات اللي اتنشر في الجرايد في الفترة الاخيرة ان تامر قضي معاهم ليلة حمرا..اذا كان قالوا ان هو سبب سجنه لما زور شهادة الجيش وشهادة الكلية..قال يعني الهضبة هو اللي زورهمله او قاله زور!!!..مع ان لو الكلام كان صح فعلا والهضبة اللي بلغ المفروض يتعمله تمثال انه بينضف الساحة من المزورين والمتهربين من خدمة بلدهم.
اخر موضوع اتنشر فيه اسم الهضبة مع النجم العملاق وصاحب التاريخ الكبير واسطورة زمنه واللي البنات بيغم عليها أول ماتشوفه تقولش انفلونزا الطيور ولا انفلونزا الخنازير هو موضوع تصريحات شيرين ضد تامر.
واحدة طلعت في اذاعة تونسية وقالت انها ترفض تعمل دويتو مع تامر لانه بيغني كلمات قليلة الادب وبيأجر بنات يغم عليها وانها كانت عارفة كل ده من أول ما طلعوا سوا..وقالت كلام منطقي جدا انه مايتقارنش بالهضبة لانه مش من مستواه ولا جيله..
واحدة بتعبر عن رأيها وهاجمت فنان تاني وقطعت فيه ومسحت بيه الأرض..ايه دخل الهضبة عشان يتقال ان رابطة الهضبة اعلنت مساندة شيرين وانها هاجمت تامر لصالح دياب..يعني هو الهضبة لسانه مقطوع ومش بيعرف يهاجم ولا عشان هو ساكت وبيسيب الكلاب تنبح يبقي اي واحد يهاجم تامر ويذكر اسم عمرو يبقي عميل ولازم الصحافة الصفرة تستغلها بأي شكل..ولا الصحافة منتظرة ان اي واحد يسأل اي فنان عن رأيه في تامر وعمرو انه لازم يقول ان تامر احسن واجمد ولو قال غير كده يبقي عميل وبيحارب تامر لصالح دياب..هي ليه الدنيا بقيت ماشية بالمشقلب كده؟!!!!
مواقع الهضبة كلها موجودة وروابطه معروفة ومفيش ولا موقع من مواقع دياب اعلن مساندته لشيرين او اي رايطة أعلنت مساندتها ليها !!!..وحتي الفيس بوك عليه جروبات بعناوين زي مساندة عشاق الفنان فلان لشيرين ضد تامر ومفيش ولا جروب منهم يحمل اسم دياب!!!..والهضبة طول عمره مش بيهتم بالتفاهات دي وعمره ماهاجم فنان ولا علق علي الاحداث الحالية لا بالايجاب ولا بالنفي كأنها مش موجودة اصلا.
ليه كل الجرايد تألف وتكدب وتخترع اشاعات مالهاش لازمة وترسم سيناريوهات عبيطة من وحي خيال الصحفيين الساذجين اللي مألفينها؟!!!
الغريب ان شيرين اللي بيتقال انها دلوقتي بتهاجم تامر لصالح الهضبة من شهر فات بس كانت بتهاجم الهضبة علي برنامج الحلم وقالت انه ضعيف المستوي واتهمته بتسريب اغانيه ع النت وقالت انه ماكنش يستحق الميوزك أورد علي ألبوم الليلادي..ونفس الجرايد اللي نشرت الكلام ده هي اللي بتنشر الكلام اللي بتقوله شيرين دلوقتي وبتقول انه لصالح دياب..طيب ليه ماحدش قال انها هاجمت عمرو لصالح تامر خصوصا انه تامر ديما بيهاجم عمرو وبيخترع اشاعات تربطه بيه وبالعكس الهضبة عمره ما طلع تصريح واحد علي لسانه ذكر فيه اسم تامر !!!!
يظهر ان مبدأ ان "الخبر هو ان انسان يعض كلب مش كلب يعض انسان" هو المبدأ السائد في عالمنا العربي .. والمثل بيقول: لو اللي بيتكلم أهبل يبقي المستمع عاقل.
العالمي يتألق في ملعبه ووسط جماهيره في العيد السنوي اللي بينتظره عشاقه في كل مكان في العالم..لانها الحفلة اللي بيسافرلها الملايين من عشاقه من بلادهم عشان يجوا مصر يشوفوا الهضبة في مارينا وهو بيبدع وبيقسم وبيسنتر وبيباصي ويعمل احسن لمسات ويحط أروع الأهداف في شباك فاضية عاجزة عن صد اي هجمة منه.
اللي حصل في مارينا يوم 7/8/2009 ماحصلش ولا هيتكرر تاني لاي حد الا لو كان اسمه عمرو دياب..لانها كانت واحدة من أنجح الحفلات اللي حصلت في التاريخ واللي مايعرفش نقوله:
عارفين يعني ايه تذكرة بـ 150 جنيه ويحضر اكتر من 100 ألف في وقت مش بيحضر فيه اكتر من 20 الف واحد لمطربين من مدعي انهم منافسين للهضبة بسعر تذكرة لا تتعدي الـ 30 جنيه؟
عارفين يعني ايه حركة المرور تتشل تماما وتبقي شبه واقفة من كتر الجماهير اللي رايحة الحفلة؟
عارفين يعني ايه مديرية امن اسكندرية تعلن الطوارئ لاستقبال حفل الهضبة وتوقف 40 عربية اسعاف لتفادي اي مشاكل ممكن تحصل بسبب الزحام الغير عادي والغير مسبوق؟
عارفين يعني ايه مطرب يغني 3 ساعات وكل ما يمشي الجمهور يبقي عايزه يكمل للصبح؟
عارفين يعني ايه حوالي 150 ألف واحد يستنوا مطرب علي رجليهم لحد الساعة واحدة صباحا وهما واقفين من الساعة خمسة العصر؟
عارفين يعني ايه مطرب يغني وسط العدد ده ومفيش ولا اغنية قالها الجمهور ما رددهاش وراه؟
لو الاجابة طلعت معاك غير رقم واحد..عيد حساباتك لانها طلعت غلط.
الهضبة في الحفل وكعادته في كل حفلة بتكون بعد ألبومه مباشرة قدم الشكر لكل فريق العمل اللي شارك في الألبوم وقدم منهم ع المسرح الشاعر تامر حسين والشاعر عبد المنعم طه والملحن الكبير كبير عمرو مصطفي.
أجمل ما في الحفلة ان العالمي غنا جميع أغاني ألبومه الجديد واستعان في أغلبها ولأول مرة بصوت الموسيقي الأصلية بطريقة "الكاريوكي" وغنا لايف بصوته..وطبعا غنا أشهر أغانيه والميدلي المشهور بيه في حفلاته..واللي حفظه الجمهور عن ظهر قلب لدرجة انهم بقوا يرددوه معاه كامل وينقلوا معاه ع الأغنية التانية كأنهم بيغنوا أغنية كاملة وحفظينها مش مجموعة أغاني بتتنقل بشكل مفاجئ.
التنظيم للأسف ماكنش ع المستوي المطلوب لكن لو جبنا احسن شركة في العالم واحسن سيكيوريتي هتظهر نفس العيوب لان صعب جدا ان اي حد مهما بلغت درجة احترافه انه يتحكم في العدد ده بسهولة ويحافظ علي النظام بالشكل الكافي.
مفاجأة الحفلة هي اعلان الهضبة عن بداية أكاديمية اكتشاف المواهب اللي أعلن عنها من سنتين ونص في شهر اكتوبر المقيل في مجال الشعر والتلحين والتوزيع والغناء ووعدهم بالتعامل معاهم واعطائهم خبراته للاستفادة منها.
أحسن تغطية صحفية للحفلة وبشكل غير مسبوق..جريدة وشوشة!!! أحسن تغطية اعلامية للحفلة لموقع عمرو دياب كافيه.
كليب "وياه" كليب اتجمع فيه كل وسائل الابهار عشان يخرج بأروع صورة ممكن تخرج بيها أغنية بروعة وجمال أغنية "وياه" .. وكعادة كل كليبات الهضبة قدملنا كليب صيفي خالي من العري والاسفاف والابتزال والمشاهدة اللي بتكون (تاعبة كل الناس).
اللي يشوف الكليب يقول الهضبة صوره في دولة أجنبية أو علي الأقل يقول في شرم الشيخ بسبب الجو الصيفي جدا ومنظر البحر الرائع .. لكن هيندهش لو عرف انه متصور جوة بيت الهضبة في القصر بتاعه !!
الكليب اعتمد علي المشاهد اللي بتميز كل كليبات الهضبة في النوعية دي من الأغاني وهي الرقص والحركة ومشهد الموديلز اللي بتقدم استعراضات ونقدر نقول عليها ان دي مدرسة الهضبة في تصوير كليباته الراقصة عكس كليبات زي وماله وتملي معاك وانا عايش ودي مدرسة تانية للهضبة ومع ذلك التجديد ديما سمة الهضبة في كليباته وافكاره والتجديد هنلاحظه في اخراج الكليب اللي اعتمد بشكل كلي علي الجرافيكس وخلق مشاهد قمة في الروعة والصورة المبهرة تخلي الانسان يشعر بالمرح والانسجام مع الاغنية واداء الهضبة جه معبر عن روعة الكلمات واستخدم الاشارات المميزة ليه والمشهور بيها ونقدر نعتبرها تبع مدرسة الهضبة في تصوير كليباته ودي اللي كانت سبب في كشف رامي صبري اول ما ظهر لما استخدم نفس الاشارات والحركات وخلي البعض يقول انه بيقلده.
مشهد الاطفال يعتبر هو المحور الاساسي في الكليب ويمكن فكرته الاساسية والأولاد اللي ظهروا في الكليب هما أولاد الهضبة عبد الله وجانا وكنزي والباقيين أولاد اخوه عماد وفكرة ظهورهم بتعتمد علي انهم بعد ما شافوا الاغنية اتأثروا بيها وقلدوها وبيجي المشهد وهما بيعملوا كأنهم "كاست" العمل من اول المخرج اللي بيعرف البنات يرقصوا ازاي زي الكليب والولد اللي قدم دور المطرب واتقمص دور الهضبة وحاول يعمل نفس حركاته ..وبيضغط الولد علي جهاز التسجيل فبتشتغل مقدمة اغنية وياه بصوت ضعيف في الخلفية مايأثرش علي سير الاغنية الرئيسية وبعدين يدخل صوت الهضبة في الاغنية الرئيسية وكانه خارج من التسجيل وبتدخل الكاميرا زووم علي الهضبة وهو بيغني والولد واقف يقلده ويعمل زيه وهو ده المشهد الاساسي والعبقري في الأغنية ويحسب للمخرج ..وبعدها تستمر الاغنية ويستمر دور الاطفال وهما بيحاولوا يرقصوا نيجر زي الموديلز وترجع الكاميرا للأطفال وواحد منهم بيغني ورا صوت الهضبة..ووجود الاطفال في الكليب لسببين: 1-الهضبة حب يعمل كليب يناسب كل الأعمار من الصغير للكبير ويشوفه كل الناس حتي الاطفال من غير ما يروح يصور اغنية للأطفال زي أغلب المطربين. 2-غناء الاطفال للأغنية بيأكد بيها الهضبة انه من الكبير للصغير بيردد أغانيه وحافظها.
بيظهر في اخر الكليب صورة عبد الله ابن الهضبة بشكل ملفت للنظر وظهوره بالشكل ده هيخلي اللي مايعرفش هو مين يسأل مين ده والاعلام هيكتب ان ده ابن الهضبة اللي اسمه عبد الله يقوم الناس تقول هو ده بقي عبد الله اللي كان اسمه مكتوب علي دراع الهضبة .. ويبقي قضي علي القيل والقال وكلام كتير سمعناه مالوش لازمة علي اللوك بتاع بوستر الألبوم.
اخراج الكليب كان رائع وفوق الوصف وخرج بصورة مبهرة وبين ابداع المخرج كاميرون كاسي اللي صور كليب "ليلي نهاري" مع الهضبة ويحسب ليه انه اول واحد في المخرجين الاجانب اللي الهضبة يكرر التعاون معاه..والكليب المرة دي اظهر قدراته الحقيقية اكتر من كليب "ليلي نهاري" لانه اعتمد علي الاخراج بشكل اكبر في خروج الصورة بالشكل ده..وكعادة الهضبة في كل أعماله أتوقع ان اغلب كليبات 2009 هتبقي معتمدة علي الجرافيك وهتتصور بنفس الشكل.
مجرد ملاحظة: الهضبة لما صور "نقول ايه" في (امريكا) صوره مع المخرج (المصري) مروان حامد ولما صور "وياه" في (مصر) استعان بالمخرج (الأجنبي) كاميرون كاسي!!..بصراحة الراجل ده دماغه توزن بلد.
من ساعات بسيطة الهضبة كان في اتصال مع الاعلامي يسري الفخراني في برنامج الحياة اليوم علي قناة الحياة ومن أهم النقاط اللي اتكلم عنها عمرو هي:
-الهضبة بيعد بحفلة في أوائل الشتا في ستاد الهوكي. -الاحساس بالقلق قبل كل حفل يلازمه من اول حفلة من 25 سنة ويشعر انها دائما الاولي. -بعد الانتهاء من حفل قرطاج بتونس يوم 14 اغسطس الهضبة هيرجع يسجل دعائين بصوتوا لشهر رمضان. -لازال الهضبة في مرحلة الاعداد للفيلم اللي هيعود بيه للسينما. -الاطفال اللي ظهرت في كليب وياه اولاد عمرو دياب واخوه عماد. -رد فعل الجمهور في الحفلات هو الاهم والاصدق في التعبير عن نجاح الالبوم.
في استطلاع رأي الديابين عن المكان اللي يحبوا الهضبة يعمل فيه حفلة كان التصويت باكتساح لاستاد القاهرة وأخد نسبة 72%..وبعده بفارق كبير في المركز التاني وبنسة 15% كان اختيار دار الاوبرا المصرية.
اما الحفلات داخل الجامعات فنالت جامعة عين شمس 8% وجامعة القاهرة 4% فقط.
فكرة النيولوك من الافكار اللي بدأها الهضبة في الوطن العربي وعرفها الفنانين من خلاله وبقوا يعملوها في بوسترات ألبوماتهم .. وعشان كده بقي بوستر الهضبة كل سنة يعتبر حدث فني منفرد زي نزول الألبوم بالظبط..الناس كلها بتستني تشوف الهضبة لابس ايه وعامل شعره ازاي والنقاد منهم اللي بيحضر نفسه للهجوم ومستني نزول البوستر عشان يهاجمه عليه ومنهم اللي عايز يعرف الهضبة وصل لفين بفكرة النيولوك .. والفنانين منتظرين الموضة اللي هيحددها الهضبة للموسم الغنائي عشان يحددوا الشكل اللي هيظهروا بيه هما كمان بناء علي لوك الهضبة..
والنيولوك علي طريقة الهضبة يعني البساطة وعدم التكلف والاتجاه لما هو متاح لكل الناس في تنفيذه وفي نفس الوقت يحقق صدمة ومفاجاة..بمعني ان اللبس اللي بيلبسه والتسريحة اللي يعملها تكون سهلة وكل الناس ممكن تعملها وتلبسها في حياتها العادية ولو بأقل التكاليف بعكس بعض الفنانين اللي لما اتجهوا لفكرة اللوك عملوا حاجات صعبة التقليد زي مثلا لوك هشام عباس الاخير وهو ظاهر ببدلة زي بتاع جاكسون و شارلي شابلن..صعب جدا ان شاب يقلد لوك زي ده وممكن يكون غالي جدا الحصول علي بدلة بالشكل ده وخصوصا ان بدلة زي دي الظهور بيها بيكون في مناسبات معينة .. والمرة الوحيدة اللي ظهر بيها الهضبة في بوستر البوم "كمل كلامك" وهو لابس بدلة كانت بدلة عادية بدون رابطة العنق للحفاظ علي الشكل الشبابي المميز ليه ديما في كل لوك.
المعادلة الصعبة ديما في خلق النيولوك الديابي هي انك تعمل لوك بسيط وفي نفس الوقت صادم ودول ضدين صعب الجمع بينهم بسهولة خصوصا ان الصدمة لازم تكون حاجة جديدة ومدهشة وغريبة ع العين..لكن الجمع بينهم ديما هو هدف الهضبة ونلا حظه مثلا في لوك "الليلادي" لما ظهر الهضبة بدون تيشيرت..ما كلنا بنروح البحر وبنتصور كده لكن الهضبة عمل منها الصدمة واللوك..وحتي لما لبس البدلة كانت صدمة ومفاجأة وتقدر تحسها لو تخيلت ان ليك صاحب تعرفه من 20 سنة وديما لبسه كله كاجوال وفجأة قابلك لابس بدلة..وهو ده اللي عمله الهضبة، الناس مستنية تشوفه لابس ايه فاجأهم بلوك عادي وبسيط لكن لأنه ماكنش حد متوقع انه يطلع منه فكانت الصدمة وخصوصا انه اول ما طلع وهو معروف بانه اول فنان يغني ويظهر ع المسرح بدون بدلة..ومين في الشباب مالبسش تيشيرت الهضبة في "تملي معاك" وعمل الدقن بتاعته؟
البساطة والصدمة .. هي دي المعادلة اللي لازم تتحقق في النيولوك عشان يقدر يعمله كل الشباب والا يبقي مالوش لازمة طالما بعمله لنفسي واكتفي بأي صورة والسلام علي غلاف الألبوم .. ومفيش مانع انك تاخد فكرة لبس او موضة او تسريحة شعر من الغرب بشرط انها تكون ملائمة لثقافتنا لان مش كل لبسهم وموضتهم بتناسبنا زي ما بعض لبسنا ممكن يكون مش بيناسبهم..والتقيد بالسن في اللبس عمره ما كان عائق قدام الهضبة لان حسب رأي أشهر خبراء الموضة في العالم ان الانسان بيلبس اللي يناسب شكله وستايله مش سنه واللوك بيعتمد ع المظهر والشكل بنسبة 80% و علي السن بنسبة 20% ونلاحظ ده في اخر لوك للهضبة وهو ظاهر بعضلات وشباب مايتمتعش بيهم شاب في العشرين..اللهم لا حسد.
اما مهاجمة الهضبة علي لوكاته فده واقع مستحيل هيتغير حتي لو اتصور "بجلبية" علي غلاف الألبوم ولو حطينا الهضبة قدام خيارين مالهمش تالت اي قرار هياخدوا هيتهاجم عليه وهي دي ضريبة النجاح .. ويكفي انه ديما في النهاية بيثبت صحة وجهة نظره والكل بيقلده شباب وفنانين ويمكن بيتمدحوا بعدها من نفس الناس اللي هاجمته.
الهضبة مرشح للفوز بجائزة عالمية جديدة وهي جائزة الموسيقي الافريقية المقامة في بريطانية .. ودي هي السنة التانية ليها .. وبيتم نقل هذا الحدث الدولي الهام علي اكتر من 12 قناة اوروبية وامريكية وافريقية بحضور مشاهير العالم في كرة القدم والسينما والموضة والموسيقي .. وتم ترشيح الهضبة عن منطقة شمال افريقية لـ3 فئات مختلفة لنيل الجائزة.
يختار الجمهور الفائز عن طريق التصويت على الموقع الرسمي للجائزة وعن طريق "الاس ام اس" ابتداء من يوم 29 أغسطس الي يوم 10 أكتوبر وتسلم الجوائز للفائزين يوم 17 اكتوبر.