أنا و هؤلاء

في يوم مغيم والرؤية يادوب واضحة كنت رايح اشتري حاجة من السوبر ماركت ولما دخلته فجأة لقيت نفسي قاعد في قهوة بلدي لوكال للغايا .. شوية ولقيت المنتج محسن جابر بيدخل القهوة وجاي ناحيتي وقعد قدامي قولتله فيه حاجة؟ قالي ماتخافش مش هأذيك لسا الحبايب جايين قولتله الحبايب مين؟ قالي دلوقتي تعرف.... بعد شوية دخل سالم الهندي و حلمي بكر.

قالي محسن جابر انت عمال تهاجم فينا لصالح عمرو دياب وكل ما نقول حاجة عنه ترد وتهاجمنا ، هو انت فاكره إله او نبي معصوم من الخطأ؟!

أنا: لا بس كمان انتوا لا أنبيا ولا آلهة.

محسن: مش خايف نتلم عليك نضربك؟

أنا: وقتها هبقي اتأكدت اني حرقت دمكم ومالقتوش رد.

محسن: طيب انا غلط في ايه؟

أنا: قصدك ماغلطش في ايه.

محسن: مش من حقي أرفع قضية أطالب بحقي؟!

أنا: حقك بس لما تميز وتفرق بين ناس وناس مش حقك.

محسن: وضح..

أنا: رفعت قضية علي عمرو لما غنا أغاني شركتك في حفلاته ومارفعتش زيها علي غيره زي راغب واليسا وقايمة طويلة لما عملوا نفس الحكاية .. ده غير انه ماسبقش وسمعنا ان المطربين القدام حد فيهم كان بيستئذن قبل ما يغني او يدفع فلوس تمن اغنية بصوته او حتي بصوت غيره .. ماشوفتش انك منعت مطربين شركتك يغنوا من انتاج شركات تانية رغم ان حفلاتهم احيانا بتكون من انتاجك .. ورفعت قضية علي روتانا لانها ذاعت حفلة لعمرو غنا فيها أغاني من انتاجك وانت برده بتذيع حفلات لمطربين بيغنوا اغاني من انتاج غيرك !!!

رد سالم الهندي وقالي كده انت نصفتني وقال بسخرية تستاهل مليون دولار مكافئة..

أنا: يبقي جم في وقتهم.

الهندي: اشمعني؟!

أنا: هدفعهم شرط جزائي ليكم علشان الهضبة يسيبكم.

دخل حلمي بكر في الحوار وقالي : انت مش عجبك حد في القعدة ولا ايه؟

أنا: وانت اللي عجبك حد؟

حلمي: وايه يعني اما قولت عمرو مغني مش مطرب .. فين الغلط؟!

أنا: وايه يعني لو انا قولت انك بتاع بطاطا مش ملحن؟

حلمي: انت هتغلط؟

أنا: وفين الغلط!

حلمي: بتاع بطاطا مش غلط؟

أنا: لا ده راجل شريف بيكسب بعرقه علشان يأكل عياله.

حلمي: بس انت قاصد تقلل مني..

أنا: يبقي انت قصدت تقلل من عمرو.

حلمي: بس انا قولت انه المطرب الأول في جيله.

أنا: يبقي أنت بياع بطاطا شاطر !

فجأة قطع كلامنا صوت حد جاي من بعيد عامل دوشة وعمال يقرب ولم شوفناه طلع "رحيم" لابس عمة وعباية غريبة الأطوار وعمال يقول قهوة قهوة ، ثورة ثورة ، زنجا زنجا ، هضبة يا هضبة.

فتحت عيني علي صوت بيقولي "اصحي اصحي" .. بصيت حواليا لقيتني في أوضتي و اذاعة "الشرق الاوسط" شغالة علي أغنية "أصلها بتفرق".