ههاجمك ياعمرو

ههاجمك ياعمرو ما كله بيهاجمك..ههاجمك عشان انجح واشتهر والناس تتكلم عني..ههاجمك عشان لما مطرب ابن امبارح من مواليد 6 الصبح هاجمك الناس كلها عرفته وقالوا عليه نجم الجيل..ههاجمك واحول المدونة بالانجلش عشان انت عالمي ،اقوم ابقي واد (مهاجم) عالمي والعالم يكتب عني ويقول اللي هاجم عمرو اهو ويمكن يجيلي عقد احتراف في ريال مدريد اصلهم محتاجين مهاجم.

هكتب عنك وعن فشلك طول 26 سنة الحظ (والحظ بس) اللي ساندك عشان تقدر تستمر المدة دي ..شعبيتك دي مجرد وهم وبتعتمد ع المراهقين اللي هيفضلوا مراهقين رغم انك بتغني من يجي كتير قوي واللي بيسمعلك من اول ماظهرت من 20 سنة مثلا لسا مراهقين مش بيكبروا وهيفضل يتقال علي جمهورك مراهقين حتي لو فضلت ع الساحة 50 سنة هيفضل اسمك مطرب المراهقين واللي سنهم بقي فوق الخمسين برده مراهقين..مهو في حاجة اسمها مراهقة متأخرة يعني.

هتكلم عن لوكاتك وحركاتك وسنك وهقول انك بتعمل عمليات تجميل عشان لسا محافظ علي شبابك وبتلعب رياضة..ماتلعبش رياضة عشان سنك يبان ..وبمناسبة سنك مش ناوي تعتزل بقي سنك بقي 47 سنة ايه يعني الناس بتموت فيك وبتحبك ولو اعتزلت سوق الكاسيت ممكن ينهار وايه يعني لما الفن المصري يتراجع قدام اللبناني واللحم الابيض المتوسط المميز ليه ولا ايه يعني حتي لو اتراجع قدام الخليجي حقهم يشموا نفسهم شوية..ايه يعني عمرنا ما سمعنا عن مطرب ناجح شوية زيك كده اعتزل..عبد الحليم وام كلثوم وعبد الوهاب رحلوا وهما كانوا لسا بيغنوا وبعضهم كان قرب ع الستين هتبقي انت اول واحد ناجح يعتزل..وبعدين ما لعيبة الكورة بتعتزل.

لقبك مش حلو ايه كلمة الهضبة دي سمي نفسك اسم قريب من لقب العندليب مثلا وتبقي العصفور الكاسر او الصقر النونو ولا سمي نفسك زي كوكب الشرق ويبقي اسمك نيزك الشرق ولا مجرت الشرق او عطارد الارض...المهم ان لقبك مش عجبني..حلينا كل حاجة في الفن ومش ناقص غير لقبك اللي انت اصلا عمرك ما فكرت فيه ولا اهتميت بتفاهات زي دي وهو ده عيبك وسر هجومي عليك لان كل النجوم بيسموا نفسهم القاب ويدوا نفسهم اسامي وانت استنيت لما الناس هي اللي طلعت عليك اسم يعبر عن مكانتك اللي ماحدش مقتنع بيها غير جمهورك القليل قوي قوي ده.

اخيرا انصحك انك تبطل تشتري الميوزك اورد لانها بتتاخد عن اعلي مبيعات في الوطن العربي وانت مبيعاتك يعني مخسعة ديما وانصحك تشوف لطيفة ونانسي وسميرة سعيد واليسا وكل الناس دي كسبتها ازاي وتعمل زيهم وماتقهمنيش انك بتبيع اكتر منهم وخصوصا ان انت يعني المطرب الوحيد والمصري الوحيد اللي كسبها والباقي (كلهن) مطربات من لبنان وتونس والمغرب..هتفضل تفضح بلدك لحد امتي وتشتري الاورد وتقف في موناكوا وتقول انا بهدي الجايزة دي لبلدي مصر ياعم اعمل اغنية 3 دقايق وغنيلها احسن بدل ماتكسب جايزة عالمية ومهمة قوي كده والعالم كله بيشوفها وتقول مصر والعالم كله يسمعها بتتردد وبتجلجل.

اقولك حاجة عشان زهقت منك..بطل غنا بطل غنا.