كلام تقيل في التأجيل

بعد الاعلان عن تأجيل الألبوم ظهرت بعض ردود الأفعال الغاضبة لأن الناس في شوق انها تسمع الهضبة بعد سنتين غياب..ويمكن انتظار الناس سنتين كاملين ولما اتحدد المعاد من خلال الادارة الفنية للهضبة والتأكيد عليه اكتر من مرة وفجأة حصل اللي حصل كانت الصدمة كبيرة ..وخصوصا انه لو كان من الأول اتقال معاد متأخر اكتر من 14-6 وليكن 1-7 زي الموعد الحالي ماكنتش الناس زعلت وكانت هتستني لكن يتقال معاد ويتأجل..هي دي المشكلة والأزمة اللي موجودة دلوقتي.
تخيل انك بتموت من الجوع وبقالك 4 ايام من غير اكل وواحد قالك انه هيجيبلك اكل كمان نص ساعة..ولما فات نص ساعة الا خمسة جه وقالك استني كمان 6 ساعات .. ممكن تقتله لان هو نفسه قتل الصبر عندك ومابقاش فاضل ولو دقيقة..ماعدش ينفع..انتهي!
ده تحليل بسيط للصورة اللي ظهرت عند بعض الناس ولكن..

جمهور الهضبة عمر حبه ليه ما كان ألبوم او أغنية .. أكبر من كده بكتير لأننا قاطعنا كل اللي هاجموه وردينا عليهم وماسكتناش لأي حد تجاوز في حق الهضبة ودي مالهاش علاقه بأغانيه وألبوماته.

الناس اللي زعلت عشان الالبوم اتأجل كام يوم كانت هتعمل ايه لو كان الخبر اعتزال عمرو دياب؟!

سهل جدا جدا ان الهضبة يسجل 10 اغاني مع اي فريق عمل ويقوم منزل الألبوم ويريح نفسه لأن مفيش حد بيحب يتعب نفسه الا لو كان بيحب الناس اللي بيتعب عشانهم .. وكل يوم تأجيل زيادة معناه ساعات سهر زيادة وشغل أكتر وتعب أكتر.

الهضبة مش هينزل الألبوم الا لما يرضا عنه بنسبة 100% عشان يليق بجمهوره ويفضل رقم واحد طول عمره وماعندوش استعداد يغامر بشعبيته وتاريخه في يوم من الأيام والذكي اللي يفهم كده.

ماتدوش فرصة لحد من الحاقدين انه يستغل الحالة دي ويحاول يخليكم اداة ضغط علي عمرو لحد ماتتحولوا لشئ ضده..

معاك من أول "الطريق" لحد "الليلادي"..وهنفضل علي طول معاك.