اقوي المانشيتات في تاريخ الهضبة

طبعا انا سعيد الايام دي بسبب كتابة جريدة وشوشة عن المدونة والاشارة لمقالتي عن اليسا وخاصة ان ده بيمثلي نجاح كبير لان اسم المدونة ماجاش من فراغ وهدفي اني اوصل صوت جمهور الهضبة واللي حصل ده يعتبر شهادة نجاح للمدونة ودورها ودي صورة المقال من مجلة وشوشة:

وطبعا مستحيل يفوتني تقديم شكر كبير جدا لاخويا وليد مدير موقع عالم عمرو دياب احد مواقع شبكة عمرو دياب الاعلامية علي النت علي انه هو اللي عرفني بالمقالة ونزلها علي المنتدي الخاص بالموقع اللي انا فخور اني جزء منه وأحد اعضائه.

وبسبب السعادة دي أنا كنت بفكر من اول السنة اني اعمل حاجة للهضبة بمناسبة مرور25 سنة علي مسيرته الفنية ألقي فيها الضوء علي تاريخه بس ديما كانت الفكرة غايبة لصعوبة تجميع تاريخ الهضبة في عمل واحد وديما كانت كل ما تيجي فكرة في دماغي ألاقي نفسي عايز اعمل لها اجزاء تانية وبحسها ناقصة ومش كاملة و مش بالصورة اللي انا عايزها لكن فرحتي والكتابة عن المدونة ادتني دفعة معنوية خلتني افضل افكر واشوف اخر لقائات مع الهضبة سواء في التليفزيون زي برنامج سكوت هنغني ومؤتمر روتانا وفي حواراته مع الصحف واشوفه بيفكر في ايه لانه هيساعدني في العمل المنشود لحد ما وقفت عند كلمة لعمرو في برنامج سكوت هنغني بيقول للمذيعة مفيدة شيحة انا عشان اعمل مشوار حياتي كنت بجمع اللي اتكتب عني في الصحف عشان نستعين بيه في البرنامج..لقيت ان اغلبها هجوم واللي بيتهمني اني بستخدم كريم شعر اسرائيلي وغيره..من هنا جتلي الفكرة ..

اجمع اقوي المانشيتات اللي اتكتبت عن الهضبة واللي بتلخص جزء بسيط جدا من مسيرته وفالاخر طلع الفيديو ده:

اليسا مطربة درجة أولي في الغرور والسيليكون

الكل قري وسمع عن الكلام اللي اتنشر علي لسان اليسا وهجومها علي ملك الاغنية العربية بلا منافس من 20 سنة..وايا كان وجهة نظر اي حد في الكلام ده فدي حقيقة يصعب انكارها واللي حقق نص اللي حققه الهضبة يطلع ويقول انا اهو او اللي عنده جمهور قده يطلع ويقول انا اهو..الموضوع مابقاش محتاج دلائل ولا توضيح..وجيل عمرو اختفي من الساحة دلوقتي والكل فاكر ايام ماكان بيتكتب زمان عن قوة المنافسة بين عمرو وفؤاد النهارده بيقولوا عمرو وتامر رغم انه شئ مضحك لكن الصحافة لازم تخترع البديل عشان تفضل تكتب وتبيع..زي زمان كانوا بيكتبوا عن المنافسة بين حليم وفريد وفجأة بقيت تكتب عن هاني شاكر وتقول انه منافس حليم..والتاريخ بعد كده اثبت ان لا فريد ولا هاني شاكر كانوا منافسين لحليم.

بعد التوضيح البسيط ده نرجع لموضوع اشهر مطربات السيليكون اليسا..الكلام اللي اتنشر علي لسان مطربة الاغراء اليسا بيقول انها في جلساتها بتقلل من قيمة عمرو وبتقول انه مطرب درجة تانية وانها المطربة الاولي ومبيعاتها اعلي مبيعات في الوقت الحالي وان البومها الاخير باع اكتر من البوم عمرو لا وخد دي كمان..قال ايه عمرو لازم يركز في القضايا اللي مرفوعة عليه في اسبانيا باتهامه بسرقة الحان من اغاني اسبانيا!!!

ده الكلام اللي اتنشر في اكتر من سايت وجريدة ومجلة ومفيش اي نفي او اعتذار صدر من اليسا بخصوص الموضوع ده وايا كان صحته من عدمها يبقي لازم يتم التوضيح خصوصا ان اليسا هي ملكة الغرور مش الاحساس بس زي ما جمهورها فاكر ده اذا كان في احساس.
 
نبدأ من الاخر عشان نبدأ كبار زي مابيقولوا..الهضبة اللي لو كح بتنزل خبر حصري في اي مجلة يوصلها خبر الكحة وتفضل تبحث عن اسبابها وهل هو برد ولا ارهاق ولا حاجة دخلت في زوره وتسال فريق العمل هو كل ايه قبل الكحة ويعملوا حوارات وتحقيقات للكشف عن اسباب الكحة الغامضة وتتنشر بعدها في كل بقاع الدنيا..وتبقي هي اهم مواضيع جلسات النميمة في الوسط (والطول والعرض كمان) ومش بعيد تلاقي عنوان بيقول كحة عمرو دياب هل تجعله يفكر في الاعتزال وهل للموساد الاسرائيلي علاقة بالكحة؟!!!
 
كل ده وكل الهيصة اللي بتحصل عن اي خبر مهما كانت اهميته او سطحيته عن الهضبة اليسا هي الوحيدة في الدنيا اللي قدرت توصل لخبر القضايا اللي مرفوعة علي الهضبة في اسبانيا وانه سارق الحان من هناك والاعلام ماقدرش يوصل للخبر ده رغم انه خبر لو اتنشر في اي مكان هيضمن اعلي مبيعات للناشر لكن اليسا مصادرها اقوي ويلا نتكلم عن اسبانيا..
 
اخر اللي اتكتب عن عمرو مع اسبانيا او ذكر اسمه جنب اسمها في وسائل الاعلام كانت انه بيتوقع فوزها ببطولة اوروبا والراجل صدق علي فكرة بس مش ده المهم المهم انه ماكنش خبر سرقة الحان عشان كده يلا نفتش في موضوع اسبانيا وعلاقة عمرو بيها..البداية كانت في اغنية نور العين لما قدم المزيكا الاسبانية لاول مرة وحققت نجاح علي مستوي عالمي واختيرت من افضل 50 اغنية في القرن وبهرت الاسبان نفسهم وقدمتها فرقة اسبانيا وغنتها بالاسباني والعربي يعني ماكنتش سرقة ولا حاجة ولو افترضنا انه سارقها من اغنية اسبانية ايه اللي يخلي فرقة اسبانية تغنيها وبالعربي..طبعا الاغنية دي كانت سنة 1996 يعني قبل ما اليسا تعرف تمسك مايك بس كان لازم نوضح ان علاقة عمرو باسبانيا وفرقها الغنائية علاقة بيحكمها احترام لفنه وتقدير ليه وانبهار بمزيكته حتي وهو بيقدم مزيكة شعبية محلية هما روادها..
 
اما اخر علاقات عمرو باسبانيا او ظهور لحن مشابه لاغاني عمرو هناك كانت في اغنية اسمها:
" Tu seras para mi" 
وغنتها مطربة اسمها:Raquel Camins
واللحن بتاعها كان لحن اغنية ليلي نهاري وبعض وسائل الاعلام قالت ان اللحن مسروق منها بدون ماتتأكد لكن طالما الاغنية اجنبيه يبقي لازم نكون احنا اللي حرامية ونطلع نفسنا وحشين لكن ثبت ان الحقيقة ان الاغنية دي نزلت سنة 2006 في اسبانيا يعني بعد نزول البوم ليلي نهاري بسنتين يعني عمرو اللي اتسرق في اسبانيا وراكيل هي اللي طلعت وحشة وشريرة وبتسرق ورغم كده الاغنية حققت نجاح كبير في اسبانيا واختيرت من افضل الاغاني في اسبانيا والمفاجأة ان راكيل ماطلعتش وحشة قوي ولا بالشر ده لانها كتبت اسم اغنية ليلي نهاري علي غلاف الالبوم اشارة اللي اقتباسها من اغنية عمرو ودي صورة الغلاف في عين كل محبي السيليكون:

وعشان ماحدش يقل ادبه ويقول انها فوتوشوب او فبركة ده موقع اجنبي عليه الالبوم وتاريخ اصداره ومكتوب فيه ليلي نهاري من غير اسم الاغنية الاصلية اللي نزلت:
 
http://www.amazon.com/Disco-Estrella-2006-Various-Artists/dp/B000GB5OQI/ref=sr_1_1?ie=UTF8&s=music&qid=1197569315&sr=8-1
 
ولان عمرو مصطفي هو ملحن الاغنية فاتعرض للاذي باتهامه بالسرقة فسافر للمطربة راكيل في اسبانيا عشان يقابلها ويثبت حقه في الاغنية وانه مش سارقها وبالفعل قابلها وهي وضحت انها هي اللي خدتها مش العكس وان لا عمرو دياب او مصطفي سرقوها.
 
يبقي الهضبة ماسرقش حاجة من اسبانيا بالعكس ده طلع هو اللي اتسرق ويمكن من غباء اللي بيهاجمهوا عمرو حقدا عليه انهم كل مايحاولوا يثبته حاجة ضده تطلع في صفه وتثبت نجوميته اكتر واكتر واللي اتهمه بالسرقة وطلع هو اللي مسروق منه ما اثبتش حاجة غير انه ورا الناس قد ايه عمرو بيقدم مزيكا عالمية وصوته واصل لكل مكان في الدنيا..يعني عالمي بجد مش بيشتري جوايز يا عالم يا سيليكون!!
 
اما الجزء التاني من كلام اليسا وانه مطرب درجة تانية مش عارف ارد عليه ولا لا؟ وهل يستحق الرد اصلا؟ وهل في حد بالغباء ده عشان يصدق كلام اليسا؟!..الكلام عن مكانة عمرو هيحتاج 25 سنة كتابة واليسا دخلت من حتة مش مستهلة توضيح لان الاعمي شايفها..وعلي اي حال هكتقي بوضع الصورتين دول من حفلة راس السنة لاليسا وعمرو..يعني قاعة واحدة وحفلة واحدة ويوم واحد ونفس عدد التذاكر اللي اتباعت للاتنين ومع ذلك في اماكن فاضية واليسا بتغني وكل الناس قعدة في اماكنها وفي ناس قربت تنام اما في فقرة عمرو الناس كلها وقفت وماكنش حد قاعد وكانوا في قمه الانسجام كأن عمرو دخل قاعة تانية او كأن الجمهور شاف اللي هو جايله:

منعا لتكرار مأساة أغنية لو قادر

من الاغاني الجديدة اللي عمرو غناها في حفل شيراتون دمشق كانت اغنية "حاول تنسي هوايا" وكلماتها:

حاول تنسى هوايا ارتاح بقه اوعدنى
ما دورش ورايا ده انا راحتك تسعدنى
طول ما بتسأل عنى هتبقى قريب منى
وده بيزيد في عذابك بيخليك مستنى
انا غيرت حَيـاتى وحِـياتى تقلدنى

وقبل ما تتكرر مأساة اغنية لو قادر وحد يستني انها تنزل وماتنزلش او يتعمل جروبات علي الفيس بوك تقول لازم تنزلها ياعمرو لان ده مش دورنا كجمهور للهضبة لان احنا وراه مهما غنا وقدم وثقتنا فيه اكبر من اغنية واذا ساب اغنية حلوة بيكون عشان في احلي.

الأغنية عجبت جمهور الهضبة كالعادة مع كل اغانيه وكتير بيقولوا ياريتها تنزل وعشان كده كان لازم اوضح الاتي:

من شروط العقد اللي بين عمرو وشركة اكسترا فغانزا منظمة الحفل انه يغني اغاني جديدة وعمرو لسا مابدأش اصلا في تسجيل اغاني الشريط القادم وهو هيبدأ تسجيل الاغاني من الشهر الجاي والاغاني دلوقتي بين ايد الموزعين والملحنين وباقي فريق العمل وكلهم بيحضروا وبيجهزوا الشغل اللي هيعرضوا علي عمرو..عشان كده غنا اغاني مانزلتش علي اساس انها اول مرة تتغني للناس والحقيقة ان اغنية حاول تنسي هوايا مع عمرو من ايام البوم علم قلبي وسجلها بالفعل لكن ماوقعش عليها الاختيار عشان تنزل في الالبوم وفضلت في خزنة عمرو لحد ماغناها في الحفلة لاول مرة..باقي الاغاني الجديدة مفيش معلومات عنها والغالب انها برده من تسجيلات قديمة لعمرو ومانزلتش للسبب المذكور.

وبناء عليه يبقي احتمالات نزول اغنية حاول تنسي هوايا ضعيفة ولا تتعدي 1%..وان كان كل شئ وارد مع الهضبة.

متفائلين بروتانا

بعد تجديد عقد الهضبة مع روتانا كان لازم نعرف رد الفعل من الجمهور ومدي رضاه عن العقد خصوصا بعد الكلام المبشر والوردي من عمرو عن عقده مع روتانا وعن انه هيحقق كل رغباتهم وعن مشاريع تكنولوجيا وافلام وشركات عالمية هتشارك في التوزيع والانتاج وكلام كبير قوي يدوخ الدماغ..والواضح من الكلام ده انه عمرو وروتانا بيوعدوا الجمهور بشكل تاني وطريقة تانية مختلفة عن الفترة اللي فاتت وخصوصا انها المرة دي 5 سنين و5 البومات و10 كليبات وعمرو عنده من الذكاء اللي يخليه يتعاقد مع الشركة المدة دي رغم الخلافات والمشاكل اللي كانت بتتردد قبل نهاية العقد ورغم ان عمرو وروتانا ماسبقش وصرحوا ان في بينهم خلافات بس الصحافة عايزة خلافات يبقي اديها خلافات وخصوصا لما تبقي صحيفة من عينة الغمز واللمز و(الوشوشة)!

جمهور الهضبة متفائل بروتانا بنسبة 70% يعني اكتساح ويمكن ده راجع لثقتهم في عمرو وطمأنته للجمهور من خلال موقع عالم عمرو دياب اللي المفروض انه بقي رسمي من ضمن مواقع تانية رسمية.

15 % مش متفائلين بروتانا ودي نسبة ضعيفة ويمكن راجعة لقلقهم من اللي حصل في الفترة اللي فاتت ومعاملة الهضبة بطريقة ماتليقش بمكانته ومساواته بمطربين صاعدين وجداد ع الساحة..وتاريخ 25 سنة نجم اول وعالمية مش زي اغنية مفرقعة في شريط بيضم 10 اغاني لمطرب من بتوع الجيل.

15% برده رايهم ان مفيش حاجة هتتغير بين عمرو روتانا ويبقي الوضع علي ما هو عليه.

مارينا كمان وكمان

زي ماسبق وتم الاشارة الي ان الهضبة هيحيي حفلة في مارينا السنة دي كالعادة واللي ديما بتعتبر اقوي حفلات العام علي الاطلاق لكن وقتها ماكنش لسا اتحدد الموعد لكن خلاص تم تحديد معاد الحفلة واللي هتكون يوم 15/8/2008 في مارينا بورتو جولف.
التذكر هتطرح ابتداء من اول شهر اغسطس و هيكون سعرها موحد ب 150 جنيه.

اماكن اكشاك بيع تذاكر الحفل:-
الاسكندرية:
1- امام بورتو مارينا
2- امام بوابة 5 بمارينا
3- شارع خالد بن الوليد "ميامى"
4- امام نادى سموحة

القاهرة:
5- فيرجن ميجا ستورز
6- المهندسين شارع جامعة الدول

صورة تذكرة الحفلة: