لماذا لا يطرح الهضبة ألبوم كل عام؟

ديما الجمهور بيسأل عن تأخر ألبوم عمرو دياب كل سنة وخاصة في الألبوم الأخير اللي استغرق اطول فترة وصلت لسنتين ، و بدراسة الوضع الحالي ومقارنته بالفترات اللي كان بيصدر فيها ألبوم كل عام هنقدر نلحظ فوارق توضح صعوبة تكرارها في الفترة الحالية نسردها في 3 محاور كالتالي:

أولا- عمرو في فترة ظهوره ماكنش لوحده علي الساحة بل كان هناك مطربين آخرين كانوا بيصدروا ألبوماتهم كل سنة واحيانا أقل .. النهارده المتبقي منهم و أخص محمد فؤاد باعتباره كان في فترة التسعينات المنافس الأول لعمرو ، هل لازالوا بيصدروا ألبومات كل سنة؟ بالطبع الاجابة لأ .. طيب ولو بصينا للأجيال الجديدة من المطربين هل في حد منهم بيصدر ألبوم كل سنة؟ بالطبع الاجابة لأ .. طيب نظرة عالمية علي الغناء ، هل فيه مطرب عالمي بيطرح ألبوم كل سنة؟ بالطبع الاجابة لأ .. اذا التغير اللي أصاب عمرو ماطالوش لوحده بل طال الجميع !

ثانيا- في الماضي كانت المزيكا بتنحصر في لون واحد فقط هو المقسوم ولو بصيت لألبومات التسعينات هتلاقي ان كلها بتعتمد علي اللون ده فقط وأغنية واحدة بس أو اتنين ستايل لو كان المطرب ده قلبه ميت ومغامر لان المقسوم كان وقتها اللون الشعبي وتميمة النجاح المتعارف عليها ، أما حاليا هنلاقي ان المقسوم بقي بيشكل أغنيتين في كل ألبوم وبقي عندنا أكتر من لون موسيقي زي التكنو والهاوس واللاتن والريجا تون والروك وغيره وغيره .. هل انتاج ألبوم بيتكون من عدة ألوان موسيقية ينفع يستغرق نفس الفترة الزمنية اللي بيتطلبها إنتاج ألبوم بيتكون من لون موسيقي واحد فقط؟!

ثالثا- مكانة عمرو وتربعه علي القمة بفارق كبير دلوقتي خلت فيه حسابات تانية تختلف عن مثيلتها وقت ما كان بيصدر ألبوم في السنة وده بيخلق حالة من الوسوسة تخليه متردد مليون مرة قبل ما يطرح الألبوم الا وهو راضي عنه بشكل كبير ، واذا كان الموضوع مجرد 10 اغاني هيتم طرحهم وشكرا فدولاب عمرو مليان أغاني منتظرة الطرح في أي وقت لكن الموضوع مش مجرد ألبوم بينزل وخلاص !

اذا المقاييس اختلفت وتغيرت و صناعة ألبوم ناجح كل عام بقيت مستحيلة و مش موجودة علي أرض الواقع ..و لازم كل ألبوم ياخد وقته المناسب مش بس علشان يظهر للنور ويتسمع ، كمان لازم انه ياخد حقه في النجاح وحصد الجوائز لأن اصدار عمل جديد بيغطي علي العمل القديم وبيخطف منه الأنظار.