الهضبة من أقوي 100 شخصية عربية لعام 2009

كالعادة وفي كل مرة بتختار فيها مجلة أرابين بيزنس أقوي 100 شخصية في الوطن العربي لازم نلاقي فيها اسم عمرو والسنة دي احتل عمرو فيها المركز 46 كأول مطرب في الترتيب وبفارق 17 مركز عن صاحب المركز التاني تامر حسني..واحتل المركز الخامس من مصر.

مبررات أختيار الهضبة في التصنيف كانت كالتالي:
يعد الفنان المصري عمرو عبد الباسط عبد العزيز دياب علامة فارقة في الموسيقى العربية، خاصة بعد أن ساهم في وصولها إلى العالمية عن طريق سلسلة من أنجح الأغاني التي لاقت صدى لافتاً في مختلف دول العالم حتى بين الشعوب غير الناطقة باللغة العربية.

وحققت ألبوماته مبيعات هائلة وترجمت كثير من أغانيه إلى عدد من اللغات أهمها الإنجليزية والروسية والكرواتية والبلغارية والتركية والألبانية والهندية. وهكذا يكون عمرو دياب أول مطرب عربي ينجح في منح الأغنية العربية موطئ قدم على ساحة الغناء العالمية.

تميز عمرو دياب بتجدده في أغانية وإدخاله آلات جديدة في موسيقاه وحصل على جوائز عديدة خلال مشواره الفني، من أشهرها «ورلد ميوزك أورد» 3 مرات عن أعلى مبيعات في الشرق الأوسط أعوام 1998، و2002، و2007، ومن الجدير ذكره أن العمر الفني للفنان عمرو دياب يزيد عن 25 عاما منذ ظهور أول ألبوم له بعنوان «ياطريق» عام 1983.

هيتسرب يعني هيتسرب

كل الاجواء المحيطة بالالبوم الجديد بتقول انه هيتسرب يعني هيتسرب تجيلها يمين تجيلها شمال هيتسرب..الموضوع مابقاش محتاج ذكاء او تخمين او استطلاع رأي...كل المؤشرات بتقول انه هيتسرب.

طول فترة الاعداد للالبوم ده اتسرب اكبر كمية اغاني في تاريخ عمرو وتاريخ الوطن العربي وعدد ماحصلش قبل كده بداية من مقطع اغنية لو قادر اللي نزل ووقتها قولت انها هتتسرب كاملة قريب جدا لان اللي معاه المقطع معاه الاغنية وبالفعل بعدها بفترة اتسربت وتلاه اغنية حنية الدنيا.
المشكلة مش كبيرة لحد دلوقتي لان التسريب وارد خصوصا ان الاغنيتين من تسجيلات قديمة وياما حصلت مع عمرو انه يتسربله قبل او بعد كل البوم اغنية او اتنين مانزلوش قبل كده..المشكله ازاي الاغاني دي وصلت لايد المسربين.

المشكلة بجد لما اتسرب مقطع من اغنية طمني وعمرو بيسجلها في الاعلان الجديد ودي كانت بداية دوامة التسريبات اللي تتعلق بالالبوم..بس يلا اهو مقطع والاعلان كده كده هيتذاع وهتتسمع رغم انه اتذاع من ايام قليلة بعد تسريبها ب 5 شهور !!!
بعدها اتسرب مقطع اغنية الله علي حبك انت وعمرو بيسجلها في الاعلان الجديد برده..ودي ماكنتش عادة عمرو انه يسجل اغاني جديدة في الاعلانات قبل مالالبوم ينزل ولازم يهتم بالنقطة دي الفترة الجايا..وكده يبقي ده تاني تسريب من الالبوم.
المميز بقي قوي قوي واللي يخليك تندهش لانها لاول مرة في التاريخ ان اعلان اغنية طمني اتسرب علي النت قبل اذاعته بما لا يقل عن شهر بجودة عالية وكامل..عمرك شوفت مطرب بيتسربله اعلان؟!

عموما تسريب مقاطع طمني والله علي حبك انت كان لتسجيلها من مدة وركنها علي الرف لفترة طويلة علي ما يحين وقت اذاعتهم حسب الخطة الموضوعة من شركة بيبسي ونتمني انهم مايتسربوش كاملين بعد كده زي ما حصل مع اغنية لو قادر.

بعد كده العملية دخلت في الغويط واتسرب 4 اغاني دفعة واحدة من الالبوم وهما: ليه والا حبيبي وماكنتش ناوي وبعدت..وطبعا كانت صدمة كبيرة لعمرو خصوصا انه كان لسا ماسلمش الماستر لانه كالعادة بيتسرب بعد ما بيسلمه لروتانا..لكن الاغاني قالوا انها كانت زي بروفات ومش في شكلها النهائي وبكواليتي سئ و لو نزل منهم حاجة هيبقي بتوزيعات تانية وبكواليتي احسن..بسيطة.

من يومين تلاتة بقي اتسربت الاغاني بشكلها النهائي وبجودة عالية ماعدا الا حبيبي وتأكد خروجهم من الالبوم وعلي اي حال ادينا مستنيين اغنية الا حبيبي بكرة تتسرب هي كمان.

بالاضافة لده ماننساش اللي حصل في اخر البومين لعمرو مع روتانا كمل كلامك والليلادي اللي اتسربوا ع النت كاملين بكواليتي عالي وبالكافرات بتاعتهم وكان ناقص ان اللي سربهم يروح لكل بيت في مصر يديله نسخة.

كل المؤشرات دي بتقول انه لاجدال في ان البوم عمرو دياب هيتسرب يعني هيتسربب.

ما لا تعرفه عن محسن جابر

اللي يتابع محسن جابر وعلاقته بالفنانين اللي في الوسط يقدر يعرف كويس جدا انها علاقة بيحكمها المادة وتصريحاته ديما بيتحكم فيها المال.. واذا كنت النهارده معاه وبتجبله فلوس يبقي انت حبيبه وانجح مطرب في الوطن العربي واذا سبته وبعدت عنه يبقي دي نهايتك وبداية السقوط والفشل والتصريحات النارية ضدك وده حصل مع اغلب الفنانين اللي سابوا شركته لدرجة انه لما زهق من التصريحات راح عامل شخصية وهمية اسمها ابن عجب علي قنواته تخبط في كل الفنانين اللي سابوا شركته.

وعن علاقته بعمرو فالملاحظ في كلام محسن جابر ديما وتصريحاته عنه انها ديما متناقضة وبتبقي علي حسب رضاه عن عمرو والغريب انها بتكون مختلفة 100% وتستغرب لما تعرف انها طلعت من شخص واحد وهنستعرضها بالدلائل كالتالي:

الخلافات بدأت لما انتقل عمرو من عالم الفن لروتانا وكانت صدمة كبيرة لمحسن جابر واضح انها اثرت عليه وافقدته توازنه فطلع بعدها بتصريحات نارية يهاجم فيها عمرو لدرجة انه أكد ان عمرو هيختفي من الساحة خلال عامين "خدوا بالكوا من كلمة خلال عامين دي اصل الحوار ده كان سنة 2003"

والغريب ان لما اتوجه سؤال عن كلام محسن جابر لراغب علامة في نفس المجلة كان رده مختلف وعقلاني:

وواصلت المجلة الحوار بسؤال جميل وكان رد محسن جابر مضحك جدا :

والسؤال دلوقتي بعد انتهاء البرنامج من سنين ايه هو اسم النجم ده خصوصا ان مفيش واحد طلع منه وحقق النجاح الكبير وكام اسم من البرنامج موجود ع الساحة دلوقتي وكام واحد منهم مع عالم الفن !!!

ورفع محسن جابر قضية علي عمرو لفسخه العقد معاه وانتقاله لروتانا واللي بدأ لاعداد اول البوم ليه معاها "ليلي نهاري" ولان محسن عايز يقضي علي عمرو حاول علي قد ما يقدر انه يمنع نزول الالبوم لكن فشلت كل محاولاته ونزل الالبوم وكسر الدنيا

واستمرت القضية في المحاكم فترة طويلة وفي احد المرات وعمرو بيتصل بعمرو مصطفي قاله انت فين رد عمرو مصطفي وقاله عند محسن جابر في المكتب فطلب منه يديله محسن جابر يكلمه واتفق معاه علي صلح ودي بعيد عن المحاكم ودفع تعويض مناسب لمحسن جابر وتم اللقاء في مكتب محسن جابر وحصل الصلح بين الاتنين في حضور د/حسام لطفي محامي عمرو

بعد الصلح انتشرت اشاعات قوية عن حتمال عودت التعاون بين الهضبة ومحسن جابر وعن احتمال فسخ عمرو عقده مع روتانا ورجوعه لعالم الفن ويظهر ان محسن جابر نفسه افتكر كده واعتقد ان عقد عمرو الجاي هيكون معاه ان ماكنش دلوقتي علي الاقل بعد نهاية عقده مع روتانا

والغريب ان بعد عودة العلاقات تاني بينهم والصلح اللي تم اتغيرت تصريحات محسن جابر تماما ونسي انه قال عن عمرو انه هينتهي خلال عامين او انه مش هينجح زي حليم وانه سبب نجاحه انه بيتنطط ع المسرح وفي حواره مع مجلة عين ديسمبر 2006 دافع محسن عن عمرو لما اتسأل اذا كان تامر وحماقي هيقدروا ينافسوا عمرو او يخدوا مكانه:

وفي حوار تاني اكد علي نجومية عمرو لما اتسأل نفس السؤال وكان رد اقوي وكأنه بيرد علي نفسه لما هاجم عمرو وقال انه هيختفي من ع الساحة خلال عامين وانه مش زي حليم رغم تشبيه بيه في المانشيت اللي فوق ردا علي السؤال المتعلق بتامر وحماقي وده كان مع بداية مشكلة برنامج الحلم

ومع قرب نهاية عقد عمرو مع روتانا بدأ محسن جابر يغازل عمرو ودخل معاه في مفاوضات غير مباشرة وبعد مانتهي العقد زاد الغزل في عمرو وعمل محسن جابر برنامج بيحكي فيه قصة حياة عمرو دياب من حلقتين وبعدها برنامج عن الميوزك اورد ونال عمرو منه الكتير من الكلام وطبعا كل ده بيدخل فلوس للشركة..وعمرو هو الفنان الوحيد اللي عالم الفن فضلت تستفيد من وراه الملايين سواء في وجوده او عدم وجوده معاهم..وبعد ما اعلن عمرو عن الحلم وتنفيذه ليه بدأ محسن جابر يطلب من عمرو فلوس مقابل اذاعة اغانيه مع عالم الفن في البرنامج وكان لسا محتفظ بهدوئه في التصريحات

ومع مرور الوقت وقع عمرو العقد مع روتانا لمدة 5 سنين عشان تبقي تاني صدمة لمحسن من عمرو بعد ما كان منتظر توقيعه ليه وطبعا بدأ محسن جابر يتغير تاني تجاه عمرو زي بالظبط ماتغير لما ساب الشركة اول مرة وبدأت قنوات مزيكا تهاجم عمرو من خلال الشخصية الوهمية ابن عجب والتجريح في عمرو والهجوم العنيف عليه بكل ما اوتي من قوة واختراع اشاعات واخبار كاذبة تسئ لعمرو والغريب ان مع زيادة رسايل ابن عجب زادت رسايل المعجبين علي شات مزيكا وكلها بتأيد عمرو.

واخير ظهر الحلم واتذاع علي روتانا والتليفزيون المصري وفيه اغاني عمرو مع عالم الفن ولقاه محسن جابر فرصة يرد بيه القلم لعمرو وبدأ محسن جابر يهاجم عمرو هجوم عنيف والغريب ان تصريحاته ماتغيرتش عن اول مرة ونفس التصريح لمجلة "لها" فبراير 2009

نفس التصريح السابق تقريبا كأنه حافظ ساعة الهجوم هيقول ايه بالظبط وازاي يبتذ اللي قدامه بأي شكل ..واتهامات لعمرو انه عامل عمليات تجميل وحرص عمرو ع المادة لان نجوميته قربت تنتهي بعد عامين طبعا..

وزاد الهجوم المرة دي وتنازل جزئية جديدة عمره ما تناولها وهي الميوزك اورد

محسن جابر يناقض نفسه وبيقول انه ادي الميوزك اورد لعمرو وانه سبب فوزه بيها لانه كان علي خلاف مع وردة اللي كان هيديهالها ويحسن عليها بيها بدل عمرو بس هي كانت مخاصماه .. واوعي تستغرب لما تقرا كلامه ده من حواره لمجلة عين ديسمبر 2006 عن الاورد وتأكيده علي انها لا تحتمل التشكيك ومبيعاتها موثوقة من جهة محترمة مش بالترشيح منه او من غيره

وأكد نفس الكلام ده في حوار ليه مع نجوم اف ام سنة 2004 يعني بالدليل الصوتي..للاستماع اضغط هنا.
هو نفسه محسن جابر اللي ظهر في احد البرامج وقال ان عمرو رفض ياخد الميوزك اورد لما انطلب منه فلوس مقابلها وكان وقتها عمرو متعاقد لسا مع روتانا وكسبتها اليسا..للمشاهدة اضغط هنا.

هو ده محسن جابر وهي دي تصريحاته عن عمرو مؤكدة بالصوت والصورة وقمة التناقض في الرأي والتصريحات والتأكيد علي سقوط عمرو خلال عامين سنة 2003 ونفس التصريح سنة 2009..واللي قامت مجلة عين بعمل تحقيق صحفي تاخد فيه راي مجموعة بارزة من كبار الموسيقين من اجيال مختلفة في كلام محسن جابر وده اللي هختم بيه المقالة دي...ما لا تعرفه عن محسن جابر..ويارب تكون عرفته..

وما الذي لانعرفه عن عمرو دياب؟!

كعادته في الفترة الاخيرة طلع علينا محسن جابر يهاجم عمرو ويقول كلام جامد من اللي بينفع يبقي مانشيتات بالخط العريض بيحاول يقول من خلاله ان هو صانع نجومية عمرو..كأن عالم الفن ماكنش فيها غير عمرو في الوقت ده وسبق وتم الكلام عن الموضوع ده في مقالة سابقة بعنوان: مطرب لم تصنعه شركة ولكنه صنع شركات.

اللي يلفت نظر واهتمام اي حد في كلامه هو تصريحه عن انه ناوي يعمل برنامج اسمه "مالا تعرفه عن..عمرو دياب" وطبعا هيتكلم فيه عن انه هو صانع نجاح عمرو والتركيز علي فترة وجوده في عالم الفن والنجاحات اللي حققها معاه وكواليس اعماله واحتلاله عرش النجومية ومش بعيد يتحفنا بالتلميح الفج عن انكسارات عمرو وضياع عرش النجومية منه وانتقاله الي شركة تانية بعد كده..ولمحسن جابر نقوله اللي نعرفه عن عمرو وهو مايعرفوش أو نسيه او بيحاول يفهم الناس غيره او فاكرنا مش عارفينوا وهيتكلم علي مزاجه..واليكم التفاصيل:

الاستاذ محسن مقتنع ان هو فعلا صانع نجومية عمرو رغم انه اول انتاج لعمرو مع الشركة كان عام 1996 في البوم "نور العين" يعني بعد 13 سنة من ظهور عمرو ع الساحة الغنائية وتقديمه لـ 16 البوم وطبعا ده كلام مضحك جدا وتهريج وكلام مايدخلش دماغ اي عاقل وخصوصا لما نشوف عمرو عمل ايه في الفترة دي مع شركة صوت الدلتا اللي انتجتله اعمال وصلت العالمية زي ميال واللي اختيرت ضمن افضل 50 اغنية في العالم واترجمت للغات كتير واتعملت ريمكسات علي ايد محترفين وموسيقين في انحاء العالم وتعتبر هي اول اغنية تتصور فيديو كليب في الوطن العربي..وبعدها كان نجم حفل افتتاح دورة الالعاب الاوليمبية الافريقية في مصر واتذاعت وقتها علي قناة "السي ان ان" وفنوات عالمية مختلفة وحققت نجاح مبهر..وتقديم البومات زي ويلوموني واللي وقتها كانت طفرة وثورة في المزيكا لانه كان اي اغنية هيد في الوقت ده بتكون مقسوم لكن عمرو كعادته اتمرد ع الواقع وغير وقدم شكل جديد..والبومات شوقنا وماتخافيش وياعمرنا وذكريات وايس كريم وراجعين وايامنا وحبيبي وكلها اعمال حققت نجاح كبير واعلي مبيعات..ونفس الفترة دي هي اللي شهدت تألق عمرو في السينما وكان بيتهافت عليه المنتجين..وكان الهضبة في الفترة دي بالفعل هو نجم الشباب الاول وصاحب الشعبية العريضة اللي ماحدش يقدر ينافسه فيها او ينكرها الا حاقد.

جمهور الهضبة عارف كويس انه كسب احسن مطرب في اكتر من استفتاء سنوي من سنة 2004 اللي شهدت بدايته مع روتانا الي سنة 2008..وكسب الأورد في 2007 عن اعلي مبيعات بالبوم "الليلادي" وكان يستحقها في اعوام اخري لكنه رفض يدفع تمنها وده حسب تصريح سابق لمحسن جابر نفسه...للمشاهدة اضغط هنا!!!!!
هو ده اللي يعرفه جمهور الهضبة وانت ماتعرفوش...

انتظروا المقالة القادمة: "ما لا تعرفه عن..محسن جابر؟"..ملف كامل.

راجعين

بعد انقطاع دام ما يقرب من 5 شهور عن الكتابة لاسباب تتعلق بتجنيد العبد لله..ان شاء الله المدونة هتعود للعمل والنشر ومتابعة اخر اخبار الهضبة في كل مكان زي ما كانت واحسن..

وطبعا في فترة وجودي في مركز التدريب كنت عامل زي اللي منفصل عن الحياة مش عارف الدنيا بيحصل فيها ايه وياتري عمرو دياب بيعمل ايه والالبوم نزل ولا لأ وعمل فيلم ولا لسا .. ولما رجعت لقيت كم مهول من الاحداث اللي كانت تستحق الكتابة والتعليق والاخبار اللي كانت لازم تتنشر زي اغاني بتتسرب وحفلات بتتعمل واعلانات وبرامج وحلم وابن عجب وابن جابر وابن الكلب وحاجات تانية من دي كتير...وان شاء الله هيتم الكتابة عن كل شئ في حينه.

من الآخر:
Keep in touch.

جريدة عين الاعلي مصداقية

في استفتاء المدونة عن اعلي مصدر صحفي بيتمتع بمصداقية بين جمهور الهضبة وعاشقي دياب اكتسحت جريدة عين الاستفتاء بنسبة 50% متفوقة علي مجلات كلام الناس ووشوشة وزهرة الخليج اللي اكبر نسبة حصلوا عليها كانت 7% وكانت النسبة دي لمجلة زهرة الخليج ويحسب للمجلة انها تحتل المركز التاني بين الصحف الاكثر مصداقية من جمهور الهضبة علي اعتبار انها مجلة خليجية غير مصرية وثانيا لانها تفوقت في المصداقية علي مجلتين مصريتين المفترض انهم الاكثر قربا والماما بالاخبار..والملاحظ علي زهرة الخليج انها بتغطي حفلات كتير جدا للهضبة في معظم الدول اللي بيروحها وبتسافر وراه اماكن كتير عكس الصحف المصرية اللي بتقتصر تغطياتها علي الحفلات المقامة في مصر وغالبا ما بتقوم بنقل تغطيات الحفلات الخارجية من مجلات تانية واحيانا بيكون النقل ملان اخطاء ومغالطات.

كلام الناس ووشوشة اتعادلوا في نسبة 6% ووشوشة خصوصا كانت من فترة قريبة من اكتر المجلات مصداقية لجمهور الهضبة وكانت متابعة بشكل كبير جدا وبتنافس جريدة عين بقوة لكن في الفترة الاخيرة حصل تحول كبير وبقيت ضد عمرو وياريت بيكون النقد او الهجوم ده صح..بيكون محتوي علي مغالطات كتير للاسف.
النسبة الباقية 30% ودول صوتوا لانهم مش بيصدقوا كلام الصحافة من اصله.

اخر كلمة..جمهور الهضبة مش منتظر ان جريدة تفضل تشيد بمطربها عشان تبقي هي التوب بالنسباله..لكن عارف ايه الصح مالغلط وامتي يصدق ده ويكدب ده..ولو هو بيصدق كلام الصحافة كان زمانه بيكره حاجة اسمها عمرو بس الجمهور مش بينضحك عليه وجريدة عين رغم انها حصلت علي 50% ودي نسبة محترمة جدا الا انها مش دايما بتمدح في عمرو وسبق ورئيس تحريرها يسري الفخراني هاجم عمرو وانتقده علي اختفاؤه الدائم ولمح بالنقد للوك عمرو في البوم الليلادي لكن الناس ما زعلتش وناس كتير اعتبرت ان كلامه سليم وقالت انه ده نقد بناء مش من نوعية الصحفي اللي طلع يقول اغاني عمرو وحشة وانه ما ضافش حاجة للغنا بعد 25 سنة ع الساحة وبعد ما بقي كل المطربين الموجودين فيها نسخ مشوهة منه وتقليد ليه.

محدث3-الهضبة يحيي حفل في البحرين

الهضبة هيكمل مسلسل حفلاته في الدول اللي غايب عنها بحفل في دولة البحرين يوم الجمعة 3 اكتوبر 2008 في حلبة البحرين الدولية.

أسعار التذاكر:
Gen,Admin : BD 30 / Exec. : BD 50 / VIP : BD 100 / Royal : BD 150
اماكن بيع التذاكر: فيرجين ميجا ستورز.

الحفل من تنظيم شركة 'آيبل أند ول'' و رعاية حصرية اعلامية لجريدة الوقت.

الشركة المنظمة بالاضافة لجريدة الوقت الراعية للحفل اعلاميا هيعملوا مسابقة عن عمرو دياب واعماله الفنية والجوايز عبارة عن 10 تذاكر يوميا لحد معاد الحفلة وهيكون فيه قرعة بين المشتركين عشان يقابل خمسة منهم الهضبة ويحصلوا على توقعيه والتقاط الصور التذكارية معاه.

الحفل يلقي اهتمام كبير من كافة المستويات في البحرين وانباء عن احتمال حضور جلالة ملك البحرين للحفل.

هام: تم تغيير مكان الحفل وهيبقي في مركز البحرين للمعارض قاعة رقم 1
اسباب التغيير غير مفهومة لكن في تخبط واضح في تنظيم الحفل.

الهضبة يحتفل مع طلاب جامعة المستقبل

زي كل سنة في نفس الوقت ده الهضبة بيحيي حفل في احد الجامعات الخاصة بمناسبة افتتاح العام الدراسي الجديد وللترحيب بالطلاب الجدد زي الجامعة الامريكية والالمانية والفرنسية والسنة دي هيكون حفل الهضبة في جامعة المستقبل يوم الجمعة 31 اكتوبر 2008.

تم الغاء الحفل.

أذكي مطرب..ولكن

ديما بيقوله انه سبب نجاح عمرو دياب ذكائه ولو اتسأل اي مطرب عن عمرو دياب يقول بيعجبني فيه ذكائه لكن دي مقولة حق يراد بيها باطل وبيهدف من وراها انه سبب نجاحه راجع للفهلوة مش لموهبته او لان صوته حلو..لا الحكاية كلها شوية شطارة وجت معاه كده!

لكن اي نوع من الذكاء ده اللي يوصل بمطرب انه يحتل القمة لمدة 20 سنة وهل طول المدة دي ذكائه ماخانوش ولا مرة؟! وهل الجمهور غبي للدرجة دي هيسمع مطرب عشان هو ذكي؟!..عمري ماشوفت معجب بيقول انا بحب فلان عشان ذكائه..اللي اعرفه انه بيتقال اصل صوته حلو بيختار كلمات حلوة بيعمل مزيكا جديدة انما الذكاء عمره ما هيصنع قاعدة جماهيرية..

الذكاء يوم مايفيد هيفيد في ان مطرب ينزل البومه في معاد مناسب..يعمل حفلة في وقت معين ومكان معين وبسعر يناسب الوقت والمعاد ده..يفيده في اختيار شركة انتاج مناسبة..اختيار اسم للالبوم..لكن ايه علاقة الجمهور بالنوع ده من الذكاء؟!.. ولو جينا نطبق الحالات السابقة من الذكاء علي الهضبة هنلاحظ الاتي:

انه البوماته نزلت تقريبا في كل الاوقات من السنة وفكل المواسم صيف وشتا واعياد وحتي في اوقات الثانوية العامة والامتحانات ومع ذلك حققت النجاح واعلي مبيعات عن البومات نزلت في مواعيد احسن..وفرضا انه عمرو نزل البومه في موسم معين مهو اكيد نازل معاه مطربين تانيين ليه ماستفادوش من الموسم الحلو ده هما كمان وحققوا مبيعات زيه؟!

اما عن حفلات عمرو فهو بيقدم حفلاته في الفنادق الراقية وفي الساحات العامة وفكل الدول من شرق الكرة الارضية لغربها وحفلته بتكون اعلي سعر تذكرة ديما وبتحقق اعلي نسب حضور من حفلات مطربين تانيين باسعار اقل وحفلاته زي البوماته بتكون في كل المواسم.

اما عن اختيار الهضبة للشركة فأكيد الذكاء بيكون ليه دور مهم لكن مهو وقع لتلت شركات وفي التلاتة كان ديما النجم الاول في العالم العربي وبرده كان معاه فيهم مطربين تانيين مانجحوش زيه ليه ولا هما دول ماكنوش عندهم ذكاء..ده غير انه فيه مطربين اتنقلوا مع الهضبة للتلت شركات دول في نفس الفترة اللي كان فيهم ليه ماتقلش عليهم اذكية هما كمان؟!

عمرو فعلا اذكي مطرب عربي لكن الذكاء لوحده عمره ما بيعمل نجم ومحاولة ايهامنا انه هو ده سبب نجاحه الوحيد يبقي نوع من الغباء والسذاجة او الحقد المفضوح..ومهما كان ذكائه فالجمهور مش هيحب مطرب عشان هو ذكي لانه اللي يهمه في المقام الاول موهبته وصوته وشغله وعمرو علي مدار 25 سنة قدم البومات بتضم اغاني مش شوية فوازير والغاز والناس سمعتها وعجبتهم وكسب اعلي شعبية وبقي رقم واحد.

اكيد الهضبة راجع للسينما

الهضبة صرح انه راجع للسينما في المؤتمر الصحفي لروتانا واكد انه عنده نية اكيدة المرة دي وانه ممكن يتعامل مع روتانا فيه وهي ليها اولوية ولو ماتمش هيكون مع اي شركة تانية..ولانه المرة دي كانت مختلفة وفي مؤتمر رسمي حضره صحفيين واعلاميين من كل مكان في الوطن العربي فاستطلعنا رأي الجمهور ودي كانت النتيجة:

50% بالظبط قالوا انه المرة دي اكيد وانهم مصدقين ان عمرو خلاص هيرجع للسينما بجد..والنسبة دي زادت بشكل ملحوظ بعد اتصال الهضبة بيسري الفخراني علي قناة الحياة وأكد انه مضا بالفعل علي فيلمين مرة واحدة مع جود نيوز.
20% كان رأيهم انه كالعادة بيصرح انه راجع او يتكتب كده في الصحف ومايتمش حاجة لانه بينشغل في الحفلات والالبوم الجديد ومش بيلاقي وقت.
14% قاله انه السينما مش لعبة عمرو اصلا ومش المكان اللي ممكن يضيفله حاجة واصبح مش محتاج ليها دلوقتي بعد ما بقي النجم الاول في العالم العربي وهو بعيد عنها من 15 سنة.
13% شايفين انه مش هيشتغل في السينما لاسباب مختلفة غير انه مش هيلاقي وقت.

وفي النهاية فعلا عمرو مضا علي فيلمين مع جود نيوز وهو دلوقتي بيختار القصة والبطلة بس ماتصدقش الا لما تشوف علي شاشة العرض..عشان كل شئ محتمل مع عمرو وممكن يلغي العقد بكرة الصبح.