سكان شارع عمرو دياب مش بيقروا وشوشة ولا بيشوفوا مزيكا

في اطار الحملة الناجحة جدا لمقاطعة كل من يهاجم الهضبة ومنهم جريدة وشوشة بالتحديد..اعلن موقع شارع عمرو دياب مقاطعة قنوات مزيكا وجريدة وشوشة وده نص الاعلان من ع الموقع:

اعضاء موقعنا الكرام
قررت ادارة موقع عمرودياب ستريت مقاطعة كل من قنوات مزيكا و قناة زووم و جريدة وشوشة.

نرجو من السادة الاعضاء التزام بعدم نشر اى موضوعات تخص اى منهم تجنبا لايقاف عضوية من يخالف القرار.

ببساطة كدة ياشباب احنا هنا على الموقع مقاطعين مزيكا و زووم و وشوشة و ممنوع اى حد يكتب اى حاجة عنهم.

موقع شارع عمرو دياب بيضم في عضويته 61 الف و400 عضو ديابي عندهم استعداد يحتلوا وشوشة مش بس يقاطعوها.

للاشترالك في حملة المقاطعة ع الفيس بوك اضغط هنا.

لو بتحب عمرو اشرب اللي بتحبه وقاطع وشوشة

مجلة وشوشة زودتها بجد..وفي العدد الاخير بيقولوا انه عمرو متعجرف وبيتهموه بقلة الذوق علي مواقف ماحصلتش نهائي في افتتاح روتانا كافيه..بشهادة ناس كانت حاضرة.

الصحيفة مش بس بتهاجم عمرو دي كمان بتهاجم جمهوره وكلنا قرينا مقالة فاروق اللي هاجم فيها الجمهور وقال كلام مايطلعش من عربجي ماشي في الشارع.

الجريدة اللي قالت ان تامر انتصر علي عمرو عشان وقع مع شركة بيبسي في عز الحملة الناجحة والمكتسحة لعمرو معاهم وفي ذروة نجاحها واكتساح اغنية الله علي حبك انت الشارع العربي وبداية عرض اعلان طمني..عشان تظهر دعوات المقاطعة لبيبسي وتولوا هما نشر اخبارها في جريدتهم بعد كده والتغطية ليها ..رغم ان تامر ماوقعش لبيبسي ولا حاجة..وحتي لو وقع ايه يضر عمرو في كده وايه المشكلة اصلا؟!
..عمرو ليه اعلاناته وتامر ليه اعلاناته وربنا يوفق الاتنين ويدي كل واحد علي قد تعبه وحب الناس ليه..وبيبسي توقع للي عايزاه..لو بتحب عمرو بجد اشرب اللي بتحبه وماتقاطعش الا اللي بيهاجموا ويكرهوا..الا ياسيدي لو الهضبة قالك قاطع ومش هيقولها.

فضلوا يكبروا في عمرو ويقولوا انه المطرب الاول والنجم وروتانا هتموت عشان يمضي معاها وبتزحف وراه وقرابينهم ليه عشان يوقعلهم.. ويهينوا روتانا لان دي شهادة حق يراد بيها باطل..وكل ده عشان يخلوا روتانا تاخد قرار انها ماتتعاقدش معاه وفي النهاية هيكون عمرو خسر التعاقد مع اكبر شركة انتاج في الوقت الحالي..

ياجماعة الناس دي بتغمي عينكم عن الحقايق وبتستغلكم في مصالحها الشخصية وبتوجه الجمهور في اماكن غلط وللاسف احيانا بيقودها ناس من صحفيين وشوشة بيدعوا انهم من جمهور عمرو.

انا ضد النوعية دي من المواضيع لكن الامر زاد عن حده ولازم وقفة واحدة بجد..
مش عايزين نقري اي حاجة منهم فيها اسم عمرو ولا عايزين نقرا مقالاتهم ع النت..حتي لو هيقولوا عمرو احسن مطرب في العالم..لان دي شهادة حق يراد بيها باطل زي ما قولت.

شعار الحملة دي:

لو بتحب عمرو اشرب اللي بتحبه وقاطع وشوشة

تهنئة بيبسي للهضبة ع الميوزك أورد صفحتين كاملين بالاهرام:

للاشتراك في الحملة اضغط هنا.

الهجوم ع الهضبة قصر ديل

في الاستفتاء اللي خدنا فيه رأي الجمهور عن بعض الفنانين اللي بيهاجموا الهضبة كانت النتيجة:

39% قالوا انه قصر ديل منهم..والمعني واضح طبعا.

وبفرق بسيط 35% شايفين ان السبب غيرة الفنانين دول من نجاح عمرو. .خليها تاكلهم!!

20% قالوا ان الهدف جذب انتباه الناس ليهم..وده اكيد عشان الاضواء تتسلط عليهم..لان اسم عمرو كفيل بانه يخلي الواحد يسيب اللي في ايده ويشوف بيتقال ايه.

وبنسبة صغيرة جدا 4% قالوا ان السبب غباء واندفاع من الفنانين دول..يعني ممكن مذيع او صحفي يسأل فنان سؤال يستفزه عن الهضبة يقوم يطيح فيه هجوم..زي الفنان "القمر" اللي عمرو أديب قالوا ليه عمرو هو المطرب الأول..راح قاله لأ مش الاول وقال كلمتين مالهمش لازمة..وعد كذا مطرب وقال انهم من الاوائل برده ومنهم الفنان ايهاب توفيق وقال انه مطرب كبير وانه من الاوائل وعامل أغنية جميلة..قام عمرو أديب اتريق علي رأيه وعلي اخر اغنية لايهاب توفيق وكان اسمها..ياسلام ياسلام ياسلام ياسلام.

نصيحة لكل المهاجمين: استمروا في هجومكم..خليها تاكلكم..أحيانا بيبقي الهجوم دليل نجاح غير عادي.

استخفاف بعقول ماتعرفش الاستخفاف

جمهور الهضبة اللي هو اكبر جمهور في الوسط الفني كله باعتبار ان عمرو صاحب اعلي شعبية ورقم واحد من سنين طويلة اصبح زي مطربه بالظبط بيتهاجم!!..ولأول مرة نشوف جمهور بيتهاجم لدرجة انه يتشتم عيني عينك كده من بعض الصحفيين المرتزقة..ويمكن جعلها اول مرة راجع للتطور التكنولوجي الرهيب اللي احنا بقينا فيه..وزمان ماكنش فيه نت ولا بريد الكتروني ولا مواقع يقدر الجمهور من خلالها انه يرد علي اي مقالة ماتعجبوش او نقد لفنان بيحبه..يعني دلوقتي كل صحفي عنده بريد الكتروني بيختم بيه مقالته وساعات عنده موقع خاص ممكن تعلق فيه وتقول رايك علي مقالاته وده موجود في كل الصحف اللي ليها مواقع الكترونية..وجمهور الهضبة بالذات مايستحملش كلمة زيادة عن مطربه ولو حصل نقد يسئ ليه وخاصة لو نقد مصاحب بتجريح في شخص الهضبة اوعي وشك ع اللي بيحصل للكاتب..جمهور الهضبة بيعمل هجوم عليه وبيديلوا اللي فيه النصيب ويعرف ازاي يحط الناقد ده في حجمه الطبيعي..لكن المؤسف انك تلاقي الناقد ده بيرد بعدها باهانات لاذعة لجمهور الهضبة وبينزل لمستوي متدني جدا اقل ما يقال عنه انه بيئة لمجرد انه رد وقال رايه في التفاهات اللي كتبها كأنه من حقه هو بس انه ينقد ويجرح في الناس وهو فوق النقد ورايه هو بس اللي صح واي راي مخالف او هجوم عليه بنفس اسلوبه يعتبر من الكبائر..ويمكن ده بيكون راجع للصدمة اللي حصلت للناقد واللي بتفقده توازنه وصوابه لما بيشوف كم ردود الافعال اللي حصلت عليه واللي غالبا بيكون عمره ما شاف زيها قبل كده لانه اتعود ينقد ويهاجم ويشتم ومايتردش عليه..
والكلام ده ليه مدلول هام جدا..ان كاتب التفاهات دي ماستحملش علي نفسه كلمة او تجريح او رد مش علي مزاجه فطاح بالهجوم والشتايم في الجمهور عشان إتجرأ ورد عليه وهو مش متعود ان حد يرد عليه..وناسي انه لما هاجم في الاول سواء كان عمرو دياب او اي فنان اخر انه زيه انسان من لحم ودم وبيتأثر وبيزعل وممكت يتعكنن من الكلام ده وناسي ان ليه اسرة ووالدة وزوجة واولاد بيقروا الكلام ده..واذا كنت مش قابل كلمة زيادة علي نفسك ليه تهين الناس!!!

جمهور الهضبة ياما دخل في صراعات مع اعلاميين دفاعا عن مطربه وعرف ازاي يوصل صوته ويثبت انه جمهور غير اي جمهور بيعرف يرد كويس قوي وجمهور مش متكتف وصوته بيوصل وبيتسمع وبينضربله تعظيم سلام..ومن الصراعات اللي دخلها جمهور عمرو مع الاعلام..منها جريدة روزاليوسف وعمرو اديب والصحفي جمال فياض في زهرة الخليج واخيرا جريدة وشوشة واللي اسلوبها في ادارة الصراع يعتبر الاغرب والاعجب والاكتر سذاجة واستخفاف بعقول ماتعرفش الاستخفاف.

جريدة وشوشة برئيس تحريرها محمد فاروق ديما يأكدوا انهم بيحبوا الهضبة جدا لأ واكتر من جمهوره كمان..وبيهاجمهوا الهضبة اعنف هجوم وبيطلعوا اقوي الاشاعات ولو سألت يقولك من حبنا في الهضبة وحرصنا عليه.. يقولوا انه غنا مع مطربة اسرائيلية وحفلته فشلت واجره قل ونجمه خفت وعقده مع روتانا وحش ومؤامرة فلان علي الهضبة واخبار ياما كلها تسئ لعمرو وده طبعا من حبهم فيه..وجمهور الهضبة ماهتمش كتير بالتفاهات دي لانه عارف انها في النهاية اهي تفاهات وصحف عايزة تاكل عيش وكان تقريبا في شبه مقاطعة للجريدة..والجريدة لانها ايقنت ان جمهور الهضبة مقاطعهم عملوا مسلسل ظريف قوي:
الجريدة عملت حوار مع احد محبي الهضبة تحت عنوان "الدراع اليمين للهضبة ع الفيس بوك"!!..ومن امتي كان الهضبة ليه دراع يمين ومن امتي جمهور عمرو كان ليه متحدث رسمي او شخص بيمثلوا ومين ادالوا الحق ده؟!!!..المدونة دي رغم انه من اسمها انها صوت جمهور عمرو دياب لكن عمرها ماكانت المتحدث الرسمي ليهم او الناطق باسمهم لكن هي مجرد راصد للي بيدور في اذهان الجمهور وارائهم واتجاهاتهم لأني أقل كتير من اني اتحدث باسم جمهور عظيم زي ده وفي كتير أحق مني.

بعد كده الدراع اليمين ده بقي صحفي في الجريدة وبيكتب مقالات فيها..لحد ما جه مقالة هجومية علي عمرو كالعادة بتقول ان تامر هيحتل عرش الغناء لانه وقع مع شركة بيبسي وشوف محتواها المضحك جدا والمتناقض من الملخص التالي:
بيبسي ساعدة الهضبة انه يختصر مشوار النجومية ووسع المنافسه بين مطارديه او (هكذا تخيل) وانضمام تامر هيخليه منافس قوي والنجم القادم علي عرش النجومية..
المقالة استفزت واحد من محبي الهضبة راح مديهم رد بصراحة يلجم أفواه والعدد اللي بعده راح رئيس التحرير محمد فاروق طايح فيه شتيمة وسخرية من اسلوب المقالة ويتهمه انه عيل صغير من غير ما يرد رد واحد منطقي علي المعجب ده..وبالمرة طاح في جمهور عمرو وقال انهم بيحبوه اكتر من جمهوره طبعا..ودي كانت الشرارة اللي خلت جمهور الهضبة يرد ويهاجم في الجريدة..ويجي العدد اللي بعده يظهر الدراع المين يقول في مقالته..انا زعلان زيكم وبحب عمرو زيكم وماعجبنيش بعض المفردات اللي في المقالة وبوجه لوم لمحمد فاروق عليها (علي بعض المفردات يعني) بس جمهور الهضبة كان وحش وقل ادبه وشتمه وشتمني وشتم الجريدة وكل الصحفيين وانا ماكنتش اتوقع انكم وحشين كده..وانتهت المقالة بكلام واضح انه رد علي دعوات جمهور الهضبة بمقاطعة الجريدة انه اذا كان في ناس انتقدت عمرو من الجريدة في ناس بتحبه وبدافع عنه فيها برده يعني ماحدش يخاصمهم بقي!!

وبنظرة عامة ع السيناريو ده..الجريدة حبت تكبر احد الاشخاص وتقول عليه ده الدراع اليمين لعمرو وزعيم جماهيره والمتحدث الرسمي عشان لما تهاجم الهضبة والجمهور ياخد علي خطره يقوموا يقولوا ده الدراع اليمين معانا ويكتب ويقول الناس دي غلطانه والجريدة ماكنش يصح تعمل كده بس جمهور عمرو غلط لما قال وعمل وشتم وكده عيب ياجمهور عمرو ماتعملش كده وانا اهو زيكم و منكم وبحبكم..وترجع المية لمجاريها ويفضل الجريدة هي اللي قلبها علي عمرو وبتهاجموا اعنف هجوما حبا فيه طبعا!!!

جمهور الهضبة زيه زي اي جمهور في الدنيا فيه الحلو وفيه الوحش فيه المحترم وفيه قليل الادب فيه محمد فاروق وفيه يسري الفخراني..ماينفعش تهاجموا وتقول عليه جمهور سئ او قليل الادب لانه مش شخص واحد..لكن الاكيد انه اكتر جمهور مثقف فنيا وموسيقيا والجمهور الوحيد اللي ممكن يقول المزيكا دي نوعها كذا ودي فيها ايقاعات معينة ويكلمك مزيكا وهو فاهم..واذا جمهور الاهلي شتم حكم او لاعب منافس في الاستاد مايبقاش اسوء جمهور في الكورة لان في ماليين غيره بتتفرج برة..

جمهور الهضبة عبارة عن ملايين في العالم كله مالهمش متحدث رسمي ولا حد بيقود الجيش ده ولا الهضبة ليه دراع يمين.

انا مش برمي اللوم علي حد او بقول ان المعجب اللي في الجريدة قاصد اي اسائة عشان كده ماكتبتش اسامي لكن هو ممكن يكون جزء من مخطط لعبته الجريدة وهو ضحية فيه.

لكل صحفيين جريدة وشوشة..جرد نفسك من كونك صحفي في الجريدة واعتبر انك شخص عادي..لو الكلام ده ضيقك يبقي لا انت من جمهور الهضبة ولا انت بتحبوا اكتر من جمهوره الحقيقي.

ههاجمك ياعمرو

ههاجمك ياعمرو ما كله بيهاجمك..ههاجمك عشان انجح واشتهر والناس تتكلم عني..ههاجمك عشان لما مطرب ابن امبارح من مواليد 6 الصبح هاجمك الناس كلها عرفته وقالوا عليه نجم الجيل..ههاجمك واحول المدونة بالانجلش عشان انت عالمي ،اقوم ابقي واد (مهاجم) عالمي والعالم يكتب عني ويقول اللي هاجم عمرو اهو ويمكن يجيلي عقد احتراف في ريال مدريد اصلهم محتاجين مهاجم.

هكتب عنك وعن فشلك طول 26 سنة الحظ (والحظ بس) اللي ساندك عشان تقدر تستمر المدة دي ..شعبيتك دي مجرد وهم وبتعتمد ع المراهقين اللي هيفضلوا مراهقين رغم انك بتغني من يجي كتير قوي واللي بيسمعلك من اول ماظهرت من 20 سنة مثلا لسا مراهقين مش بيكبروا وهيفضل يتقال علي جمهورك مراهقين حتي لو فضلت ع الساحة 50 سنة هيفضل اسمك مطرب المراهقين واللي سنهم بقي فوق الخمسين برده مراهقين..مهو في حاجة اسمها مراهقة متأخرة يعني.

هتكلم عن لوكاتك وحركاتك وسنك وهقول انك بتعمل عمليات تجميل عشان لسا محافظ علي شبابك وبتلعب رياضة..ماتلعبش رياضة عشان سنك يبان ..وبمناسبة سنك مش ناوي تعتزل بقي سنك بقي 47 سنة ايه يعني الناس بتموت فيك وبتحبك ولو اعتزلت سوق الكاسيت ممكن ينهار وايه يعني لما الفن المصري يتراجع قدام اللبناني واللحم الابيض المتوسط المميز ليه ولا ايه يعني حتي لو اتراجع قدام الخليجي حقهم يشموا نفسهم شوية..ايه يعني عمرنا ما سمعنا عن مطرب ناجح شوية زيك كده اعتزل..عبد الحليم وام كلثوم وعبد الوهاب رحلوا وهما كانوا لسا بيغنوا وبعضهم كان قرب ع الستين هتبقي انت اول واحد ناجح يعتزل..وبعدين ما لعيبة الكورة بتعتزل.

لقبك مش حلو ايه كلمة الهضبة دي سمي نفسك اسم قريب من لقب العندليب مثلا وتبقي العصفور الكاسر او الصقر النونو ولا سمي نفسك زي كوكب الشرق ويبقي اسمك نيزك الشرق ولا مجرت الشرق او عطارد الارض...المهم ان لقبك مش عجبني..حلينا كل حاجة في الفن ومش ناقص غير لقبك اللي انت اصلا عمرك ما فكرت فيه ولا اهتميت بتفاهات زي دي وهو ده عيبك وسر هجومي عليك لان كل النجوم بيسموا نفسهم القاب ويدوا نفسهم اسامي وانت استنيت لما الناس هي اللي طلعت عليك اسم يعبر عن مكانتك اللي ماحدش مقتنع بيها غير جمهورك القليل قوي قوي ده.

اخيرا انصحك انك تبطل تشتري الميوزك اورد لانها بتتاخد عن اعلي مبيعات في الوطن العربي وانت مبيعاتك يعني مخسعة ديما وانصحك تشوف لطيفة ونانسي وسميرة سعيد واليسا وكل الناس دي كسبتها ازاي وتعمل زيهم وماتقهمنيش انك بتبيع اكتر منهم وخصوصا ان انت يعني المطرب الوحيد والمصري الوحيد اللي كسبها والباقي (كلهن) مطربات من لبنان وتونس والمغرب..هتفضل تفضح بلدك لحد امتي وتشتري الاورد وتقف في موناكوا وتقول انا بهدي الجايزة دي لبلدي مصر ياعم اعمل اغنية 3 دقايق وغنيلها احسن بدل ماتكسب جايزة عالمية ومهمة قوي كده والعالم كله بيشوفها وتقول مصر والعالم كله يسمعها بتتردد وبتجلجل.

اقولك حاجة عشان زهقت منك..بطل غنا بطل غنا.

ع الماشي

شيرين بتقول ان عمرو بيعتمد في اغانيه علي الموضة انما هي بتعتمد علي الاغاني اللي بتعيش مع الناس وفي حفلات الهضبة الاخيرة في المغرب والاردن والكويت الجمهور كان حافظ كل اغانيه وبيرددها معاه من اول اغنية ميال اللي نزلت سنة 89 الي اغنية نقول ايه سنة 2007..ولما شوفت اخر حفلاتها في مصر الجمهور يادوب كان حافظ اغانيها المصورة.

بعد رحيل اغلب نجوم شركة عالم الفن وانضمامهم لروتانا والبقية في الطريق اتوقع اختفاء الشركة من ع الساحة الغنائية خلال عامين.

في برنامج القصر مع مصطفي قمر واضح انه كان عايز يقول من الاخر الهضبة مش عالمي لمجرد انه اغانيه بتترجم برة او انه بيشتري جوايز..كنت هوافقه الرأي لو ماكنتش شوفت الحلقة ال 12 من برنامج الحلم..بالمناسبة حلقة كرومبو كانت جامدة واعتقد انه مصطفي استفاد من شعبية كرومبو وكسب جمهور جديد.

اصالة هاجمت الهضبة علي برنامج الحلم وقالت انه برنامج سئ ومش من الطبيعي ان حد يتكلم عن نفسه بالشكل ده ويقول انه الاول ويفضل يمدح في نفسه ولما اتسألت اذا كانت شافته قالت لأ!!!!!! ..وللتوضيح الهضبة ماكنش بيظهر الا وهو بيحكي عن ذكرياته مع الاغاني والاحداث الفنية اللي عاشها وماقلش كلمة حلوة عن نفسه..اللي قال انه الاول ومالوش منافس كان قمم وعباقرة المزيكا في الوطن العربي من مختلف الاجيال..ودول بقي رأيهم أهم منك.

في احد تصريحات حلمي بكر قال ان عمرو نجم جيله وهو الاول ومالوش منافس لكن لو كان موجود في زمن حليم وام كلثوم وفريد وعبد الوهاب ماكنش هيقدر ينافسهم او يوصل للوصله..علي فكرة كلامه صح بس لو كل دول ظهروا في زمن عمرو ماكنوش قدروا بنافسوه.

لو كنت مطرب وعندي جمهور زي اللي عند عمرو..بيدور علي كل ما يثبت نجاحي وعالميتي بالدلائل ويرد ع الهجوم اللي بتعرضله كنت حطيت جزمتي في وش كل اللي بيهجموني واقولهم..قماااااااان.

Download اقوي المانشيتات في تاريخ الهضبة

كنت عملت فيديو جمعت فيه "اقوي المانشيتات في تاريخ الهضبة" او زي مانا سميته..خصوصا انه اكيد مش هو ده بس كل اللي اتكتب عنه طول تاريخه لكن هو ده اللي قدرت اجمعه واحطه في ملف صوتي يظهر بشكل مناسب بدون مط وتطويل ورغي ع الفاضي.

الفيديو ده حقق نجاح كبير جدا ماكنتش متوقعه نهائيا وحقق نسبة مشاهدة 18,550 لحد اللحظة دي وانتشر علي مواقع كتير وع الفيس بوك.. ووصلني رسايل كتير جدا بتطلبه مني وعشان كده قررت انزله النهارده ويكون متاح للدونلود وكذلك الريمكس المصاحب للفيديو لانه في ناس طلبته وهو من اعمال:
DJ Hima

لمشاهدة الفيديو..اضغط هنا.
لتحميل الفيديو..اضغط هنا او هنا.
لتحميل ريمكس نقول ايه..اضغط هنا او هنا.

الهضبة من أقوي 100 شخصية عربية لعام 2009

كالعادة وفي كل مرة بتختار فيها مجلة أرابين بيزنس أقوي 100 شخصية في الوطن العربي لازم نلاقي فيها اسم عمرو والسنة دي احتل عمرو فيها المركز 46 كأول مطرب في الترتيب وبفارق 17 مركز عن صاحب المركز التاني تامر حسني..واحتل المركز الخامس من مصر.

مبررات أختيار الهضبة في التصنيف كانت كالتالي:
يعد الفنان المصري عمرو عبد الباسط عبد العزيز دياب علامة فارقة في الموسيقى العربية، خاصة بعد أن ساهم في وصولها إلى العالمية عن طريق سلسلة من أنجح الأغاني التي لاقت صدى لافتاً في مختلف دول العالم حتى بين الشعوب غير الناطقة باللغة العربية.

وحققت ألبوماته مبيعات هائلة وترجمت كثير من أغانيه إلى عدد من اللغات أهمها الإنجليزية والروسية والكرواتية والبلغارية والتركية والألبانية والهندية. وهكذا يكون عمرو دياب أول مطرب عربي ينجح في منح الأغنية العربية موطئ قدم على ساحة الغناء العالمية.

تميز عمرو دياب بتجدده في أغانية وإدخاله آلات جديدة في موسيقاه وحصل على جوائز عديدة خلال مشواره الفني، من أشهرها «ورلد ميوزك أورد» 3 مرات عن أعلى مبيعات في الشرق الأوسط أعوام 1998، و2002، و2007، ومن الجدير ذكره أن العمر الفني للفنان عمرو دياب يزيد عن 25 عاما منذ ظهور أول ألبوم له بعنوان «ياطريق» عام 1983.

هيتسرب يعني هيتسرب

كل الاجواء المحيطة بالالبوم الجديد بتقول انه هيتسرب يعني هيتسرب تجيلها يمين تجيلها شمال هيتسرب..الموضوع مابقاش محتاج ذكاء او تخمين او استطلاع رأي...كل المؤشرات بتقول انه هيتسرب.

طول فترة الاعداد للالبوم ده اتسرب اكبر كمية اغاني في تاريخ عمرو وتاريخ الوطن العربي وعدد ماحصلش قبل كده بداية من مقطع اغنية لو قادر اللي نزل ووقتها قولت انها هتتسرب كاملة قريب جدا لان اللي معاه المقطع معاه الاغنية وبالفعل بعدها بفترة اتسربت وتلاه اغنية حنية الدنيا.
المشكلة مش كبيرة لحد دلوقتي لان التسريب وارد خصوصا ان الاغنيتين من تسجيلات قديمة وياما حصلت مع عمرو انه يتسربله قبل او بعد كل البوم اغنية او اتنين مانزلوش قبل كده..المشكله ازاي الاغاني دي وصلت لايد المسربين.

المشكلة بجد لما اتسرب مقطع من اغنية طمني وعمرو بيسجلها في الاعلان الجديد ودي كانت بداية دوامة التسريبات اللي تتعلق بالالبوم..بس يلا اهو مقطع والاعلان كده كده هيتذاع وهتتسمع رغم انه اتذاع من ايام قليلة بعد تسريبها ب 5 شهور !!!
بعدها اتسرب مقطع اغنية الله علي حبك انت وعمرو بيسجلها في الاعلان الجديد برده..ودي ماكنتش عادة عمرو انه يسجل اغاني جديدة في الاعلانات قبل مالالبوم ينزل ولازم يهتم بالنقطة دي الفترة الجايا..وكده يبقي ده تاني تسريب من الالبوم.
المميز بقي قوي قوي واللي يخليك تندهش لانها لاول مرة في التاريخ ان اعلان اغنية طمني اتسرب علي النت قبل اذاعته بما لا يقل عن شهر بجودة عالية وكامل..عمرك شوفت مطرب بيتسربله اعلان؟!

عموما تسريب مقاطع طمني والله علي حبك انت كان لتسجيلها من مدة وركنها علي الرف لفترة طويلة علي ما يحين وقت اذاعتهم حسب الخطة الموضوعة من شركة بيبسي ونتمني انهم مايتسربوش كاملين بعد كده زي ما حصل مع اغنية لو قادر.

بعد كده العملية دخلت في الغويط واتسرب 4 اغاني دفعة واحدة من الالبوم وهما: ليه والا حبيبي وماكنتش ناوي وبعدت..وطبعا كانت صدمة كبيرة لعمرو خصوصا انه كان لسا ماسلمش الماستر لانه كالعادة بيتسرب بعد ما بيسلمه لروتانا..لكن الاغاني قالوا انها كانت زي بروفات ومش في شكلها النهائي وبكواليتي سئ و لو نزل منهم حاجة هيبقي بتوزيعات تانية وبكواليتي احسن..بسيطة.

من يومين تلاتة بقي اتسربت الاغاني بشكلها النهائي وبجودة عالية ماعدا الا حبيبي وتأكد خروجهم من الالبوم وعلي اي حال ادينا مستنيين اغنية الا حبيبي بكرة تتسرب هي كمان.

بالاضافة لده ماننساش اللي حصل في اخر البومين لعمرو مع روتانا كمل كلامك والليلادي اللي اتسربوا ع النت كاملين بكواليتي عالي وبالكافرات بتاعتهم وكان ناقص ان اللي سربهم يروح لكل بيت في مصر يديله نسخة.

كل المؤشرات دي بتقول انه لاجدال في ان البوم عمرو دياب هيتسرب يعني هيتسربب.

ما لا تعرفه عن محسن جابر

اللي يتابع محسن جابر وعلاقته بالفنانين اللي في الوسط يقدر يعرف كويس جدا انها علاقة بيحكمها المادة وتصريحاته ديما بيتحكم فيها المال.. واذا كنت النهارده معاه وبتجبله فلوس يبقي انت حبيبه وانجح مطرب في الوطن العربي واذا سبته وبعدت عنه يبقي دي نهايتك وبداية السقوط والفشل والتصريحات النارية ضدك وده حصل مع اغلب الفنانين اللي سابوا شركته لدرجة انه لما زهق من التصريحات راح عامل شخصية وهمية اسمها ابن عجب علي قنواته تخبط في كل الفنانين اللي سابوا شركته.

وعن علاقته بعمرو فالملاحظ في كلام محسن جابر ديما وتصريحاته عنه انها ديما متناقضة وبتبقي علي حسب رضاه عن عمرو والغريب انها بتكون مختلفة 100% وتستغرب لما تعرف انها طلعت من شخص واحد وهنستعرضها بالدلائل كالتالي:

الخلافات بدأت لما انتقل عمرو من عالم الفن لروتانا وكانت صدمة كبيرة لمحسن جابر واضح انها اثرت عليه وافقدته توازنه فطلع بعدها بتصريحات نارية يهاجم فيها عمرو لدرجة انه أكد ان عمرو هيختفي من الساحة خلال عامين "خدوا بالكوا من كلمة خلال عامين دي اصل الحوار ده كان سنة 2003"

والغريب ان لما اتوجه سؤال عن كلام محسن جابر لراغب علامة في نفس المجلة كان رده مختلف وعقلاني:

وواصلت المجلة الحوار بسؤال جميل وكان رد محسن جابر مضحك جدا :

والسؤال دلوقتي بعد انتهاء البرنامج من سنين ايه هو اسم النجم ده خصوصا ان مفيش واحد طلع منه وحقق النجاح الكبير وكام اسم من البرنامج موجود ع الساحة دلوقتي وكام واحد منهم مع عالم الفن !!!

ورفع محسن جابر قضية علي عمرو لفسخه العقد معاه وانتقاله لروتانا واللي بدأ لاعداد اول البوم ليه معاها "ليلي نهاري" ولان محسن عايز يقضي علي عمرو حاول علي قد ما يقدر انه يمنع نزول الالبوم لكن فشلت كل محاولاته ونزل الالبوم وكسر الدنيا

واستمرت القضية في المحاكم فترة طويلة وفي احد المرات وعمرو بيتصل بعمرو مصطفي قاله انت فين رد عمرو مصطفي وقاله عند محسن جابر في المكتب فطلب منه يديله محسن جابر يكلمه واتفق معاه علي صلح ودي بعيد عن المحاكم ودفع تعويض مناسب لمحسن جابر وتم اللقاء في مكتب محسن جابر وحصل الصلح بين الاتنين في حضور د/حسام لطفي محامي عمرو

بعد الصلح انتشرت اشاعات قوية عن حتمال عودت التعاون بين الهضبة ومحسن جابر وعن احتمال فسخ عمرو عقده مع روتانا ورجوعه لعالم الفن ويظهر ان محسن جابر نفسه افتكر كده واعتقد ان عقد عمرو الجاي هيكون معاه ان ماكنش دلوقتي علي الاقل بعد نهاية عقده مع روتانا

والغريب ان بعد عودة العلاقات تاني بينهم والصلح اللي تم اتغيرت تصريحات محسن جابر تماما ونسي انه قال عن عمرو انه هينتهي خلال عامين او انه مش هينجح زي حليم وانه سبب نجاحه انه بيتنطط ع المسرح وفي حواره مع مجلة عين ديسمبر 2006 دافع محسن عن عمرو لما اتسأل اذا كان تامر وحماقي هيقدروا ينافسوا عمرو او يخدوا مكانه:

وفي حوار تاني اكد علي نجومية عمرو لما اتسأل نفس السؤال وكان رد اقوي وكأنه بيرد علي نفسه لما هاجم عمرو وقال انه هيختفي من ع الساحة خلال عامين وانه مش زي حليم رغم تشبيه بيه في المانشيت اللي فوق ردا علي السؤال المتعلق بتامر وحماقي وده كان مع بداية مشكلة برنامج الحلم

ومع قرب نهاية عقد عمرو مع روتانا بدأ محسن جابر يغازل عمرو ودخل معاه في مفاوضات غير مباشرة وبعد مانتهي العقد زاد الغزل في عمرو وعمل محسن جابر برنامج بيحكي فيه قصة حياة عمرو دياب من حلقتين وبعدها برنامج عن الميوزك اورد ونال عمرو منه الكتير من الكلام وطبعا كل ده بيدخل فلوس للشركة..وعمرو هو الفنان الوحيد اللي عالم الفن فضلت تستفيد من وراه الملايين سواء في وجوده او عدم وجوده معاهم..وبعد ما اعلن عمرو عن الحلم وتنفيذه ليه بدأ محسن جابر يطلب من عمرو فلوس مقابل اذاعة اغانيه مع عالم الفن في البرنامج وكان لسا محتفظ بهدوئه في التصريحات

ومع مرور الوقت وقع عمرو العقد مع روتانا لمدة 5 سنين عشان تبقي تاني صدمة لمحسن من عمرو بعد ما كان منتظر توقيعه ليه وطبعا بدأ محسن جابر يتغير تاني تجاه عمرو زي بالظبط ماتغير لما ساب الشركة اول مرة وبدأت قنوات مزيكا تهاجم عمرو من خلال الشخصية الوهمية ابن عجب والتجريح في عمرو والهجوم العنيف عليه بكل ما اوتي من قوة واختراع اشاعات واخبار كاذبة تسئ لعمرو والغريب ان مع زيادة رسايل ابن عجب زادت رسايل المعجبين علي شات مزيكا وكلها بتأيد عمرو.

واخير ظهر الحلم واتذاع علي روتانا والتليفزيون المصري وفيه اغاني عمرو مع عالم الفن ولقاه محسن جابر فرصة يرد بيه القلم لعمرو وبدأ محسن جابر يهاجم عمرو هجوم عنيف والغريب ان تصريحاته ماتغيرتش عن اول مرة ونفس التصريح لمجلة "لها" فبراير 2009

نفس التصريح السابق تقريبا كأنه حافظ ساعة الهجوم هيقول ايه بالظبط وازاي يبتذ اللي قدامه بأي شكل ..واتهامات لعمرو انه عامل عمليات تجميل وحرص عمرو ع المادة لان نجوميته قربت تنتهي بعد عامين طبعا..

وزاد الهجوم المرة دي وتنازل جزئية جديدة عمره ما تناولها وهي الميوزك اورد

محسن جابر يناقض نفسه وبيقول انه ادي الميوزك اورد لعمرو وانه سبب فوزه بيها لانه كان علي خلاف مع وردة اللي كان هيديهالها ويحسن عليها بيها بدل عمرو بس هي كانت مخاصماه .. واوعي تستغرب لما تقرا كلامه ده من حواره لمجلة عين ديسمبر 2006 عن الاورد وتأكيده علي انها لا تحتمل التشكيك ومبيعاتها موثوقة من جهة محترمة مش بالترشيح منه او من غيره

وأكد نفس الكلام ده في حوار ليه مع نجوم اف ام سنة 2004 يعني بالدليل الصوتي..للاستماع اضغط هنا.
هو نفسه محسن جابر اللي ظهر في احد البرامج وقال ان عمرو رفض ياخد الميوزك اورد لما انطلب منه فلوس مقابلها وكان وقتها عمرو متعاقد لسا مع روتانا وكسبتها اليسا..للمشاهدة اضغط هنا.

هو ده محسن جابر وهي دي تصريحاته عن عمرو مؤكدة بالصوت والصورة وقمة التناقض في الرأي والتصريحات والتأكيد علي سقوط عمرو خلال عامين سنة 2003 ونفس التصريح سنة 2009..واللي قامت مجلة عين بعمل تحقيق صحفي تاخد فيه راي مجموعة بارزة من كبار الموسيقين من اجيال مختلفة في كلام محسن جابر وده اللي هختم بيه المقالة دي...ما لا تعرفه عن محسن جابر..ويارب تكون عرفته..