هات ودنك..وخدها تاني

منتج ماكنش حد يسمع عنه غير لما الهضبة راح شركته اسمه "محزن غابر" طلع في مرة يعيط علي ضياع تراث حليم وشراء شركة خليجية ليه وديما يقول انه عايز يحافظ ع الفن المصري وننقذه من ايد روتانا اللي بتحاول تقضي عليه وبتاخد نجومنا المصريين وبتجمدهم .. في نفس الوقت اللي قناته بتهاجم كل الفنانين المصريين الكبار جدا وبتسئ ليهم بأبشع الكلام ..وبيقول علي مطرب مصر والوطن العربي الاول انها راحت عليه وعجز وعمل عمليات تجميل، ده غير انه رافع عليه قضية..وبيطلق علي مطربة مصر الاولي أنغام اسم ألغام وكل يوم يجرح في حياتها الخاصة..ومطربة مصر الواعدة جدا شيرين والقادمة لاحتلال الساحة كأول مطربة بلا منافس كل كام يوم يجرح فيها ويشتمها وبرده رافع عليها قضية..محمد فؤاد بقي اسمه علي القناة محمد فخاد وصوته حشرج وتخن وبقي وحش..وكذلك حكيم المطرب الشعبي الاول واللي عمل حاجة كويسة للفن الشعبي ع المستوي العالمي اتهاجم علي نفس القناة...يعني مش سايب كل الفنانين المصريين في حالهم بين قضايا وتجريح في شخصهم وحياتهم واهانة ويقولي الفن المصري...اللي اختشوا ماتوا.

في الايام الجايا في ألبوم نازل لأحد المؤديين بيقول في اغنية من اغاني الالبوم: "ياحبيبتي انا خونتك امبارح"..بلاش قلة ادب وسفالة بقي ولم نفسك.

في اواخر التمنينات نزل البوم لولاكي لعلي حميدة وكان مكسر الدنيا وفي نفس الفترة نزل ألوم ميال للهضبة ومن بعدها اختفي علي حميدة..وراغب علامة اعترف بفشل ألبوم حبيبي ياناسي عشان نزل مع ألبوم الهضبة نور العين ..وفؤاد كان من اشد المنافسين في طريق الهضبة لكن انتهت المنافسة دي وتفرد الهضبة بالقمة بعد نزول ألبومه تملي معاك مع البوم القلب الطيب لفؤاد..وفي الايام الجايا دي هينزل ألبوم مطرب "ما" فاكر نفسه منافس للهضبة بس خلاص شكله هيوحشنا وهتنتهي اللعبة اللي اخترعها من اول ما طلع عشان ينجح بأسرع الطرق.

المطرب القمر بعد ما طلع وهاجم الهضبة طلع في حلقة مع كرومبو..والمطرب الحبسجي بعد ما هاجم الهضبة طلع في حلقة مع كرومبو..شوفتوا اللي بيهاجم الهضبة بينجح وكرومبو بيطلبوا في عمل معاه ازاي ..واهي كلها ارزاق!

استنوا حلوة الايام.

حلوة الايام قريبا

ألبوم الهضبة المنتظر يوم 14 يونيو هيكون اسمه "حلوة الايام".. الدعاية والبوستر وتفاصيل الالبوم خلال الساعات القادمة.

فريق عمل اغنية حلوة الايام:
كلمات: خالد تاج الدين
ألحان: عمرو دياب
توزيع:حسن الشافعي

رد الهضبة علي اتهامات راغب علامة

اتنشر في كل وسائل الاعلام علي لسان راغب علامة انه بيتهم الهضبة بتسريب ألبوماته كل سنة عشان يستخدمها في الدعاية للألبوم وأكد إن النوع ده من الدعاية من أذكى أنواع التسويق للأعمال الفنية، ونتيجته مضمونة عند الجمهور!!!!

الغريب ان كلام زي ده يطلع من راغب علامة اللي كان في يوم من الأيام من الفنانين "الكويسين" اللي ع الساحة ورغم انه مطرب برده وليه ألبومات بتنزل وأكد حسب كلامه ان النوع ده من أذكي أنواع الدعاية وكمان نتيجته مضمونة .. طيب ليه ما بتعملهاش؟!!!

ولنفترض ان الهضبة فعلا هو اللي بيسرب (مجرد فرض) فنحييه علي ثقته في نفسه انه بيدي الالبوم للناس قبل ما ينزل ومتأكد انهم برده هيشتروه وهيحقق اعلي مبيعات كالعادة .. واتحدي لو راغب علامة قدر يستخدم النوع ده من الدعاية لانه أكيد للكبار قوي قوي قوي فقط.

السؤال ده اتسأل للهضبة في حفل توقيع عقده مع روتانا لان الاشاعة دي انتشرت بقوة بعد تسريب ألبوم الليلادي وهو رد عليه باستفاضة ومن أهم النقط في رده :
-الصحفي محمود معروف قال اذا كان امتحانات الثانوية العامة بتتسرب وعمرو قال يبقي أنا برده.
-الهضبة أكد انه مش من مصلحته نزول الألبوم بالمجان.
-مفيش أي منطق يخلي فنان يعمل كده.
-د/حسام لطفي نفي تماما وأكد انهم رفعوا قضايا وتم القبض علي بعض المتسببين في التسريب.
-الهضبة قال انه بيتسربله ألبومات من أول ميال لكن التكنولوجيا الموجودة حاليا خلتها ظاهرة.

شاهد رد الهضبة باستفاضة :

تسريب الألبوم متوقع وطبيعي

زي ماكنت متوقع وقولت ان الالبوم هيتسرب يعني هيتسرب بناء علي مجموعة من المعطيات والمؤشرات والظروف المعتادة في كل ألبوم للهضبة..الجمهور صوت في الاستفتاء وقال رأيه في نفس الموضوع انه ده الطبيعي بنسبة 52% وكالعادة هيتسرب.

27% قالوا التسريب مستحيل المرة دي..ويارب يطلع عندهم حق.

19% قالوا مش عارفين وماعندهمش توقع معين.

محدث-ألبوم الهضبة 14 يونيو

معاد الالبوم القادم للهضبة اتحدد رسميا يوم 14 يونية..انتظروا قنبلة جديدة في دنيا الفن..
مبروك لكل الديابين.

الالبوم ماسموش "حنية قلب" زي ماتنشر في بعض وسائل الاعلام..ولم يتم الاعلان عن اسم الالبوم او الاغاني بعد.

قراءة في كواليس ما قبل صدور الالبوم

هتنزل صورة البوستر بكواليتي مش تمام قبل صدور الالبوم باسبوع ونص علي الاقل.

هتنزل صور للمطرب العالمي (قمبورة) بعد تعديلات مستميته فيها عشان تشبه صورة بوستر عمرو ويتقال ان عمرو بيقلد قمبورة.

هيتسرب اغاني الالبوم كمقاطع وغالبا ما بتم بعد ما الهضبة يسلمها لشركة المحمول اللي كل موظف فيها بيديها هدية لصحابه قبل نزول الالبوم لزوم الرسم والمنظرة.

تسريب التصميم الاصلي لغلاف الالبوم..وروتانا هتقول مش احنا رغم ان هيكون عليه لوجو الشركة اللي بيتحط عن طريقهم مش عن طريق المصمم بتاع الغلاف.

بعد 6 ساعات كل المنتديات علي وجه الكرة الارضية هتحمل عنوان واحد في صفحتها الرئيسية: "نزل ألبوم عمرو دياب حصريا هنا وبس"..بما فيها منتديات الفنانين لزوم الدعاية وجذب الناس للاشترالك في مواقعهم عشان ينزلوا الالبوم واهوا في النهاية هيتعدوا من محبي الفنان صاحب السايت.

هيختاروا اغنية فيها مزيكا بستايل معين وليكن (تانجو) ويتقال ان عمرو سرقها من المطرب العالمي الاخر (شفطورة) اللي عمل اغنية تانجو في يوم من الايام.

روتانا برده هتقول مش احنا اللي سربنا الالبوم رغم انه كالعادة مش بيتسرب الا لما يستلموا الماستر ..لكن برده موظفين روتانا بيدوا الالبوم هدية قبل نزولوا لقرايبهم عشان تبقي منظرة اتقل من بتوع شركة المحمول.

رامي جمال يوضح وتقليد تامر عرض مستمر

في آخر حوار لرامي جمال مع موقع في الفن اتكلم عن عمرو وتقدر تسمع كلامه في الفيديو ده.
وحسب كلامه ان عمرو عصبي في شغله وانه يفضل انه يحبه كمستمع لان التعامل مع عمرو دلوقتي مش هيضيفلوا فنيا..
الحوار زعل محبي الهضبة من رامي لكن هو نزل توضيح علي صفحته في الفيس بوك يشرح وجهة نظره:

عموما رامي قال وجهة نظره باحترام وواضح انه مش قاصد يقلل من عمرو او يهاجمه وبالتالي وجهة النظر دي تحترم لكن خانوا التعبير لما قال ان التعامل مع عمرو مش هيضيفلوا فنيا..وشرحها انه مش هيخليه يشتغل مع مطربين جداد..واعتقد انه هنا يقصد الاضافة المادية مش الفنية..لان الفنية دي حاجة تانية خالص..واللي ما لحنش لعمرو مابقاش ملحن لسا ومادمت مش قادر تشتغل تحت ضغط الشغل بتاع الهضبة يبقي العيب فيك..مش عيب في عمرو..وربنا يوفقك مع اي مطرب تاني بيشتغل تاتا تاتا.

------------------------------

الهضبة أعلن من سنتين و 3 شهور انه هيعمل مشروع لاكتشاف المواهب تحت اسم أكاديمية عمرو دياب وأطلق عليها الأول..وكان اسم مبدأي قابل للتغيير..ومن اسبوعين أعلن الهضبة ان البرنامج هيبدأ في سبتمبر القادم وهيجوب 27 محافظة في مصر..والنهارده وكالعادة ظهر النجم العملاق تامر حسني وأعلن عن برنامج لاكتشاف المواهب اسمه تامر حسني أكاديمي..بعد ما كان أعلن انه هيعمل قصة حياته في برنامج من اسبوعين والواضح ان تامر مش عارف هيعمل ايه ولا ايه..

تامر هيبدأ الاكاديمي بتاعته بدري بدري عشان يلحق يعملها قبل سبتمبر القادم..والمشكلة مش في انه هيعملها لانها (المفروض) هتكتشف مواهب تمورية جديدة وهتفيد الساحة وهتسري الغناء المصري والعربي..المشكلة ان النجم العملاق جدا عاملها عشان يثبت انه فعلا ما يقلش عن الهضبة..وللأسف هو فاهم النجومية كده..طالما عمرو عمل برنامج يحكي فيه مشوار 25 سنة تامر يعمل برنامج يحكي فيه مشوار 7 سنين..وطالما عمرو اول واحد يركب هامر يبقي هو لازم يركب هامر..ولو عمل مشروع اكتشاف مواهب يبقي هو لازم يعمل مشروع اكتشاف مواهب..والموضوع بقي بايخ وأوفر قوي قوي قوي.

الملاحظ انه ديما بيختار انه ينافس الهضبة في مجالات تانية بعيدة عن الغناء والفن والكلمات والمزيكا..خصوصا ان المنطقة دي مش هتجيب همها معاه.

سن عمرو وجمهور تامر

زي ما هو معروف ان شعبية تامر بتتركز علي المراهقين فطريقة تفكيرهم بتبقي محدودة للغايا وقصيرة النظر وغالبا بتبقي لمبررات بيحاولوا يقنعوا نفسهم بيها..ورغم اني ماحبش اتكلم او اكتب عن تامر لتصريحاته النارية وحواراته الاعلامية اللي مش بتخلوا من اسم الهضبة بين تلميحات ساذجة وهجوم عبيط أو كلمة مالهاش لازمة..لكن هتنازل واكتب عنه وعن جمهوره لان الموضوع يخص الهضبة ورسالة تحذير لتامر من جمهوره اللي مالوش امان!!!

تامر ولانه اختار الطريق السهل في النجاح بعيد عن فنه واغانيه وهو النطح في الكبار وعمل شو اعلامي وخلق اشاعات كل كام ساعة..وكان الهضبة جزء مؤثر من المخطط ده..فقدر انه يسيطر علي عقل المراهقين دول ويخليهم يكرهوا الهضبة ونجاحاته لانه صعب علي بعضهم ان الهضبة بيحارب نجم الجيل (اللي انا مش عارف هو انهي جيل) علي حسب تلميحات تامر الدائمة!!

ولما تكلمهم يقولوا احنا كنا بنحب عمرو بس كبر وعجز ومش بيعبر عن جيلنا (المراهقين تقريبا) خصوصا انه مش بيغني كلام زي خليها تاكلك وهي دي ويخربيتك وجابت اهلي واعتذري وببقي نفسي أ.. وطبعا كل دي اغاني بتخاطب شريحة معينة بعينها ومقصود بيها الشريحة دي بالفعل..وكبر سن عمرو هو الشماعة اللي بيعلق عليها بعض المراهقين دول اسباب كرههم لعمرو لانهم مايقدروش يقولوا ان الهضبة مش ناجح او انه فاشل لانهم في الحالة دي هيبقوا بيتغابوا مش محتاجة كلام.

والسؤال المدوي هنا واللي لازم تامر يعتبره رسالة تحذير مهمة لنفسه..تامر سنه 32 سنة يعني فاضله 8 سنين بالكتير وهيتقال عليه عجز ومش بعيد كبر وخرف..ويادوب يلحق يعمل فيهم من 4 الي 5 البومات محترمين او 8 بالكروتة..ياتري ساعتها بعد مايوصل لاربعين سنة جمهوره هيكرهوا وهيقول عليه عجز وهل جمهور تامر مالوش امان بالشكل ده وبيحبه لانه صغير في السن..ومايحبش مطرب انجح منه عشان هو عجوز..هل هيجي اليوم اللي جمهور تامر هيحدفه فيه بالطماطم وهو ع المسرح عشان كبر في السن؟!!

عمرو دياب مش لاعب كورة وهيعتزل..عمرو مطرب والمطرب الاول في الوطن العربي من 20 سنة والجمهور هو اللي بيحدد مين يستمر ومين ياخد بعضه ويقعد في البيت..وشوق الناس ولهفتهم النهارده علي البوم عمرو بيقول ان لسا بدري قوي ويمكن بيقول انه خلاص بقي مستحيل انه يجي اليوم ده في المرحلة دي..لان جمهوره بيعشقه لفنه ولاغانيه المحترمة والراقية اللي بتخاطب كل الاعمار واللي وصلت العالم كله وبقي ليه شعبية في كل شبر في العالم بيستني البومه..وماغناش انجليزي عشان يبقي عالمي..بالعكس ده هو اللي نطقهم عربي من حبهم فيه.

بنت أمريكية بتغني نور العين

الهضبة سافر لندن اليوم

الهضبة سافر لندن النهارده عشان يعمل المكساج للالبوم وهياخد من يومين الي 3 ايام وهيرجع بعدها عشان يختار الاغاني اللي هتكون في الالبوم..اللي متوقع نزوله في منتصف يونية.

محدث1..عمرو دياب أكاديمي في سبتمبر

الاستاذ أحمد زغلول مدير اعمال الهضبة اعلن من خلال صفحته ع الفيس بوك ان معاد عمرو دياب أكاديمي لاكتشاف المواهب في الغنا والشعر والتلحين والتوزيع هتكون في شهر سبتمبر القادم وهتجوب 27 محافظة في مصر.

الهضبة كان اعلن عن الاكاديمي من أكتر من سنتين وكان اسمها المبدأي "الأول"..وسبب التأخير للوقت ده راجع لانشغال الهضبة للاعداد لالبومه وبرنامج الحلم وتتويجه بالميوزك اورد وعمل مجموعة حفلات في مختلف الدول العربية اللي كان غايب عنها..

البرنامج هيتم بالتعاون مع التليفزيون المصري..وفريق عمل عالمي بيضم خبرات اجنبيه ليها تقلها ولجنة تحكيم بتتكون من الموسيقار العملاق عمار الشريعي و الشاعر سيد حجاب وهيلف محافظات مصر بمعدل اسبوع لكل محافظة..وهيكون مذاع علي شاشة القناة الثانية يوم الجمعة من كل اسبوع لمدة ساعة ونص وحلقة يومية مدتها 20 دقيقة.

من المعروف انه كان ظهر من فترة موقع الكتروني اسمه عمرو دياب أكاديمي.