الموقع الرسمي مستواه عالمي

بعد ظهور الموقع الرسمي للهضبة عملنا استفتاء نشوف رأي الديابين في السايت وكانت النتيجة كالتالي:

66% صوتوا لان السايت مستواه عالمي.
19% قالوا كان ممكن يبقي فيه أحسن.
11% كان اختيارهم انه جامد جدا.
2% فقط قالوا ان السايت كويس.

الهضبة في مسلسل تليفزيوني

في مفاجأة كبيرة وغير متوقعة الهضبة وقع علي عقد تصوير مسلسل لرمضان القادم لعام 2010 من انتاج شركة جود نيوز وسيقوم باخراجه شريف عرفة.

المسلسل هيتضمن مجموعة أغاني جديدة للهضبة وهيبدأ تصويره في يناير القادم .. وهيعقد مؤتمر صحفي الشهر المقبل يُعرض فيه تفاصيل العمل وباقي أبطال المسلسل.

قال فاكرينك تتصدر طلبات الديابين

معروف عن الهضبة انه ديما بيغني أغاني جديدة في حفلاته وفيها اللي بينزل في الألبومات وفيها اللي مش بينزل وفيها اللي بيروح لغيره من المطربين .. فعملنا استفتاء نسأل فيه الديابين عن أغاني الحفلات اللي ماصدرتش ونفسهم يسمعوها بنسخة الاستوديو..ولأن في ناس بتحب أغاني كتير منها وعايزين يسمعوها فالتصويت المرة دي كان مختلف وكان متعدد الاختيارات..عشان كده النسب مختلفة عن كل مرة:

تصدرت أغنية "قال فاكرينيك" التصويت بنسبة 38% وتلاها في المركز التاني أغنية "كان باين من سلامها" بنسبة 33%.

في المركز التالت وبنسبة 24% حصل تساوي بين اغنية عودت قلبي واغنية ياريت سنك يزيد.

في المركز الرابع بنسبة 20% أغنية زي الحلم..في المركز الخامس بنسبة 13% اغنية تعبت انا.. في المركز السادس بنسبة 11% أغنية هقدر أبعد.

قراءة في صحف قديمة ماصدرتش

ما حاولتش تقعد مرة مع نفسك وتسرح وتتخيل ان الهضبة ماظهرش ولا غنا ولا حد سمع عنه خالص؟..ياتري مين من الفنانين كان هيبقي موجود والصحف كانت هتقول ايه عنهم؟..وحال الفن المصري والعربي كان هيبقي عامل ازاي؟..طيب ما تيجوا نتخيل عناوين ومانشيتات الصحف لو كان ده حصل:

جريدة الاهرام: هاني شاكر يبدع بأغاني حليم علي مدار ساعتين بحفله بالكويت.
جريدة الأخبار: اسعار النجوم في الحفلات نار وعلي الحجار الأعلي أجرا بـ 18 ألف جنيه.
مجلة زهرة الخليج: الفن الخليجي ينافس الفن اللبناني علي صدارة الفن العربي..والفن المصري يكتفي بتراث السابقون.
مجلة نادين: الجبل راغب علامة ينافس حبيب الجيل رامي عياش علي صدارة الأغنية العربية.
جريدة الجمهورية: الفنان الكبير مدحت صالح يحصل علي جائزة موبينيل ميوزك أورد ويؤكد انها خطوة هامة نحو العالمية.
مجلة اخبار نجوم: فشل ألبوم "لولاكي" لمطرب مغمور يدعي علي حميدة.
مجلة كلام الناس: متي يحصل نجومنا علي جائزة قارية او عالمية مثل الميوزك أورد؟!
مجلة الجرس: جولة عالمية للفنان العالمي راغب علامة في الصومال والسودان ومدغشقر.
مجلة الكواكب: محمد ثروت يطرح ألبومه بنيولوك مثير للجدل يظهر فيه وهو يرتدي بدلة بدون رابطة عنق.
جريدة الوفد: محمد فؤاد يصور اول فيديو كليب بكاميرة موبيل.
مجلة كل الناس: مصطفي كامل يؤكد للحصول علي جائزة عالمية لابد من الغناء بالانجليزية.
مجلة الشبكة: راغب علامة يصور مشوار حياته في برنامج بعنوان الفيلم.
جريدة المصري اليوم: 12 حالة اغماء ووفاة 3 فتيات بمجرد ظهور حبيب الجيل رامي عياش علي المسرح.
جريدة صوت الأمة: محمد الحلو يقدم في أحدث ألبوماته لون موسيقي متطور يسمي المقسوم.
جريدة الدستور: 17 لحن جديد لحلمي بكر ينتظرهم سوق الكاسيت.
مجلة الاذاعة والتليفزيون: عمار الشريعي يؤكد اننا في حاجة الي طفرة غنائية تواكب روح العصر.
مجلة عين: فنان العرب محمد عبده يتمني ان يري اليوم الذي يغني فيه فنان عربي في اوروبا وامريكا.

منافسة حامية بين التلاتة الكدابين

من يوم ما ظهر الهضبة والأخبار الفشنك والاشاعات اللي بتطلع عنه والهجوم اللي بيتعرضله عامل زي حنفية مابتفضاش وكله بيسرزق من ورا اسمه عشان يبيع او يعمل لنفسه شهرة .. وفيه ناس من الكيانات اياها اللي عدم وجود الهضبة معاهم بيخسرهم فبيشتروا اقلام الصحفيين عشان يهاجموه..وكل فترة بتطلع جريدة تكون هي اللي في الصدارة والمتخصصة في نشر الاكاذيب والاشاعات..فعملنا التصويت ده عن اكتر صحيفة بتنشر أكاذيب عن الهضبة وكانت النتيجة كالتالي:

المنافسة كانت مولعة بين 3 صحف وطول فترة التصويت كانوا بيبدلوا المراكز سوا لحد ماحسمتها في الاخر جريدة الانباء الدولية بنسبة 36% ..المركز التاني بنسة 31% لمجلة الجرس لصاحبتها العجوز الشمطاء نضال الأحمدية..وفي المركز التالت بنسبة 29% لجريدة وشوشة ودي ليها تاريخ وصولات وجولات ومقاطعات مع الديابين.

بنسبة ضئيلة جدا وبعيدة عن المنافسة تماما لجريدة الوفد وحصلت علي نسبة 5% فقط..وصحيفة الوفد تم اختيارها في التصويت بناء علي انها اكتر صحيفة (مصرية) يومية بتهاجم نجم (مصر) الأول.

العالمي يحتل افريقيا

النهارده هيبدأ التصويت علي جايزة الموسيقي الافريقية اللي ذكرنا ان الهضبة مرشح للحصول عليها وأعلن اليوم عن المتنافسين والمراكز اللي بينافسوا عليها ..والهضبة مرشح لـ 4 مراكز دفعة واحدة وهي:

أحسن مطرب ، أحسن أغنية (وياه) ، أحسن فيديو كليب (وياه) ، أكتر مطرب مؤثر فنيا.

التصويت هينتهي يوم 10 أكتوبر وهيكون من خلال رسايل الاس ام اس ومن خلال الموقع الرسمي للجايزة:

http://www.africamusicawards.com

عايزين الهضبة ياخد الـ4 جوايز ومايخسرش ولا تصويت واحد منهم.

اللهم اني صائم

جولة بالريموت كنترول في شاشة رمضان:

نضال الأحمدية بتطالب الهضبة بالاعتزال عشان بقي عجوز وقالت انها بتتعمد تهاجمه وتقهره بكلامها.

الهضبة عنده 47 سنة وانت عندك 46 سنة واللي يشوفكم جنب بعض يفتكر انه ابنك..ومش انت يا جدتي اللي تحددي مين يعتزل والا كنتي احترمتي نفسك من زمان وقعدتي في بيتكم..اما موضوع انك تقهريه او تهاجميه ده كان غيرك اشطر ولو كان انقهر منك او من كلامك كان رد عليكي بس سكوته ده بيقلل منك قوي وبيظهرك بمظهر النملة اللي واقف قدامها فيل وهي بتزعق عشان يسمعها..موتي بقهرك.

عبقري زمانه حلمي بكر قال ان الهضبة مغني مش مطرب..وقال انه ألفة زمنه يعني التوب بتاع الزمن ده..ولما فرق بين الطرب والغناء قال ان الطرب بيليه في المستوي الغناء!!

حد فاهم حاجة؟!..طول عمر الأول في مجاله بيكون من الفئة الأولي عمر ما كان الأول من المستوي التاني..يعني لما نحب نختار أحسن نادي كورة في مصر لازم يكون من الدرجة الأولي بتوع الدوري الممتاز ما ينفعش نادي درجة تانية يتقال عليه احسن نادي في مصر..حاجة من اتنين..يا انت غلط يا انت غلط!!

مخرج برنامج الكابوس قال انه مش بيقلد برنامج الحلم وكتير ما شافوهوش لانه برنامج فاشل.

طيب والعبارة اللي مكتوبة في تترات الكابوس ان التشابه الموجود بين البرنامجين مقصود ومتعمد نظرا لقيمة الهضبة الفنية مين اللي كتبها؟..يعني سرقت البرنامج ونحته بالمللي وحتي طريقة الاخراج والتصوير وتسلسل الاحداث وعرضها والموسيقي التصويرية واللوجو والبوستر والديكور وتترات البداية والنهاية وتقولي ماشوفتش الحلم وكمان برنامج فاشل..انت متأكد انك المخرج؟!

راغب علامة قال ان الهضبة مش منفرد بالقمة لواحده وانه في ناس تانية كويسة وطبعا شكر في نفسه وانه خارج المنافسة.

ياعم حمد الله ع السلامة .. والله ما بقيت اسمع عنك الا كل ما ينزلك تصريح عن الهضبة..انت بطلت غنا ولا ايه؟

أدعية المطربين لرمضان السنة دي الواحد وسطه بقي يتهز وهو بيسمعها..من الطبلة والرق والدرامزات والشغل العالي اللي فيها.

كويس ان الهضبة مانزلش أدعية السنة دي والا كانوا هيقولوا عليه رجعي..أصل لكل مقام مقال.

انذار الهضبة ضد الكابوس ومخرجه المتناقض

مع بداية عرض اعلانات برنامج الكابوس لشخصية سيد ابو حفيظة كل الديابين اعلنوا احتجاجهم علي البرنامج لانه بيسئ للهضبة وبيسخر منه ومن برنامج الحلم لانه ناحت فكرة البرنامج بكل تفاصيله بما فيها طريقة عرض البرومو..فقام أكرم حسني ممثل شخصية أبو حفيظة بارسال بيان بيحمل تقديره للهضبة واسرته ولبرنامج الحلم وان البرنامج لا يتعرضله من قريب ولا من بعيد ولا يمس شخصيته باي صورة.

الهضبة تفهم الموقف وانه مش هيتعرض ليه او لاسرته ورد علي بيان أكرم حسني بانه يرحب بالبرنامج وبيباركله عليه بشرط عدم الاعتداء علي حقوق الملكية الفكرية للبرنامج واتكتبت في البيان بالبنط العريض لان في ناس تعبت عشان تخرج البرنامج بالشكل ده والصورة المبهرة والمستحدثة دي.

واتذاع برنامج الكابوس وهو لا يحمل اي اسائه للهضبة لكن كان ناحت فكرة الحلم بموسيقته التصويرية وديكوره واللوجو بتاعه وفكرته وطريقة تسلسل الاحداث وعرضها..فما كان من الهضبة الا ان قام بارسال انذار للشركة المنتجة لعدم التزامها بما جاء في البيانين السابقين بعدم الاعتداء علي حقوق الملكية الفكرية مستند علي كلام مخرج البرنامج (المغمور) في حواره مع جريدة وشوشة واللي اساء فيه للهضبة وبرنامج الحلم.

وبمراجعة اللي نشر علي لسان المخرج (المغمور) في صحيفة وشوشة ودي صورة توضيحية للحوار اللي نشر في الجريدة:

نلاحظ من الصورة نفي المخرج لتقليد البرنامج رغم ان البرنامج بيظهر في أوله رسالة مضمونها انه التشابه بين الحلم والكابوس تشابه متعمد ومقصود نظرا لقيمة الهضبة الفنية اللي قال في حواره ده انه مابيحبش صوته.

والسؤال هل المخرج (المغمور) ده بيعاني من انفصام في الشخصية يخليه يصرح ان البرنامج مابيقلدش الحلم رغم ان تتراته الرئيسية بتحمل رسالة في اوله انه التشابه متعمد وهي كلمة تعني الكثير؟!!!

طيب لو انت عيان روح اتعالج لكن احنا بقي مش عيانين ولا مرضي نفسيين ولينا عينين ومخ نميز بيهم ونعرف مين بيقلد ومين بيسرق ومين بيكدب ومين مابيفهمش..ياللي مابتفهمش!!

افتتاح الموقع الرسمي خلال ساعات

اخيرا بعد طول انتظار هيتم افتتاح الموقع الرسمي للهضبة خلال الساعات القادمة..

www.amrdiab.net

الهضبة ضحية صراع الأجيال

في استطلاعات الرأي الصحفية او التحقيقات اللي بتعملها الصحف او البرامج او حتي في اللقائات اللي بتكون مع الموسيقيين بنلاحظ ان الموسيقيين المعاصرين من شعراء وملحنين وموزعين بيشيدوا بالهضبة وبيوصفوه انه اسطورة غنائية وانه رقم واحد في الوقت الحالي وصنع لنفسه اسم هيستمر مدي الحياة..وانه سبب استمرار الأغنية المصرية ع القمة..ولما تسمع او تقرا رأي الموسيقيين القدامي تلاقيهم بيقولوا انه مجرد موضة اتجمع حواليها الشباب وانه بمجرد ما يعتزل هيختفي وماحدش هيفتكره وانه مؤدي او مغني محدود الامكانيات مايقدرش يغني الطرب وانه لولا ظهر في عصر الصورة ماكنش حقق اللي حققه ده ولو كان ظهر في زمن ام كلثوم وحليم كان انتهي وماقدرش يكمل.

ومن خلال الرأيين المختلفين تماما واللي عكس بعض كليا نقدر نلاحظ ان في بينهم فجوة كبيرة لكنها مش فجوة فنية او موسيقية قد ما هي فجوة زمنية وصراع بين الاجيال ..الفجوة الموجودة سببها الهضبة بتطوره الموسيقي وتمرده علي الواقع والجمود اللي أخد من الفن العربي اكتر ما اضفله!

موسيقيين السبعينات والستينات اللي عاشوا علي الغناء في الفترة دي وتوقفوا تماما عندها وعينوا نفسهم حماة لتاريخ الغناء والفن العربي وبقوا يرفضوا كل جديد وكان بيزعجهم كل تطور لانه هيكون ضدهم وضد ثقافتهم اللي توقفت عند مرحلة معينة وأصبح اي تطور بيبوظ ادمغتهم ويهنجها تماما وبيقفوا عاجزين قدامه .. فيهاجموه ويحاربوه باتهامه بانه اسفاف وافساد للذوق العام وان التطور ده هيكون مرحلة وهتنتهي وهيرجع الغناء للشكل القديم من تاني..الجيل اللي في نظره ام كلثوم و حليم مستحيل انهم يتكرروا وربما شايفين انه برحيلهم انتهي الغناء تماما ومات ومابقاش فيه اي فن حقيقي والموجود مجرد هبوط فني.

المشكلة اللي بيعاني منها الجيل ده في الموسيقي هي نفس المشكلة اللي بيعاني منها نفس الجيل من الصحفيين الرياضيين اللي في نظرهم كورة السبعينات والستينات كانت احسن فترة واحسن لعب وان محمود الخطيب مستحيل انه يتكرر..وان الموجود دلوقتي اغتراف مش احتراف زي ما بيردد بعضهم.

المشكلة المزمنة والآفة العربية اللي بنعاني منها وبنفضل نبص ورانا بدل ما نبص قدامنا ونطور من نفسنا ونواكب العصر..ونفضل نقول احنا اصحاب حضارة واحنا عندنا الفراعنة اللي عملوا وبنوا وسووا وبنفتخر بأمجاد الماضي السحيق واحنا واقفين محلك سر مش بنعمل ولو عملنا يظهر حماة الماضي ويهاجموا اللي عمل ويتهموه بالاسفاف والابتذال والمصطلحات الجاهزة مخصوص للحالات دي.

اذا كان الجيل القديم حقق ونجح فاحنا ولاد جيلنا بنحب مطربينا وبنسمعلهم وبالنسبالنا هما العظام ومن حقنا ننحاز لجيلنا ما دام من حقكم الانحياز لجيلكم ومن حقنا نشوف الهضبة اسطورة غنائية حقق اللي ما حققوش اي حد قبله وانفرد بانه اول مطرب عربي يوصل العالمية ويبقي ليه شعبية في كل شبر في الارض واغانيه تترجم بكل لغات العالم وبيحصل علي جوايز عالمية ماحصلش عليها اي جيل تاني..واذا كان حجتكم انه لو الهضبة ظهر في جيل الستينات والسبعينات ماكنش قدر ينافس وكان انتهي فأتقل مطرب في جيل الستينات والسبعينات لو ظهر في عصرنا في زمن التكنو والهاوس والريجاتون والترانس ماكنش حقق 1% من اللي حققوا..وماكنش قدر ينافس أفشل مطرب في زمن الألفية التالتة.

ياجماعة شوية موضوعية..كل الفنانين القدامي علي عينا وراسنا وليهم احترامهم انما احترموا فنانين جيلنا العظام اللي بنحبهم علي الاقل قوي لما ينجحوا ولو فشلوا قطعوا فيهم براحتكم.