محمد رحيم وثورة زنجا زنجا

فجأة وبدون مقدمات قرر الشاعر و الملحن والموزع والنحات محمد رحيم أن يثور علي عمرو دياب لانه تذكر فجأة انه غني اغنية "اللي بيني وبينك" من 7 سنين ونزلها بصوته بعد ما غنتها جنات وبحجة ان الثورة هي اللي غيرته وهتخليه يدور علي حقه .. وبالطبع من حق كل شخص انه يدور علي حقه لكن مش من حقه الاسائة لخصمه ويوصفه انه زي أحمد عز وجرانة المتهمين في قضايا فساد وخصوصا لو كان الشخص ده هو اللي عملك باعترافك

 

اللي يدور علي حقه لازم مايبقاش منافق وبمية وش .. النهارده أقول عليك كلمتين حلوين وبكرة كلمتين زي الزفت ، ومافيش حد من الثورة اللي بتقول غيرتك وليكن "وائل غنيم" طلع قال انا و "مبارك" ثمن علي عسل وهو اللي اكتشفني وبعدها طلع هاجمه وقال مبارك سرق مني " لحن!" وبعدين رجع عمله اغنية يراضيه بيها في عيد ميلاده وبعدين يرجع تاني يهاجمه ويقول انا ليا حق عنده من 7 سنين!

آخر تعامل بين عمرو و رحيم كان في ألبوم كمل كلامك سنة 2006 وكان في أغنية "وحكايتك ايه" ومن وقتها والهضبة ماتعاملش معاه تاني ولا دخل معاه استوديو ورغم ذلك كان بيطلع في البرامج ويتسأل عن آخر أعماله في ألبوم عمرو القادم وكان بيقول انه موجود في الألبوم وانه نازله أغنية اسمها "كان باين من سلامها" رغم ان اللحن ده قديم ومن سنة 2004 واتكرر نفس الرد قبل ألبوم "الليلادي" ونزل الألبوم بدون الأغنية وقبل ألبوم "وياه" ونزل بدونها أيضا ولما كان بيتسأل بعد كل ألبوم منهم ليه ماتعاونش مع عمرو يقول احنا ثمن علي عسل والحياة زي الفل بينا وهكون موجود في الألبوم الجاي .. وفجأة اتنشر في الجرايد انه بيهاجم الهضبة لان لحن "بقدم قلبي" بتاعه مش بتاع عمرو مصطفي وبعدها في عيد ميلاد الهضبة يعمله أغنية اسمها "هضبة يا هضبة" !!

بالعودة لأغنية اللي بيني وبينك فهي أغنية اتسربت بالفعل من 7 سنين بصوت عمرو ولكن كان قبل صدورها بصوت جنات عكس ما قال .. ومش هي أول ولا آخر اغنية تتسرب لعمرو زي اغاني كتير اتسربت منها ، يا ناس وعدك وماكنتش ناوي وسبتك وسلمتلك ولو قادر وقايمة طويلة من الأغاني اللي نزلت بدون علم عمرو علي النت بل ده حتي ألبومات عمرو دياب نفسها بتتسرب علي الانترنت كاملة ورحيم نفسه ليه أغاني اتسربت بصوته ،واذا كنا هنتكلم عن تاريخ رحيم مع بيع أغانيه لأكتر من مطرب فالقايمة طويلة جدا ومشاكله مالهاش آخر وللتذكير هذه بعض وليس كل الأخبار عن سلسلة مشاكله:

 

طيب سيبك من ده كله .. حتي والدته الشاعرة إكرام العاصي تأذت منه ومن بيع ألحانه لأكتر من مطرب ورفعت عليه قضية:

محمد رحيم بطبعه غاوي فرقعة وكل سنة يطلع اشاعة زي اشاعة جوازه من اليسا:

واشاعة انه هيلحن لمايكل جاكسون:

  

أظن بعد ده كله نقدر نحكم ونعرف مين اللي بيبيع الأغاني لأكتر من مطرب ومش أول مرة يعمل مشاكل من النوع ده ويتهم المطربين فيها .. وياعم رحيم انت ملحن كويس لكن ماكنش فيه داعي انك تعض الايد اللي اتمدتلك وصنعتك ملحن وترمي الناس بالباطل علشان مصلحتك وتتهم الهضبة بانه زي الناس اللي سرقت أموال الدولة وتأفور وتعمل نفسك ثائر من الثوار لأن زي ما فيه ثورات في تونس ومصر فيه ثائر تاني وده النموذج الأقرب لثورتك الوهمية .. ومش أي ثائر ده قائد الثورة الليبية معمر القذافي اللي قتل شعبه وقالك زنجا زنجا !

الهضبة يشارك في استفتاء تعديل الدستور

ذهب الفنان عمرو دياب اليوم الساعه الـ ٨ صباحاً الي مدرسة بالهرم للتصويت في استفتاء التعديلات الدستورية .. ووقف في طابور الانتظار منتظراً دوره ...

وبدوره حث الهضبة جمهوره أن يذهب اليوم و يعطي صوته و يشارك في بناء مستقبل بلده.

 

الهضبة يلتقي بشباب مصري بجد

يواصل الفنان عمرو دياب متابعته لحملته الخيرية "مصري بجد" حيث إلتقي أمس (علي حسب ما نشر بالموقع الرسمي له) بمجموعة من الشباب المشارك بالحملة ليشكرهم على اجتهادهم فى العمل الخيري وتحفيزهم على مواصله العمل من اجل مصر.

كما التقي الفنان عمرو دياب بفريق عمل "دياب اف ام" للتأكيد علي هدف الحملات الخيري ووضع خريطة للعمل فى حملات الشهر القادم.

لأنه الرمز

بعض الناس اتهمت عمرو بانه من اتباع النظام السابق والبعض اتهمه بالخيانة وكويس ان ماحدش قال انها عمالة لصالح اسرائيل لأن الجلالة لما بتاخد البعض بينسي هو بيقول ايه!  .. وهناك من أسس صفحة علي الفيس بوك بعنوان وداعا عمرو دياب لانه تجرأ وغني لمبارك قبل الثورة ،ويقدر اي حد يلاحظ بسهولة ان الصفحة تم تأسيسها من جمهور أحد الفنانين -اللي الثورة كشفت نفاقهم- لتشويه صورة الهضبة ،  واغلب المشاركين فيها مشتركين لمهاجمة مؤسس الصفحة ووصفه بالجهل وتلويث الثورة بأفكاره السطحية عن الانتماء وحب البلد لدرجة انه لما زهق منع التعليق بالصفحة .. لأنه لو حذف كل اللي بيهاجمه ويهزئه هيلاقي نفسه في الصفحة لواحده فلازم يستقبل الشتايم والهجوم والتريقة وينحي كرامته في جنب عشان يفضل العدد باين انه كبير وان كل دول المؤيدين لرأي الصفحة!

سبق عندما تكلمت عن صمت دياب اثناء الثورة أن شرحت موقف السيدة ام كلثوم الموازي له اثناء ثورة 1952 ، فاذا كان عمرو خائن فماذا عن من غنت للملك وتم منع اغانيها بعد الثورة؟! .. نظرة سطحية وضيقة وتفكير عقيم والحقيقة أن لا عمرو ولا أم كلثوم ولا غيرهم ممن يغني للملوك والرؤساء خائنين لأن قائد الدولة هو رمز للدولة حتي لو كان فاسد او ظالم (وهي أمور نسبية) لأنه الوحيد المخول له بالحديث باسم الدولة ، وشن الحروب باسم الدولة والحفاظ علي كيان الدولة .. اذا فالغناء للزعماء هو غناء وطني في المقام الأول وقد يكون من شارك في العمل من غير المؤيدين للرئيس ولكنه يشارك بدافع حب الوطن واحترام الرمز او علي أسوء الفروض قد يكون مجبرا مضطرا غير قادر علي الرفض .. فالموسيقار عمار الشريعي خرج مؤيدا لرحيل مبارك وهو من قدم له أشهر أوبريت غنائي "اختارناه اختارناه" و شيرين خرجت لميدان التحرير وهي التي  غنت للحزب الوطني وغنت لمبارك "ريسنا ريسنا" و أيضا قدمت له أغنية "بلدي يا غالية عليا" كدعاية انتخابية للرئيس في 2005 .. وهناك من خرج للمظاهرات وشدد علي رغبته في رحيل مبارك رغم انه تم تكريمه منه وكان يتفاخر بهذا التكريم هنا وهناك بل ان أصحاب القوائم السوداء وملوثي الثورة بأفكارهم العنصرية لو كُرم أحدهم من مبارك كان يعلق صورته معه في حجرته ويريها لكل أصدقائه أتعلمون لماذا؟ .. لأنه كان الرمز!

وماذا عن البرادعي والذي يعده البعض من محركي وزعماء الثورة والذي تم تكريمه من الرئيس مبارك لحصوله علي جائزة نوبل وكذلك العالم أحمد زويل وكلاهما يريد الترشح للرئاسة وكلاهما عارض مبارك .. ألم تسألوا أنفسكم لماذا لم يرفضا التكريم من مبارك وهو في نظرهم فاسد وظالم وديكتاتور؟! الاجابة لان التكريم من مبارك هو تكريم من الدولة .. لأنه كان الرمز!

هل عندما وقف الشيخ الشعراوي رحمه الله أمام الرئيس مبارك ليقول كلمته عندما تعرض لمحاولة اغتيال فاشلة كان خائنا ومنافقا أو من أتباع النظام البائد وهو العالم الجليل وقد كان يستطيع ان يرفض ان يقف أمام رجل فاسد أو ظالم ولكنه وقف ليقول كلمة أمام محاولة لتعرض مصر لعملية غدر تهدف الي زعزة استقرارها باغتيال رئيسها .. لأنه كان الرمز!

لا أعتقد ان عمرو ندم يوما علي أي عمل أقدم عليه وهو المعروف بذكائه الفني وحسابه لكل خطوة قبل أن يخطوها ولا أعتقد انه يبالي برأي حاقدين علي نجاحه أو من يريدون أن يكسبوا بنطاً من الثورة علي حسابه بافتعال الاشاعات وشن الحملات لتشويه صورته ، لأن عمرو دياب في الغناء هو الرمز.

ألبوم الهضبة سيصدر العام الحالي

في استفتاء عن امكانية صدور ألبوم الهضبة العام الحالي نظرا لما تمر به الساحة العربية من أحداث وتقلبات ، توقع 56.72% من المشاركين في التصويت أن صدور الألبوم مؤكد.

فيما رأي 28.36% أن صدور الألبوم سيكون صعب .. وبنسبة 14.93% لم يتمكنوا من تحديد رأيهم.

هاجمتني مجلة الجرس فتأكدت أني كامل

عندما لا تعجب الحقيقة البعض وتكون عكس رغبتهم واتجاهاتهم ولا يجدوا رد عليها ،فانهم قد يهاجموك لشخصك للتقليل منك .. وعندما تصل الي هذه المرحلة مع أعدائك إعلم أنك قد هزمتهم واذا جائت مذمتك من ناقص فهي شهادة لك بأنك كامل.

عندما توقفت عن الكتابة بالمدونة ولم يكن هناك متسع من الوقت لأكتب ،وكنت بين فترة واخري اجد اشاعات وأكاذيب فكنت أقوم بارسال رسائل مختصرة الي بعض الصحف اوضح بها الحقيقة ومرفق بها بعض الأدلة و اطلب منهم صياغتها ليتم نشرها باسم الجريدة .. ومن هذه الأكاذيب خبر حصول المغنية اليسا علي جائزة ورلد ميوزيك اورد لعام 2010 عن أعلي ألبوم مبيعاً ،وللتذكير فانه يحسب لاليسا انها كانت احد أهم الأسباب في اطلاق لقب الجائزة المشبوهة علي الورلد ميوزيك اورد بحصولها عليها عدة مرات بوسائل مفضوحة مما أفقد الجائزة أهميتها .. وتستطيع ان تجد علي صفحات الانترنت صور لرسائل اليكترونية متبادلة بين شخصين معروفين (أحدهما من روتانا والآخر من اللجنة المنظمة للجائزة) وهما يتفاوضان علي منح الجائزة لاليسا .. وتستطيع ان تجد أحد الفيديوهات للمنتج محسن جابر وهو يقول انه وصله رسالة علي الايميل تعلن فوز عمرو دياب بالجائزة ولكنهم طلبوا مقابل مادي لمنحه اياها وعندما أبلغ عمرو رفض الحصول عليها بالشراء ففازت بها اليسا في نفس العام!

أما المرة الثالثة لها ولأن الهضبة كان المرشح الأقوي للحصول عليها وهذا ما يعنيني فقط ودفعني لتوضيح الحقيقة بغض النظر عن هوية الفائز ،فقد قمت بارسال رسالة لبعض وسائل الاعلام أطلب منهم نشرها وصياغتها وكان هذا نصها:

السلام عليكم

بعد تأكيد كل وسائل الاعلام المرئية والمقروئة علي تفوق مبيعات الفنان عمرو دياب علي كل منافسيه وانه الأقرب لجائزة الورلد ميوزيك أورد أعلنت ادارة المهرجان عن فوز الفنانة اليسا بالجائزة في صدمة أصابت كل المتابعين ،وحتي لا ندفن رؤوسنا في الرمال نؤكد ان الفنان عمرو دياب هو الأعلي مبيعا والأحق بالجائزة طبقا للآتي:

اولا بلغة المنطق:

ان الفنان عمرو دياب أصدر ألبومه منذ عام تقريبا وتصدر ترتيب المبيعات في الوطن العربي لمدة 3 شهور ومن الصعب ان تتفوق عليه اليسا في المبيعات في 4 شهور فقط وذلك اذا اخذنا في الاعتبار فارق الاسم والنجومية والشعبية !!!

ثانيا وهو الأهم وبلغة الأرقام والمصادر:

* أعلن إتحاد الإذاعة الأوروبية (أكبر هيئة إذاعة وطنية فى العالم), قوائم المبيعات العالمية ،وجاء ألبوم "وياه" للنجم عمرو دياب كأفضل ألبوم مبيعاْ و انتشاراْ (فى القارة الأوروبية) بترتيب 248, ضمن 850 ألبوم لنجوم عالميين وهو الترتيب الذي يضعه في صدارة مبيعات الفنانين العرب في اوروبا (فكيف يكون الوضع محليا) .. والأهم انه لا يوجد فنانين عرب غيره وهذه هي المواقع الرسمية التابعة لاتحاد الاذاعة الأوروبية للتأكد من صحة الخبر:
http://www.ebu.ch/
http://www.wmce.de/

وهذه هي الصورة التي توضح ترتيب الفنان عمرو دياب:

المصدر الثاني من شركة روتانا نفسها المنتجة لألبومات كلا من عمرو دياب و اليسا:

علي صفحة شركة روتانا الرسمية علي الموقع الاجتماعي (فيس بوك) أكد المكتب الاعلامي للشركة ان الفنان عمرو دياب هو الأعلي مبيعا وانهم غير مسئولين عن اختيار اللجنة المنظمة للجائزة للفنانة اليسا وهذه هي الصورة التي توضح ذلك:

وهذا هو مصدر الخبر علي الصفحة الرسمية للشركة:
http://www.facebook.com/topic.php?uid=76834420337&topic=486822

هناك من التزم شاكراً بصياغة المقالة ونشرها باسمي مثل "مجلة بصراحة الاليكترونية" وان كان قد تم اضافة بعض المعلومات التي لم أفضلها .. وهذه صورة لجزء من المقالة التي تم نشرها بالموقع:

وهناك بعض المجلات المشهورة بعنصريتها الفنية مثل مجلة الجرس واثناء تغطيتها لفوز اليسا بالجائزة قامت بنشر الرسالة متضمنة هجوم ضدي :
http://i774.photobucket.com/albums/yy26/zizoamer/82659012.jpg
http://i774.photobucket.com/albums/yy26/zizoamer/23635466.jpg

مجلة الجرس بدلا من توضيح حقائق مضادة لتأكيد أحقية اليسا بالجائزة ونشر أدلة اكثر اقناعا ليثبتوا اني كداب وضلالي قاموا بمهاجمتي واتهامي بالحقد والكذب والاغرب انهم اتهموا دياب بانه خلاني انا اللي ابعتلهم الرسالة علشان يضايق اليسا بمعجبيه .. مهو أنا لوحدي بقيت معجبيه!!

المجلة استغلت عدم ملاحظتي لوجود اسم الفنان مارسيل خليفة علشان تتخذه وسيلة في الرد عليا .. وفكروني بنكتة اللي قال لصاحبه أنا شوفت خطيبتك وهي ماشية مع الواد النجار اللي في حتتكم قالوا ياعم ده لا نجار ولا بيفهم .. نفس المنطق اللي استغلوا الصديق علشان يغطي علي خيبته بانتقاد النجار في مهنته استغلته مجلة الجرس بدون أي علاقة بين المعلومة والرد!! المشكلة ان ترتيب مارسيل خليفة ايضا كان تحت عمرو بفارق 30 مركز وده لا يؤثر علي هدف الرسالة انه عمرو المطرب العربي الأعلي مبيعاً !!

المجلة اعتبرت ان كلامي مدسوس وحاقد لما استعنت بكلام المكتب الاعلامي لروتانا علي صفحة الشركة الرسمية ورغم اني ارسلتلهم لنك الصفحة من خلال الرسالة واللي للأسف لم ينشروه علي الأقل كدليل اثبات خوفا من انتشار الحقيقة ،ورغم تأكيدهم علي صدق كلامي ووجود رد من شركة روتانا يؤكده ،الا انهم ناقدوا انفسهم ونفوا انه روتانا تقول كده .. يعني كدبوا نفسهم مش هيكدبوني!!

كنت أتمني أقرا أدلة أو رد مقنع أو حتي كلمة من أحد مسئولي روتانا ينفي صحة الكلام اللي قيل علي صفحتهم بدل من التفرغ للتشكيك في شخصي واتهامي اني مدسوس وحاقد علي مغنية زي اليسا وانا العاشق للمطرب الأول عمرو دياب.

رغبة كبيرة في عودة المدونة

بعد عمل استطلاع رأي للديابين في عودة المدونة مرة أخري كانت النتيجة كالتالي:

88% يؤيدوا عودتها مرة اخري.
9% مش موافقين
2% مش هتفرق كتير

شكرا لتقديركم وان شاء الله نكون عند حسن الظن و هحاول اكتساب ثقة الـ11% الغير مؤيدين.

هذا ما قالته مصر

عندما أصدر عمرو دياب أغنية مصر قالت شاهدنا عناوين للصحف مثل "مصر قالت تخرج عمرو دياب عن صمته" و "عمرو يغازل الثورة" و "بعد الصمت عمرو دياب يرد بمصر قالت" وفي الواقع رأيت الأغنية بمنظور آخر يحمل رسالة من عمرو دياب حتي لو كانت رسالة غير مباشرة.

كيف خرج عمرو عن صمته وهو يغني أغنية عنوانها "مصر قالت" وليس عمرو من قال .. عمرو أراد ان يوجه رسالة موجزة لمن هاجموا صمته بأنه لا قيمة لرأي فرد مهما كان طالما تحدثت مصر ممثلة في شعبها من كل شبر فيها ،فهل سيكون لعمرو دياب رأي آخر؟! .. ولذلك سبق كل كوبليه عبارة "مصر قالت" لتصف ما حدث في الشارع المصري فجائت البداية موفقة للغاية ومعبرة بالتلاتة عن أن "هما دول" الأهم:

صوت ولادي كلمة الحق في بلادي .. هما دول سر التحدي هما دول زهرة جهادي .. هما دول هما الشباب.
ونجد عمرو في الكوبليه الثاني يقول "هما دول أكبر علامة" وفي الرابع "هما دول سر الريادة".

أقوي كوبليهات الأغنية هو الكوبليه الذي استخدم في الاعلان عنها وهو الوحيد الذي خلي من كلمة هما دول:
مصر قالت انحيازي عمره ما كان لانتهازي مستحيل هقبل تعازي في الشهيد رغم اعتزازي الا من بعد الحساب.

وهنا علق أحد الصحفيين مهاجما عمرو قبل صدور الأغنية بشكلها الكامل عن أن عمرو لم يتكلم اثناء الثورة حتي يرفض التعازي واعتبره خائن وانه (اي الصحفي) سيقبل التعازي الذي رفضه دياب ونسي الصحفي ان الكوبليه يسبقه عبارة "مصر قالت" والتي تصف الحالة التي حدثت في مصر من بعض أُسر الشهداء الذين ذهبوا ليأخذوا عزاء ابنائهم في الميدان فور اعلان بيان تنحي الرئيس ولهذا عمرو لم يرفض يا مدعي العبقرية.

الأغنية من تأليف صديق رحلة كفاح دياب الشاعر/ مجدي النجار والذي أبدع في اظهار رسالة دياب كما يجب ان تكون .. وليس غريب ان يكون اللحن لعمرو دياب الذي تخصص في تلحين تجاربه العاطفية والروحانية .. التوزيع لعادل حقي رجل المرحلة الحالية والمنتظر منه الكثير في الألبوم القادم.

الصمت .. عندما يصبح الحل الأصعب والأمثل

الحقيقة ان الحديث عن الهضبة وموقفه من الثورة يحتاج الي حديث طويل عن الثورة نفسها لكن اكيد انا مش هتكلم عن الثورة لان كلامي عنها مش هيكون ايجابي بشكل كبير لان رأيي باختصار ان الثورة بدأت بمطالب مشروعة وشعبية وكانت نبيلة سلمية سلمية مفيش كلام ،لكن للأسف انجرفت بعد كده وخدت اتجاهات غريبة ونط عليها خفافيش الظلام علشان يجنوا انجازاتها ومكاسبها لصالهحم وبدأوا يهمشوا دور الشباب المحرك الأصلي للثورة.

ياما عمرو دياب واجه اشاعاته بالصمت ياما اتهاجم أبشع هجوم وبرده كان الرد الصمت ياما ادعوا شرائه جوائز وكان بيرد بالصمت ياما قالوا سارق ألحان وموسيقي ورد بالصمت ،وكمل انت مع نفسك اي ياما تانية وهتلاقي برده ردها كان الصمت .. وزي ما بيقولوا الصمت لغة الكبار ولكن...
ماكنش فيه صمت منهم أثار غيرة وحقد وهجوم وغيظ وحُرقة قد الصمت الأخير اثناء الثورة.

كلنا كنا بنتفرج علي التليفزيون المصري اثناء عرضه لبعض الأكاذيب وشوفنا المذيعة بتنادي وتقول فين عمرو دياب يهدي الشباب دول لازم نتصل بيه ده بيحضرله جمهور لحفلاته اكتر من اللي في ميدان التحرير دلوقت ولو قالهم امشوا أكيد هيسمعوا كلامه لكن برده ماتكلمش عمرو.

الجرايد الحكومية نشرت لستة بأسماء بعض الناس اللي هربت من مصر وكان منهم عمرو دياب وبعض الشخصيات الأخري اللي رفضت انها تتصل بالتليفزيون الحكومي وتهاجم المتظاهرين وبعدها وكما هي آفة الصحف عندنا انتشر الخبر في بعض الصحف الخاصة الأخري.

طيب ما نفكر بعقلنا ونحسبها هو عمرو هيهرب ليه اصلا؟ .. لا هو سارق أموال الدولة ولا عنده ربح غير مشروع ولا استغلال منصب ولا البلد بتحارب وهيخاف لينزل علي بيته صاروخ ،وبعدين ده راجل عايش في الصحرا.

لنفترض ان عمرو سافر ،هل أصبح وجود الشخص في بلده من عدمها دليل وطنية؟ .. ده كده يبقي احنا عندنا خونة كتير قوي سايبين البلد وشغالين برة ماحدش فيهم فكر يرجع يقف جنب ولاد بلده وحتي اللي فيهم كان عنده اجازة ينزلها أجلها لما الوضع يهدي وللأسف منهم اللي بيهاجم عمرو وبيقول ده مش وطني.

ديما عندي مقولة بحب اقولها عن الهضبة وهي انه لو خُير بين أمرين أي واحد هيختاره فيهم هيتهاجم عليه .. فأحيانا صمته بيضيع علي البعض فرصة الهجوم فيهاجموا صمته .. عمرو لو اتكلم بغض النظر عن اللي هيقوله كان هيتكتب وهيتقال انه بيتاجر بالأزمة وده اتقال بالفعل في بعض الصحف عن الفنانين اللي ظهروا في الاعلام يعيطوا ويتكلموا .. وفيه منهم اللي ساير الموضة وقال للناس عيب تعملوا كده وتدمروا البلد لما لقي النظام لسا مسيطر ،ولما الزمام فلت راح للناس قالهم انا بحبكم وانا اتخدعت .. لكن الهضبة مش كده.

عمرو لو سمع كلام التليفزيون لما نادالوا يهدي الناس كانوا هيقولوا ده خاين وضد الثورة وحبيب النظام .. ولو اتكلم في قناة زي قناة "الحقيرة" وقال لابد من الانتقام والويل للنظام الفاسق الداعر كانوا هيقولوا ده منافق وبوشين وبيضحك علي الناس ده غنا لمبارك قبل كده.

عمرو هو المطرب الأول في عصره ودائما ما يحاول أي نظام كسب الناجحين وأصحاب الشعبيات الجارفة وقرب الفنان من رئيس دولته دائما بيكون أحد المقاييس الهامة في تحديد مكانة المطرب لأن رئيس الدولة هو رمز الدولة حتي لو كان ظالم .. وأحب هنا أتكلم عن موقف السيدة أم كلثوم الموازي لموقف عمرو أثناء ثورة 1952:

السيدة أم كلثوم كانت في منصب نقيبة الموسيقيين ومن المقربين للقصر الملكي وحصلت علي قلادة صاحبة العصمة وغنت للملك اكتر من اغنية في عهده منها عام 1932 في حضور الملك فؤاد: "أفديه ان حفظ الهوى أو ضيعا - ملك الفؤاد فما عسى أن أصنعا به" .. ولما قامت الثورة تم طردها من منصب نقيبة الموسيقيين ومنع اذاعة أغانيها في الاذاعة نهائيا باعتبارها من مطربات العهد البائد وتم اعتبارها من أعداء الثورة فانتظرت حتي هدأت الاوضاع وذهبت لعبد الناصر تشكيله فسمح باعادة اذاعة أغانيها مرة أخري عدا أغانيها اللي كانت للملك .. والآن أين أنتم من ام كلثوم و ما هي مكانتها بيننا؟!!

أعلم ان صمت عمرو دياب قد شوه صورة بعض المطربين ممن ملئوا الدنيا صراخاً وعويلاً بداعي حب الوطن ولأنه الأول فانتظروا ماذا سيقول ليقيسوا رأيه علي ما قالوه والبعض انتظر ليعرف وجهة عمرو ليسلكها فقهرهم صمته و صغر منهم فشنوا الحملات و الهجمات فقالوا الصمت خيانة.

عمرو مثله كأي مواطن مصري زعل وحزن ورفض المتاجرة بالأزمة او اعطاء فرصة للأخرين لمهاجمته فاختار الحل الأمثل حتي لو كان الأصعب وظل داخل مصر يعاني بمعاناة شعبها وحفظ حزنه داخله ورفض أن يفعل كما فعلت بعض التماسيح الباكية علي الشاشات .. فاستقبل الطعنات بالسُكات وسيمر الوقت كما مر في عهد ثورة 1952 وسيذهب الحاقدين ومدعي الوطنية ومن ملئوا الدنيا كذبا وصراخا الي مزبلة التاريخ ويبقي عمرو دياب كما بقت أم كلثوم.

من تاني أكيد راجعين

بعد الغياب عن الكتابة لظروف العمل وامور الحياة قررت أرجع اكتب تاني بسبب الاستفزازات والهجوم اللي علي عمرو واللي خلق عندي عملية شحن وتسخين خليتني عايز انفجر .. حسيت اني عايز أرجع أكتب واقول رأيي من تاني وخصوصا ان عمرو دلوقتي بيقابل واحدة من اعنف حملات الهجوم عليه وبتمس أخطر شئ ممكن يمس أي انسان وهي وطنيته وحبه لبلده.

أنا لما بكتب مش بكتب عشان أدافع عن عمرو ، مين أنا عشان أدافع عنه وهو اصلا مش مستني واحد زيي او غيري يدافع عنه .. انا مجرد شخص حبه واتأثر بيه واعتبره قدوة ونموذج مثالي للشخص الناجح والمطرب المتكامل اللي حب عمله ،فاتولدت عندي شحنات حب زيادة شوية (مشيها شوية) فقررت اكتب عنه واعمل المدونة دي بهدف التأريخ لأرائي وحبي لعمرو وأرجع ليها كل ما احب احن لذكري معينة او افتكر حصل ايه .. وبعد كده لقيت اتنين تلاتة قالولي احنا بنحب عمرو ومن حبنا فيه بنقرا اللي بتكتبه ،والاتنين تلاتة وصلوا لاكتر من 1000 واحد كانوا أعضاء الجروب علي الفيس بوك .. صحيح لما بطلت اكتب نزلوا 850 واحد فهحاول اجتهد واكسب ثقتهم من تاني.