بعض الناس بتتهم الفنان عمرو دياب انه مادي و تذكرته غالية .. ولأن الشخص المادي ديما كل همه جمع المال فقط فبنظرة لحال الفنان عمرو دياب هنجد إنه لو مادي كان وافق علي كل الحفلات اللي بتجيله وما أكثرها ونحن نشهد بأنفسنا ندرة حفلاته ، كان وافق علي أي إعلان بيجيله وهو المطمع لكل الشركات ، كان نزل كل سنة ألبوم ، وكل دي حاجات في إيده لكن هو بيحط معايير الجودة ديما في المقدمة .. أما المعايير المادية بتيجي بعدها باعتبار إن شغلته وصنعته الطرب و رأس ماله صوته و هي شغلة وصفها بنفسه وقال إنها سلعة لا ترد ولا تستبدل وبالتالي من حقه يكسب من شغلته لأنه بيبيع سلعة ومادام سلعته هي الأغلي تبقي هي الأجود والأفضل .. علشان كده عمرو قال: "اللي له بديل مالوش سعر" .. علشان كده هو متأكد طول ما هو متفرد ومتميز وناجح هيفضل أعلي سعر .. وطول ما هو أعلي سعر هيفضل أول ..

يعني ما ينفعش تقارنه بأي فنان آخر وتقول اشمعني ده حفلاته أرخص لأن الفنان الآخر لو جاله جنيه زيادة مش هيقول لأ بس هو ليه رزقه اللي ربنا بيدهوله علي قد نجوميته وشعبيته.

حضرتك لو ليك في الكورة مثلا ولنفترض انك اهلاوي علي اعتبار انهم الفئة الأكبر حاليا وماتمناش انك تاخد كلامي بتعصب ده مثلا مثلا .. هل حضرتك تذكرة حضور ماتش للأهلي زي تذكرة حضور أي ماتش تاني في الدوري من فرق الأقاليم؟ أكيد لأ .. طيب هل تذكرة ماتش الأهلي مع الزمالك زي تذكرته مع أي فرقة تانية؟ برده لأ .. طيب هل تذكرة ماتش الأهلي مع برشلونة في لقاء ودي مش رسمي ولا حاجة زي تذكرة ماتش الزمالك في الدوري او حتي نهائي كاس ؟ أكيد بعضكم لسا فاكر المشكلة اللي حصلت بسبب ماتش المئوية اياه مع برشلونة والمشكلة اللي حصلت بين الادارة والالتراس بسبب التذاكر.

إذا الحياة عرض وطلب وكل ما كان سلعتك عليها طلب كل ما بتحصل علي عروض أعلي .. أما لو كانت سلعتك مرطرطة في السوق مش هيبقالها سعر مش هيبقالها طلب مش هيجيلك عروض مش هتبقي أول غصب عن أي حد !

وهختم كلامي برد عمرو شخصياً.