جائزة الميوزك أوارد هامة وعالمية

مهما قيل عن جايزة الورلد ميوزك أوارد من اشاعات واقاويل تبقي هي الجايزة الأهم في الوطن العربي واللي بيكسبها بتضيف ليه كتير.. ومهما ادعي بعض المطربين بانها اتعرضت عليهم بالفلوس وهما رفضوها..بيفضلوا يلهسوا ويزحفوا خلفها املا في الحصول عليها..والاغرب ان انهم لما بيكسبوها بيغيروا كلامهم من اقصي الشمال لاقصي اليمين وتصبح جايزة ليها احترامها ومكانتها..واسئلوا نانسي عجرم!!

في استطلاع رأي الديابين عن مدي أهمية الميوزك أوارد صوت 85% منهم الي انها جايزة مهمة وعالمية..وباقي النتايج تكاد لا تذكر وتنوعت بين:

7% كان اختيارهم لانها مابقالهاش فيمة.
4% صوتوا لاختيار انها زي اي جايزة!
3% فقط قالوا انها جايزة مشبوهة.

الميوزك أورد بين أحقية الهضبة ومقاطعة روتانا

بعد تأكيد كل المصادر الرسمية والغير الرسمية والاعلامية والغير اعلامية تصدر ألبوم وياه لمبيعات الكاسيت بفارق رقم كبير عن تاني ألبوم يليه في الترتيب أصبح الهضبة هو المرشح الأول للحصول علي جايزة الميوزك أورد عن أعلي مبيعات في منطقة الشرق الأوسط..لكن كالعادة حتي لو حصل اجماع علي شخص واحد يفوز بيها بيكون فيه ناس بتنفخ في النار عشان تخترع المشاكل والاكاذيب او تقلل من أهميتها.

وأصبح الكلام بيدور في فلك مقاطعة روتانا للجايزة واحتمال خسارة الهضبة ليها باعتباره من مطربي الشركة اللي هترفض تمد اللجنة المنظمة باي ارقام مبيعات..وبالتالي ممكن الهضبة يخسرها لصالح مطرب تاني من خارج الشركة..ومن هنا ظهر حالة من اللخبطة والتخبيط المقصود من كيانات بتكره حاجة اسمها نجاح عمرو دياب.

وبالعودة لاخر جايزتين وخصوصا جايزة الهضبة في 2007 لما حصل عليها بعد نهاية عقده مع روتانا وحصوله عليها وهو خارجها رغم انهم قدموا ارقام مبيعات بتقول ان وائل كافوري هو اللي متصدر المبيعات..لكن اللجنة المنظمة اكتشفت عدم منطقية كلام شركة روتانا لان البوم وائل كان صادر قبل اسبوع واحد بس من اعلان الفايز..فاتجهت الشركة المنظمة لمبيعات الفيرجن في الوطن العربي ولمنظمة
IFPI
المسئولة عن مبيعات الكاسيت في العالم وتأكدت من خلالهم من تفوق الهضبة في المبيعات وبفارق كبير عن وائل كافوري اللي ماكنش حقق ربع مبيعات ألبوم الليلادي..وكسب الهضبة الجايزة رغم تقديم روتانا أرقام مزورة!

في عام 2008 كانت المنافسة علي المبيعات بين نانسي عجرم واليسا وقدمت روتانا ارقام مبيعات اليسا اللي تثبت تصدرها للمبيعات لكن الشركة كانت اتعلمت من درس 2007 وقارنت ارقام روتانا بأرقام الجهات الأخري وتأكدوا ان نانسي هي الأحق بالجايزة .. ومن هنا اعلنت شركة روتانا مقاطعة الجايزة تماما..حفظا لماء الوجه.

وسواء كانت اعلنت روتانا المقاطعة او ما أعلنتش فالشركة فقدت مصداقيتها قدام اللجنة المنظمة وحصول الهضبة علي الجايزة لن يتأثر بأي شكل من الأشكال بموقف روتانا الا في حالة اذا قررت الشركة المنظمة للجايزة اتخاذ موقف مضاد بحرمان مطربي روتانا من الجايزة.

تحديث-الهضبة يحقق سوبر هاتريك افريقي

شهد مسرح تروكسي بلندن أمس اقامة مهرجان جوائز الموسيقي الافريقية والهضبة كان مرشح فيه للحصول علي 4 جوايز وكان من ضمن الحضور مجموعة من مشاهير العالم زي ايسيان نجم نادي تشيلسي الانجليزي وبيكهام نجم انجلترا.

قبل بداية الحفل ودخول الهضبة الي القاعة شارك في مؤتمر صحفي اجاب فيه علي اسئلة صحفيين من جميع انحاء العالم..ومع بدأ مراسم توزيع الجوايز استلم الهضبة أول جايزة وهي جايزة احسن مطرب في افريقيا وقال كلمة عبر فيها عن سعادته بالجايزة وشكر جمهوره ..ومع استمرار توزيع الجوائز صعد مرة تانية عشان يستلم جايزة احسن اغنية (وياه) وبعدها خرج من القاعة عشان يستعد للصعود علي المسرح للغناء.

قام الهضبة بغناء اغنية وياه بتوزيع مختلف عن الألبوم وسط استعراض مبهر مع مجموعة من الموديلز..وبعدها استلم جايزة احسن صوت رجالي في افريقيا عشان تبقي تالت واخر جايزة..وقدم شكره للجنة المنظمة للحفل وشكر جمهوره.

------------------------

رغم عدم تسلم الهضبة الا 3 جوايز في مهرجان جوائز الموسيقي الافريقية الا ان اللجنة المنظمة اعلنت اليوم اسماء الفائزين في كافة المجالات وظهر من خلالها فوز الهضبة بالاربع جوايز اللي تم ترشيحه ليها وبينهم جايزة احسن فيديو كليب (وياه) بالقارة.

ألف مبروك للهضبة سوبر هاتريك افريقيا وتتويجه رسميا زعيم افريقيا الاول بلا منافس.

كل سنة وانت طيب يا هضبة

النهارده بنحتفل بعيد ميلاد النجم الشاب اللي هيفضل طول عمره شاب عشان هو ده اختياره اللي مش هيتنازل عنه..اللي كسر قاعدة السن وعلاقتها بشكل الانسان..النجم اللي كل ما يمر بيه العمر بيصغر مش بيكبر..النجم اللي خلي الرياضة وسيلته الاولي في الحفاظ علي لياقته وشبابه وديما يدعو الشباب لممارستها.

النهارده مش عيدك لوحدك..ده عيد بيستناه كل جمهورك عشان يردوا فيه جزء من اللي بتقدمهلهم بفنك واغانيك اللي بتمنحهم السعادة والبهجة وبتعبر عن كل حياتهم ومشاكلهم وفرحهم وحتي حزنهم اللي بأغانيك بتخليه انتصار لانك ديما الحبيب القوي اللي بيرفض الدموع والجرح وبيقدر يتحمل ويواجه ويكمل ويقول ماحدش ساب حبيبه وضاع.

النهارده ملايين في العالم كله بتقولك:
كل سنة وانت طيب.
كل سنة وانت ديما في القمة.
كل سنة وانت رقم واحد.
كل سنة وانت بتحقق انتصارات عالمية.
كل سنة وانت عمرو دياب.

الموقع الرسمي مستواه عالمي

بعد ظهور الموقع الرسمي للهضبة عملنا استفتاء نشوف رأي الديابين في السايت وكانت النتيجة كالتالي:

66% صوتوا لان السايت مستواه عالمي.
19% قالوا كان ممكن يبقي فيه أحسن.
11% كان اختيارهم انه جامد جدا.
2% فقط قالوا ان السايت كويس.

الهضبة في مسلسل تليفزيوني

في مفاجأة كبيرة وغير متوقعة الهضبة وقع علي عقد تصوير مسلسل لرمضان القادم لعام 2010 من انتاج شركة جود نيوز وسيقوم باخراجه شريف عرفة.

المسلسل هيتضمن مجموعة أغاني جديدة للهضبة وهيبدأ تصويره في يناير القادم .. وهيعقد مؤتمر صحفي الشهر المقبل يُعرض فيه تفاصيل العمل وباقي أبطال المسلسل.

قال فاكرينك تتصدر طلبات الديابين

معروف عن الهضبة انه ديما بيغني أغاني جديدة في حفلاته وفيها اللي بينزل في الألبومات وفيها اللي مش بينزل وفيها اللي بيروح لغيره من المطربين .. فعملنا استفتاء نسأل فيه الديابين عن أغاني الحفلات اللي ماصدرتش ونفسهم يسمعوها بنسخة الاستوديو..ولأن في ناس بتحب أغاني كتير منها وعايزين يسمعوها فالتصويت المرة دي كان مختلف وكان متعدد الاختيارات..عشان كده النسب مختلفة عن كل مرة:

تصدرت أغنية "قال فاكرينيك" التصويت بنسبة 38% وتلاها في المركز التاني أغنية "كان باين من سلامها" بنسبة 33%.

في المركز التالت وبنسبة 24% حصل تساوي بين اغنية عودت قلبي واغنية ياريت سنك يزيد.

في المركز الرابع بنسبة 20% أغنية زي الحلم..في المركز الخامس بنسبة 13% اغنية تعبت انا.. في المركز السادس بنسبة 11% أغنية هقدر أبعد.

قراءة في صحف قديمة ماصدرتش

ما حاولتش تقعد مرة مع نفسك وتسرح وتتخيل ان الهضبة ماظهرش ولا غنا ولا حد سمع عنه خالص؟..ياتري مين من الفنانين كان هيبقي موجود والصحف كانت هتقول ايه عنهم؟..وحال الفن المصري والعربي كان هيبقي عامل ازاي؟..طيب ما تيجوا نتخيل عناوين ومانشيتات الصحف لو كان ده حصل:

جريدة الاهرام: هاني شاكر يبدع بأغاني حليم علي مدار ساعتين بحفله بالكويت.
جريدة الأخبار: اسعار النجوم في الحفلات نار وعلي الحجار الأعلي أجرا بـ 18 ألف جنيه.
مجلة زهرة الخليج: الفن الخليجي ينافس الفن اللبناني علي صدارة الفن العربي..والفن المصري يكتفي بتراث السابقون.
مجلة نادين: الجبل راغب علامة ينافس حبيب الجيل رامي عياش علي صدارة الأغنية العربية.
جريدة الجمهورية: الفنان الكبير مدحت صالح يحصل علي جائزة موبينيل ميوزك أورد ويؤكد انها خطوة هامة نحو العالمية.
مجلة اخبار نجوم: فشل ألبوم "لولاكي" لمطرب مغمور يدعي علي حميدة.
مجلة كلام الناس: متي يحصل نجومنا علي جائزة قارية او عالمية مثل الميوزك أورد؟!
مجلة الجرس: جولة عالمية للفنان العالمي راغب علامة في الصومال والسودان ومدغشقر.
مجلة الكواكب: محمد ثروت يطرح ألبومه بنيولوك مثير للجدل يظهر فيه وهو يرتدي بدلة بدون رابطة عنق.
جريدة الوفد: محمد فؤاد يصور اول فيديو كليب بكاميرة موبيل.
مجلة كل الناس: مصطفي كامل يؤكد للحصول علي جائزة عالمية لابد من الغناء بالانجليزية.
مجلة الشبكة: راغب علامة يصور مشوار حياته في برنامج بعنوان الفيلم.
جريدة المصري اليوم: 12 حالة اغماء ووفاة 3 فتيات بمجرد ظهور حبيب الجيل رامي عياش علي المسرح.
جريدة صوت الأمة: محمد الحلو يقدم في أحدث ألبوماته لون موسيقي متطور يسمي المقسوم.
جريدة الدستور: 17 لحن جديد لحلمي بكر ينتظرهم سوق الكاسيت.
مجلة الاذاعة والتليفزيون: عمار الشريعي يؤكد اننا في حاجة الي طفرة غنائية تواكب روح العصر.
مجلة عين: فنان العرب محمد عبده يتمني ان يري اليوم الذي يغني فيه فنان عربي في اوروبا وامريكا.

منافسة حامية بين التلاتة الكدابين

من يوم ما ظهر الهضبة والأخبار الفشنك والاشاعات اللي بتطلع عنه والهجوم اللي بيتعرضله عامل زي حنفية مابتفضاش وكله بيسرزق من ورا اسمه عشان يبيع او يعمل لنفسه شهرة .. وفيه ناس من الكيانات اياها اللي عدم وجود الهضبة معاهم بيخسرهم فبيشتروا اقلام الصحفيين عشان يهاجموه..وكل فترة بتطلع جريدة تكون هي اللي في الصدارة والمتخصصة في نشر الاكاذيب والاشاعات..فعملنا التصويت ده عن اكتر صحيفة بتنشر أكاذيب عن الهضبة وكانت النتيجة كالتالي:

المنافسة كانت مولعة بين 3 صحف وطول فترة التصويت كانوا بيبدلوا المراكز سوا لحد ماحسمتها في الاخر جريدة الانباء الدولية بنسبة 36% ..المركز التاني بنسة 31% لمجلة الجرس لصاحبتها العجوز الشمطاء نضال الأحمدية..وفي المركز التالت بنسبة 29% لجريدة وشوشة ودي ليها تاريخ وصولات وجولات ومقاطعات مع الديابين.

بنسبة ضئيلة جدا وبعيدة عن المنافسة تماما لجريدة الوفد وحصلت علي نسبة 5% فقط..وصحيفة الوفد تم اختيارها في التصويت بناء علي انها اكتر صحيفة (مصرية) يومية بتهاجم نجم (مصر) الأول.

العالمي يحتل افريقيا

النهارده هيبدأ التصويت علي جايزة الموسيقي الافريقية اللي ذكرنا ان الهضبة مرشح للحصول عليها وأعلن اليوم عن المتنافسين والمراكز اللي بينافسوا عليها ..والهضبة مرشح لـ 4 مراكز دفعة واحدة وهي:

أحسن مطرب ، أحسن أغنية (وياه) ، أحسن فيديو كليب (وياه) ، أكتر مطرب مؤثر فنيا.

التصويت هينتهي يوم 10 أكتوبر وهيكون من خلال رسايل الاس ام اس ومن خلال الموقع الرسمي للجايزة:

http://www.africamusicawards.com

عايزين الهضبة ياخد الـ4 جوايز ومايخسرش ولا تصويت واحد منهم.