محدث-متابعة لمشكلة الموقع الرسمي من الألف الي الياء

في حالة حزن بين جمهور عمرو دياب في الفترة الحالية راجعة لاختفاء الموقع اللي المفروض انه بقي رسمي (واللي مش معروف اذا كان فعلا بقي رسمي ولا لسا المفاوضات شغالة اللي اعلنوا من الاول انها قاربت علي الحسم يعني المفروض انها لم تحسم نهائيا) بعد يومين تلاتة من اعلان الخبر اللي اسعدهم وبعد مناقشات طويلة عن موضوع ضم كل مواقع عمرو دياب في موقع واحد تحت ادارة الموقع الرسمي لكن اللي حصل قفل الموضوع بدري ونهي كل المناقشات..و نتمني ان يتم وضع نقطة سرقة لنكات الموقع والهاك اللي حصل عليه في الاعتبار اثناء اعادة فتح موضوع تسليم كل المواقع للموقع الرسمي والتفكير في عواقب اي هاك تاني علي السايت في حالة عدم وجود اي سايت تاني.

الكلام عن الهاك الحالي لازم يتطرك لمواقف حصلت قبل كده اتعرض فيها السايت لهاك وكان اخرها في الفترة اللي كان لازال طنطاوي مدير السايت فيها ويومها عمل اعلان وصف فيها الاشخاص الحقيرة دي بالفشل والغباء وتحداهم بنبرة عنيفة في الكلام الي ان ترك طنطاوي الادارة لاول مرة باعتباره كان الوحيد اللي استمر في السايت من البداية للنهاية لحد اللحظة اللي سابوا فيها مع الوضع في الاعتبار انه افراد الاداة اتغيروا اكتر من مرة والجمهور اعتقد انه بالاعلان ده السايت بعيد المنال عن اي محاولة سرقة وانه حصين ومنيع ومشيت الاحداث كما سبق ذكرها..وفي وسط الفرحة الناس صحيت لقيت الموقع مش موجود ع النت واعلنت الادارة ان اللنكات مش بتشتغل وهما بيحاولوا يرجعوها كنوع من التجميل لكلمة اتسرقت او اتعمل هاك علي السايت والكلام الجامد ده..ولما اتاخر ترجيع اللنكات اعلنت الادارة التالي:

وصل فريق عمل عالم عمرو دياب بدعم من الفنان عمرو دياب إلي شكل
نهائي في المناقشات مع شركة النطاقات, وفي أنتظار القرار الأخير بنهاية الأسبوع
بأقصي تقدير سوف نستخدم الأجراءات القانونية أو نسترجع النطاقات أن شاء الله..في
النهاية في حالة أتخاذ الأجراءات القانونية فا من المتوقع أن يستغرق الحل
القانوني حوالي شهرين - وفي أي حال مهما أستغرق الأمر نعدكم بالعودة من أجلكم
أن شاء الله.

بعد الاعلان بدأ الموقع يظهر عليه عبارات غريبة..الاولي كانت بتحمل سخرية غير مفهومة وغير محددة:

وده قبل مايظهر رسالة تانية بتحارب الارهاب في شخص بن لادن:

الاعضاء اللي في الموقع افتكروا ان السايت ببياناته اتسرقت فظهر تاني اعلان من ادارة الموقع وكان كالتالي:

رداً علي التساؤلات العديدة حول أذا ما كان قد تمت القرصنة علي الموقع والبيانات
الخاصة به, أحب أن أطمئن الجميع أن جميع البيانات والمعلومات الخاصة بالموقع في حفظ
تام ولم يتم المساس بها وحول أشارة البعض أن الرسالة الظاهرة علي الصفحة الرئيسية
هي نتيجة قرصنة الشخص ذاته المحول له الدومينات أود أن أوضح بأن هذه الرسالة ليست
نتيجة أي قرصنة علي الموقع أطلاقاً, فالرسالة مكتوبة ربما تكون ضمن صلاحيات الدومين
التي توفرها الشركة المضيفة للدومين لتوضيح حالة النطاق, فالبعض مثلاً يكتب الموقع
تحت الأنشاء أو محجوز أو ألي ماذلك من رسائل لا علاقة لها بسيرفير أي موقع - ولا
علاقة لها ببيانات موقعنا ماحدث لنطاقات الموقع لا علاقة له بأي نوع من القرصنة ,
ماحدث عبارة عن عملية نصب وسرقة وتزييف لبيانات و وقائع وجاري التعامل معها هذه
الرسالة للتوضيح فقط وطمئنة السادة الأعضاء بعد وصول العديد من الأستفسارت عن
بيانات الموقع.

والي هذه اللحظة مازال كل شئ متوقف محلك سر ومفيش اي خطوة ايجابية ظهرت..ياتري الموقع الرسمي هيفضل يحارب الارهاب لحد امتي؟!

--------------------

أخيرا عادة الصفحة الرئيسية للموقع من جديد واستطاعت ادارة الموقع بمساعدة الفنان عمرو دياب استرجاع الموقع بدون خساير وهيتم افتتاح المنتدي بتاريخ 1 مايو 2008 الساعة الثانية صباحا..مبروك

أعضاء الموقع تسلموا رسالتين بنفس المضمون..وكانت الاولي:

يشرفني أن أبلغكم بخبر رجوع الموقع مرة أخري بفضل الله وأن شاء الله
سيعود للعمل كاملاً خلال ساعات قليلة..نود أن نشكر الفنان العالمي عمرو دياب علي
المجهود الكبير والمساعده اللي قدمها لنا علشان الموقع يرجع تاني

شكراً جميعاً علي صبركم ومساعدتكم.

اما الثانية كانت رسالة شخصية من وليد مدير الموقع:

مبروك لكل عشاق عالم عمرودياب تم اعادة السايت مرة اخرى وفى خلال
ساعات قليله سيعمل كما كان بشكر ربنا كتيييييييييييييييييراللهم لك الحمد كما ينبغي
لجلال وجهك وعظيم سلطانك وبشكر حبيبي الفنان عمرودياب اللى لولاا تدخله الشخصي ما
كان عاد عالم عمرودياب مبرووووووووووووووووووووووووووووك

وليد مصطفى

حمد الله علي سلامة الموقع وان شاء الله يتفادي السلبيات اللي اتسببت في المشكلة دي وكويس انها جت في البداية والموقع بيعلن انه بقي رسمي مش بعد مابقي في ذروة الرسمية كانت ساعتها هيبقي شكل الموقع وعمرو نفسه مش ظريف في وسائل الاعلام وخصوصا ان العين هتبقي عليه.

عبد الحليم حافظ وملك الجيل

في عز تألق حليم ومع بداية دخوله في الاربعينات بدأ البعض من اياهم من الموجودين في كل زمن وكل خرابة يتكلم عن سنه وانه ماعدش ينفع يغني اغاني عاطفية ولا بقي فتي احلام البنات وكان ديما حليم علي عكس ما بيعتقد البعض دائم الهجوم عليه من بعض القلة او المرتزقة او برده الشلة اياها اللي موجودة في كل زمن وخرابة ووصلت الاشاعات والهجوم الي حد التشكيك في مرضه وكانوا بيقولوا انه بيدعي المرض عشان يكسب تعاطف الناس ويفضلوا يحبوه ويساندوه وكانوا بيشككوا في سفرياته اللي كان بيسافرها عشان يتابع حالته ويتعالج من البلهارسيا وكانوا بيقولوا انها رحلات بيروح يتفسح فيها او يشتري آلة جديدة.

حليم كان زي اي نجم الصحافة والاعلام بتحب تجني من ورا اسمه المال من خلال اي خبر عنه او هجوم عليه للفت النظر تقوم الناس تشتري المجلة او الجريدة اللي نشرت الاشاعة او الهجوم عملا بمبدأ "الخبر مش ان كلب يعض انسان لكن الخبر ان انسان يعض كلب" وده مثل صحفي شهير بيتقال لاي صحفي مبتدأ ويا حبذا لو في مجلة صفرة .. يعني من الاخر لو واحد واقف قدام كشك الجرايد لقا مجلتين جنب بعض والاتنين علي غلافهم صورة عمرو دياب, واحدة عنوانها عمرو دياب ملك الغناء والتانية عنوانها عمرو دياب جاسوس لاسرائيل ياترى مين اللي هتبيع اكتر ومين اللي هتثير فضول الناس؟!! الطبيعي ان مجلة تكتب عمرو دياب ملك الغناء او عمرو الاسطورة او حوار مع عمرو مهو كل الناس عارفة الكلام ده لكن الغير طبيعي انك تلاقي مكتوب انه جاسوس ، جديدة عليك .. بتطلع الفلوس وتشتري المجلة وتقرا ياسيدي عن الجاسوس !

 

ومع وصول حليم ودخوله في الاربعينات ونجاحه وتربعه علي عرش الغناء وتفكير البعض في خليفة حليم واعتزاله كالعادة برده .. ظهر مطرب جميل وسيم صوته حلو اسمه هاني شاكر اتعرف بين الناس كويس وبدأ البعض يقول عنه خليفة حليم وهو مطرب الايام الجاية .. من الاخر قالوا عنه "ملك الجيل" وبدأت تطلع اشاعات عن ملك الجيل زي انه هاجم حليم في حوار وانه خطف الاضواء عنه والمقالات تنزل عن ملك الساحة القادم واغانيه اللي جذبت البنات وشدتهم وعجبتهم وسنه الصغير .. ونجح واشتهر بأسهل الطرق اسرع مما تخيل .. وحليم مايردش وبيتكلم بشغله بس واعماله اللي كانت بتحقق النجاح اللي مش بيحققه اي حد تاني لحد ما رحل حليم والكل بص لملك الجيل بتاع زمان اللي بدأ يعيش دور حليم زيادة عن اللازم (باعتباره الخليفة المنتظر) من اول اللبس وطريقة الغناء والوقوف ع المسرح وكملها بانه بقي يغني لحليم بعد رحيله!!

 

مرت الايام ووصل سن هاني شاكر للخمسينات من عمره ولازال بيغني لحليم في حفلاته .. مرت الايام لحد ماشاف ملك الجيل الجديد!!

عمرو دياب بالمغرب أخيرا

عمرو هيحيي حفل لجمهوره الكبير بالمغرب في مهرجان موازين بالرباط تحت الرعاية السامية لجلالة الملك محمد السادس واللي هيقام في الفترة بين 16 الي 24 مايو..وحفل عمرو هيقام يوم الاربعاء 21 مايو 2008 بساحة حي النهضة.

المغرب تعتبر تاني اعلي بلد عربي لعمرو دياب من حيث الشعبية بعد بلده الام مصر والشباب هناك مهووس بعمرو وديما بيستنوا البومه وجمهور عمرو الكبير بالمغرب ديما كان بيحلم بحفل لعمرو في المغرب عشان يشوفوا نجمهم المحبوب والمعشوق واللي يمكن ماتقلش شعبيته بالمغرب عن شعبيته بمصر.

رسالة غريبة يتسلمها مديري المواقع الالكترونية

قامت ادارة موقع عالم عمرو دياب الرسمي من ساعات بارسال رسالة غريبة من نوعها لجميع ادارات المواقع الاخري الحاملة لاسم الهضبة ملخصها انه يجب اغلاق هذه المواقع طالما بقي فيه موقع رسمي او بيعها لادارة الموقع الرسمي.. ونص الرسالة كما نشرها موقع شارع عمرو دياب بالصورة:

الرسالة تعتبر غريبة في كل شئ ابسطها لان المسائل القانونية المتعلقة بالفنان بيتولاها مكتب د/ حسام لطفى مش بيوسط حد في النص..واذا كان الموقع شايف انه مش من حق اي معجب بعمرو انه يعمل اي موقع ليه مادام بقي ليه موقع رسمي فماذا عن المطربين العالميين اصحاب مئات المواقع واللي بيكون منهم واحد بس رسمي والباقي لعشاقه واللي احيانا بيكون المواقع دي باكتر من لغة وجنسية زي النجم العالمي انريكي اللي ليه موقع باللغة العربية وفكل بلد تلاقيله موقع بلغتها ومش حكاية مطربين بس ده ممثلين ولاعبين واندية كمان وليه النادي الاهلي اللي قدر يستخرج شهادة قانونية تتعلق بالملكية الفكرية لكل مايحمل اسمه او اللوجه الخاص بيه ماعملش نفس الاجراء مع كل المواقع اللي بتحمل اسم النادي بالاضافة لشعار النادي رغم انها ممكن تتسبب في انتشار اخبار كاذبة او تسئ للنادي بدون قصد من اصحابها!!!

الغريب في الحكاية ان فيه موقع اسمه كارهي عمرو دياب وزي ما هو باين في الرسالة ان الموقع الحقير ده مش مبعوتله نفس الرسالة فاذا كان ده اجراء الموقع الرسمي ضد موقع محبي ومعجبي الفنان فياتري هيكون شكل الاجراء القانوني ايه ضد الموقع المشبوه ده واللي بيحوي اسائة وقلة ادب ضد الهضبة وبالمناسبة احد الفنانين الصاعدين ليه موقع لكارهيه مقدرش يقفله قانونيا رغم انه بيحوي اسائة شديدة ليه والقانون اعتبرها حرية تعبير والموقع ده بيحمل اسم الفنان وصوره عشان ماحدش يبقاله كلمة وتم الاشارة للموقع في مقالة سابقة بعنوان "كارهي عمرو دياب ام كارهي كارهي تامر حسني".

فرحة جمهور عمرو دياب بوجود موقع رسمي ليه مش لازم تتزامن مع شوية منغصات من نفس الموقع خصوصا ان المواقع دي ليها زوارها واللي يعتبر اكبرها موقع شارع عمرو دياب واللي بيقدم اكبر مكتبة للميديا الديابية بتسعد جمهور الهضبة.

عالم عمرو دياب الرسمي

أعلن موقع عالم عمرو دياب انه أصبح من جديد الموقع الرسمي للفنان عمرو دياب لتاني مرة بعد ماكان هو الموقع الرسمي لفترة سابقة وبدون سابق انذار وفي ظروف غامضة انتهت هذه الرسمية واغلق الموقع الي الآن بدون اسباب واضحة واللي غالبا راجعة لعدم وجود الدعم الكافي من عمرو للموقع.

ادارة الموقع دخلت في مفاوضات مع الفنان عمرو دياب من خلال مجموعة من الجلسات للاشراف علي الموقع الرسمي الخاص بيه الي ان استطاعوا الوصول الي اتفاق شبه نهائي (علي حد تعبير الموقع) وسيتم توقيع العقد في خلال الشهر الحالي.

في النهاية الموقع ناشد جمهور عمرو دياب بالصبر علي الافتتاح النهائي للموقع في شكله الرسمي لضخامة المسئولية الملقاه علي عاتقهم ولرغبتهم في تقديم شئ يليق بالهضبة اللي طرح مجموعة من الافكار والتصورات للتواصل مع جمهوره من خلال الموقع ووعد بتقديم كل ماهو جديد وحصري من خلاله.

الجمهور يرفض روتانا

في استفتاء عنوانه "هل يجدد عمرو لروتانا؟" كانت النتائج كالتالي:

بنسبة 40% من المصوتين شاف جمهور الهضبة ان من المستحيلات انه يجدد لروتانا وانه المفروض يكتفي بالمدة اللي قضاها في الشركة..وشاف 22% من المصوتين انها مش فارقة سواء جدد او ماجددش كمل او ماكملش..راح شركة روتانا راح عالم الفن مش بتفرق مع الهضبة..وكان رأي 20% من المصوتين انه من الافضل للهضبة انه ينتج لنفسه ويسيبه من روتانا واخواتها..أقل نسبة كانت 15% ودول اللي شافوا انه لازم يجدد مع روتانا!!!

محدث-التالتة تابتة..الهضبة يحيي حفل بأبو ظبي

عمرو راجع من تالت للامارات بس المرة دي في أبو ظبي عشان يحيي حفلة لجمهوره اللي غاب عنه 9 سنين..الحفلة هتكون في فندق قصر الامارات يوم 11 ابريل ..وهيتم طرح 2500 تذكرة للبيع ..هيشارك الهضبة في الحفل نيكول سابا اللي بتشاركه لتاني مرة في حفلاته بعد حفل دبي 2007
ماريو زخاري المدير التنفيذي للشركة المنظمة صرح ان عمرو دياب هيغني في الحفلة اغنيتين جداد من البومه القادم.

يذكر ان الهضبة مرشح للغناء في مهرجان موازين بالمغرب اللي هيقام في الفترة بين 17 الي 25 مايو تحت الرعاية السامية للملك محمد السادس.

تم تأجيل/إلغاء الحفل.

أقوي مطرب عربي تأثيرا في العالم

أختارت مجلة أرابين بيزنس عمرو دياب من اهم وأقوي 100 شخصية عربية تأثيرا في العالم واحتل فيها المركز 24 متقدم 14 مركز عن تصنيف العام الماضي..وجه في المركز الاول علي مستوي المطربين العرب بفارق 14 مركز عن اقرب مطرب بعده اللي هي اليسا وترتيبها 38..وتاني شخصية مصرية بعد العالم المصري فاروق الباز.

مبررات أختيار عمرو في التصنيف كانت كالتالي:
عمر دياب النجم العربي الأول في ساحة الغناء العربي، أصدر حتى الآن 23 ألبوم ومعظمها حققت مبيعات خيالية. وحصل كأول مطرب عربي يغني باللغة العربية على جائزة ميوزك أوورد (لمنطقة الشرق الأوسط أو بمعنى آخر للمنطقة الناطقة باللغة العربية) في عام 1996 عن ألبوم نور العين، وهي جائزة عالمية تمنح لصاحب أعلى الألبومات الموسيقية توزيعاً سنوياً (لكل لغة) على مستوى اللغات الأكثر انتشاراً في العالم.

وحصل على الجائزة العالمية مرة أخرى في عام 2001 عن ألبوم «أكتر واحد بيحبك» وأغنية «حبيبي ولا على باله»، وبذلك يكون المطرب العربي الوحيد الذي حصل على جائزتين عالميتين، و كان ذلك حتى عام 2006. ثم حقق عمرو دياب مرة أخرى الجائزة للمرة الثالثة عن ألبوم «الليله دي» عام 2007 ليكون المطرب الأول في الشرق الأوسط الذي يحقق تلك الجائزة لثلاث مرات.

يعتبر عمرو دياب هو مخترع الألوان الغنائية المتعددة المنتشرة في الساحة الغنائية حالياً وسابقاً فنرى في أغانيه اللون الأسباني في أغنية ويلوموني، وأغنية قمرين، واللون الأسباني الرومانسي في أغنية تملي معاك، واللون النوبي المختلط بالإفريقي والسواحلي في اغنية عودوني.

وهو أول من خلط الأغنية الشرقية بالغربية وأول مطرب عربي يغني اللون البوب الإيقاعي بتوليفة عربية، وله أغنية مميزة بإيقاع لم يسبقه له أحد وهي أغنية «علم قلبي الغرام». يعتبر اليوم أغلى مطرب عربي في إقامة الحفلات التي يتقاضى فيها مبلغ خيالي، وهو ودائم التواجد في الحفلات العربية المهمة مثل دبي والكويت ومصر وتونس وغيرها.

هاجموا الوليد في بطن أمه

من حق عمرو دياب انه يقدم برنامج عن قصة حياته ومن حقه انه يفشل ولو لأول مرة في حياته..مهو طول عمره ناجح وبيتهاجم..ادولوا فرصة يجرب انه يقدم حاجة جديدة زي ماطول عمره بيقدم الجديد ويتهاجم عليه لحد ماتبقي قاعدة ويتمدح بيها كل اللي بعده..مهو ديما الناس مش بتهاجم الا الناجح عشان لو ماكنش ناجح مش هيتهاجم هو الناس في بلدنا كده..عمرو اتهاجم طول تاريخه اكتر ما اتهاجم شعبولا وسعد القصير وعماد صرصور..من اول يوم فكر انه يغني ويقول ياغنا اتهاجم عشان عمل حاجة جديدة هما مش واخدين عليها عشان كان لازم يمشي علي مزاجهم..بس هل لو عمرو كان سمع كلام اللي هاجموا في بدايته كان هيوصل للي وصله دلوقتي كان هيبقي عمرو دياب اللي نعرفه اللي بيغني من 25 سنة وماحدش عارف ينافسه او يكسره ولو كان فكر يرد علي الهجوم ده كان هيبقي زي ما هو دلوقتي ..كل واحد هاجم عمرو في بدايته يا اما اتنسي واختفي وراحت عليه يا اما عايش وبيحلم انه يتصور معاه.

أنا كمعجب من ملايين المعجبين بعمرو بتمني انه يصور البرنامج وبتمني انه اشوفه لانه وحشنا بجد وكلنا عارفين ابتعاده عن وسائل الاعلام اللي غبره بيتخانق عشان يظهر فيها انشالله لو هيتكلم في الطبيخ..انا كمعجب من نفس ملايين المعجبين منتظر اعرف ازاي فضل يغني طول المدة دي وهو أول في كل حاجة..انا كمعجب من نفس ملاييين المعجبين هما هما مؤمن ان رأيي يعادل رأي 100 ناقد فني انا وغيري من جمهوره لان احنا اللي هنتفرج واحنا اللي هنحكم واحنا اللي بنحبه بجد من غير ماحد يدفعلنا فلوس مقابل الحب ده.

اتعودنا ان اي خطوة بياخدها الهضبة لازم يصاحبها هجوم وبعدين نشوف غيره بيعملها ويتمدح لكن المرة دي الهجوم كان غريب وسبق الحدث صاحب الهجوم اللي هو البرنامج وقالوا ده برنامج وحش ومالوش لازمة وزي الزفت ومش هينجح والكل اتخلي عن عمرو!..كل ده اتقال والبرنامج ماتذعش وصحيفة من اياهم راحت تاخد رأي المطربين المنافسين في منافس ليهم (علي المستوي الفني مهو الحكاية مش حرب عصابات) وقالتلهم ايه رأيكم في البرنامج الوحش ده؟!..وعلي حسب الصحيفة محمد منير قال بما معناه هو جيفارا عشان يقدم قصة حياته؟!..شوفتوا مطرب بيستحقر مهنته بالشكل ده وباصص ليها علي انها مهنة تافهة ومالهاش لازمة وكل اللي فيها حياتهم بلا قيمة مادام اللي بيشتغلوا فيها ماهماش مناضلين عسكريين..ولو تم قياس كل المهن علي نفس الشاكلة بتاع منير يبقي كل مهن العالم حقيرة!!!

من امتي اللي هاجم عمرو دياب كان صح ومن امتي وهو بيطلع غلط..مش هو ده عمرو اللي بيعلقوا نجاحه علي شماعة الذكاء عشان يخبوا الحقيقة انه موهوب..ليه بتهاجموا عشان فكر يعمل حاجة خاصة بيه وهيقدمها لجمهوره وعايز يقولهم شوفوا المطرب اللي بتحبوا حصلوا ايه طول تاريخه ولا لازم يستني اما يموت ويجي غيره يعمل مسلسل وبرامج ويزوروا في تاريخه ويلفقوا ويقولوا اللي علي مزاجهم زي ما حصل مع تاريخ حليم وسعاد حسني اللي جوزوهم لبعض في مسلسل السندريلا وماجبوش سيرتها في مسلسل حليم.

واذا كان هناك البعض رفض الظهور في البرنامج او تخلي عنه زي ما بعض الجرايد قالت هل عمرو دياب باسمه وتاريخه محتاج لحد في البرنامج..كل الناس بما فيهم اللي بيهاجموا عارفين كويس ان عمرو لو عمل البرنامج وطلع هو لوحده يتكلم فيه ويحكي قصص وحواديت الناس هتقعد تتفرج والبرنامج هينجح وهيكسر الدنيا..الكل عارف كده والكل بيعمل نفسه أهبل عشان يعرف يهاجم ويلاقي اللي يكتبه ويبيع.

باسم كل محب وعاشق للهضبة بنقول منتظرين البرنامج وطول ماحنا بنحبك اوعي تبص لرأي ناس عمرها ماحبتك ولا حبت نجاحك عشان نجاحك بيدايقهم وبيجي عليهم بخسارة وبيعطل مصالحهم..استمر

مطرب لم تصنعه شركة ولكنه صنع شركات

عمرو دياب علي مدار تاريخه اللي وصل 25 سنة لم يسجل في تاريخه الا 3 شركات فقط هما صوت الدلتا وعالم الفن وروتانا وده شئ يحسب لعمرو وان دل علي شئ يدل علي انه مطرب بيهوي الاستقرار.

كل منتج تعامل مع عمرو عرف انه معاه سلعة جيدة وكان بيحاول يستفاد منه بقدر الامكان ماكنش في منتج بيبخل علي عمرو باي اموال لانه عارف فلوسه رايحة فين وهترجع ازاي وكام؟

ودلوقتي وبعد مانتهي عقد عمرو مع روتانا بدأ كل منتج يحلم بوجود عمرو معاه من تاني مع دخول منافسين جدد زي جود نيوز وام تي في وميلودي ميوزيك واوه ميوزيك وكان لازم نفتح موضوع شركات الانتاج لسبب بسيط ان كل واحد بيقول انا اللي عملت عمرو دياب وبعض الحاقدين سواء من النقاد او الوسط الفني بيقولوا عمرو صناعة دعاية وانتاج وسبب تربعه علي القمة هي الدعاية اللي بتتوفرله فكان لازم نتكلم عن الشركات والمنتجين وشوية عن المطربين.

نصيف قزمان شايف ان هو سبب وجود ونجاح عمرو دياب ومحسن جابر شايف ان هو اللي وصل الهضبة للعالمية وان هو اللي خلاه رقم واحد في الوسط الفني طيب لما الحكاية بالفلوس والدعاية والانتاج ليه المنتجين دول ماعملوش عمرو دياب تاني وهل عمرو دياب كان المطرب الوحيد اللي موجود في شركاتهم وليه اموالهم اتسببت في نجاح عمرو وخلته رقم واحد ونفس الاموال دي ماقدرتش تعمل ده مع باقي مطربين الشركة ليه شركة صوت الدلتا ماطلعتش الاسم اللي يقدر ينافس او الاسم اللي يتقال عليه من الصف الاول بعد رحيل عمرو وغاب اسم الشركة فترة طويلة عن الساحة الي ان ظهر محمد حماقي بعد سنوات طويلة وبدأ يستعيد بعض بريقها لكن لايقارن بنفس البريق اللي كان عمله عمرو للشركة..عمرو مع نصيق قزمان كان ديما البوماته بتحقق اعلي مبيعات وكانت مزيكته بتحمل صدمات موسيقية ومختلفة عن الموجود في نفس الوقت بتاعها زي ميال ويلوموني وشوقنا ومتخافيش وحبيبي وكان الشباب بيستنوا البوماته واغانيه واللوك بتاعه عشان يقلدوه وكانت حفلاته بتحقق اعلي نسب حضور وكان ديما صاحب الاجر الاعلي ولما محسن جابر اتعرف عليه عرف ان عمرو هو فرس الرهان اللي ديما بيكسب وعرف ان وجوده مع غيره هيكون خسارة ليه واتعاقد عمرو مع عالم الفن وخفت بريق صوت الدلتا وبدأ يصعد بريق عالم الفن ..يعني عمرو دياب راح عالم الفن وهو رقم واحد بالفعل في مصر راحله وهو ناجح ومش منتظر منه الا مجرد الانتاج والقيام بنفس الدور اللي كان بيقوم بيه نصيف قزمان اللي عجز عن عمل عمرو دياب اخر بعد ما سابه 

وبدأت الرحلة وصعد اسم عالم الفن بشدة وبدأت تجذب المطربين الكبار لاحساسهم بثقة في الشركة عشان فيها واحد باسم عمرو دياب اللي يعتبر علامة الثقة لاي مطرب حابب يتعاقد مع اي شركة ونال عمرو الميوزك اورد مرتين مع الشركة وصعد اسمه اكتر مش بس ع المستوي المحلي ده كمان علي المستوي العالمي وكل ده وشركة محسن جابر فيها اسماء لامعة كتير زي راغب علامة وهشام عباس ومصطفي قمر وسميرة سعيد ونوال الزغبي وغيرهم كتير ومع ذلك عمرو كان هو رقم واحد في كل شئ لحد ماجه وقت الرحيل وساب عمرو الشركة وراح روتانا عشان يبدأ صفحة جديدة بطموحات اكبر وقال وقتها محسن جابر انه قادر يعمل كتير زي عمرو وان عمرو هيندم وان هو اللي عمله..وبدأت اسهم عالم الفن في التراجع وبدأ المطربين الكبار يرحلوا منها واحد ورا التاني واغلبهم كان بينضم لنفس الشركة اللي راحها عمرو وماقدرش محسن جابر يدمر عمرو ولا عمرو ندم ولا محسن جابر طلع مطرب يعادل ربع اسم ومبيعات وشعبية عمرو لحد مانتهي عقد عمرو مع روتانا ورجع محسن جابر يفاوض عمرو دياب وفآخر لقائاته التليفزيونية مع مني الحسيني ببرنامج نأسف للازعاج قال انه حاطط ميزانية مفتوحة لعمرو مقابل رجوعه للشركة!!!

بعد ما وقع عمرو لروتانا ظهر مديرها العام سالم الهندي وقال انه كده قدر يملك المطرب الاعلي شعبية في الوطن العربي وكتبوا اخر سطر في حرب المنافسة المشتعلة بينهم وبين عالم الفن بعد ماتملك اكتر من 50% من قوتها المتمثلة في عمرو دياب وانتج عمرو مع الشركة 3 البومات ..مع اول البوم مع الشركة "ليلي نهاري" كان واضح انهم في الشركة مش متعودين علي الكم ده من المبيعات فصرح وقتها سالم الهندي وقال ان الالبوم حقق اعلي مبيعات في تاريخ الشركة وفي تاريخ الوطن العربي بما فيها البوم نور العين واللي كان يعتبر اعلي البوم محقق مبيعات في الوطن العربي ويظهر ان سالم الهندي كان وقتها مش عامل حسابه علي الميوزك اورد اللي لاول مرة دخلت فيها الشركة وفازت بيها اليسا في واقعة غريبة وكانت محاطة بشكوك كتير وحطت وقتها سالم الهندي في موقف حرج فتفادي النوعية دي من التصريحات بعد كده حتي مع البوم عمرو نفسه ومافازش عمرو بالاورد مع الشركة الا بعد ماسابها -بعد ماشترتها روتانا لاليسا مرتين علي التوالي- وكان عن البوم الليلادي وفشلت الشركة وقتها في شرائها لوائل كافوري.

بعد كل ده نقدر نقول ان عمرو نجح مع كل الشركات وفضل رقم واحد في الوطن العربي بمبيعاته ومزيكته واغانيه واجره وحفلاته وكل الشركات دي مانجحتش انها تطلع عمرو دياب تاني لان مفيش عمرو دياب تاني زي ما هو مفيش عبد الحليم تاني ولا ام كلثوم تانية لكن فيه مليون شركة انتاج يقدر ينجحها وجود الهضبة معاها.

ياتري عمرو هيكمل مشواره الجاي مع مين؟