محدث-لأول مرة بدار الاوبرا المصرية

يظهر ان عام 2008 هيبقي عام حصد النجاحات الكبيرة اللي حققها عمرو في 2007 واهمها تحقيق اعلي مبيعات وفوزه بالاورد وحصوله علي لقب احسن مطرب في اغلب وأهم الاستفتائات..عمرو بيعيش جو النجاح والنضوج والتألق في المرحلة الحالية وبدأ بتلبية مطالب الجماهير واللي كان اغلبها بيتركز في الظهور الاعلامي فقرر يظهر في برنامج بيتكون من مجموعة حلقات..وتلبية طلب كتير من جماهيره في تقديم اغنية وطنية..واخيرا تقديم مجموعة حفلات في كل البلدان والعواصم اللي غايب عنها من سنين..
والمفاجأة هتكون حفلة خيرية في دار الاوبرا المصرية لأول مرة تحت رعاية السيدة سوزان مبارك يوم 20/6/2008 وارباحه هتكون تبرع لاقامة مجموعة من المدارس الحكومية.

تم إلغاء الحفل..

الهضبة يختتم فعاليات مهرجان صيف عمان

يظهر ان عمرو بدء يرجع لعادته القديمة وعمل حفلات في مختلف البلاد العربية والاجنبية اللي غاب عنها من مدة طويلة واللي كان اخرها في المغرب بعد غياب دام 16 سنة..ده بالاضافة لحفل ابو ظبي اللي اتلغي لاسباب تنظيمية وجولته الغنائية في امريكا وكندا واللي ماتحددلهاش معاد محدد لحد دلوقتي بسبب مشاغل عمرو المتعددة وخاصة ان الحفلات دي هتكون محتاجة لتفرغ لعدة ايام لاحياء مجموعة حفلات عكس الحفلات العربية اللي بتقتصر علي ليلة او ليلتين..عمرو بدء يشعر بمدي تقصيره تجاه جماهيره في البلاد دي.

وبعد غياب 5 سنين عن جمهور الاردن قرر يرجعلها من خلال مهرجان صيف عمان اللي هيكون في الفترة بين 8/7/2008 الي 9/8/2008 من تنظيم هيئة تنشيط السياحة الاردنية..اماكن الحفلات في المسرح الجنوبي في مدينة جرش ومسرح جبل القلعة في عمان ومنطقة بانوراما البحر الميت...
حفل عمرو هو حفل الختام يوم السبت 9/8/2008 الساعة 8 ونص بمدرج جرش.

عمرو عنده شعبية كبيرة في الأردن ويعتبر التيشيرت اللي ظهر بيه في كليب انا عايش هو اغلي تيشيرت بالاردن وانتشر بين الشباب الاردني بكثافة اكبر من انتشاره في مصر.

مزج الرياضة بالفن

ديما في حوارات عمرو مع الصحف والمجلات المختلفة بيتكلم عن الرياضة وبيحس الشباب علي ممارستها واهميتها ويمكن بتكون موجودة في اكتر من 60% من حواراته الصحفية ، واذا سؤل عن رشاقته وحفاظه علي شبابه الدائم بيقول الرياضة السبب وانه بيمارسها يوميا بمعدل من ساعتين الي 3 ساعات .. والهضبة يعتبر من اول المطربين علي مر تاريخ الغناء العربي اللي يظهرله صور وهو بيمارس الرياضة بشتى انواعها سواء السباحة او رفع الاثقال او كرة القدم والاسكواش ده بالاضافة لصوره مع بعض اصدقائه الرياضيين زي محمد عبد المنصف وحازم امام وكرم جابر وعالميا تايسون الملاكم الاسطوري واللي قدر يكون معاه صداقة في خلال وجوده في موناكو لاستلام اول ميوزك اورد عن البوم نور العين ووقتها عمرو عرض علي تايسون يسلمه الاورد وهو رحب جدا لانه كان بيحب عمرو والسبب رياضي برده .. ان الاتنين كانوا بيتدربوا في نفس صالة الجيم في فرنسا قبل استلام الاورد..وده يدل علي حرص عمرو علي الرياضة حتي وهو بعيد عن بلده.
ولان عمرو بيسافر كتير فليه بيوت في بلاد مختلفة زي لبنان ودبي بالاضافة لمصر فبيحرص ان يكون فيها صالة جيم مجهزة بأحدث الوسائل الرياضية.

الرياضة بقيت بالنسبة لعمرو رسالة عايز يوصلها للجمهور وعشان كده ماكتفاش بالكلام عنها في حواراته الصحفية وحب يطور الفكرة اكتر وتبقي من خلال برنامج تليفزيوني وكان برنامج "سكوت هنغني" واللي يعتبر اخر برنامج ظهر فيه عمرو وكان عام 2003 وظهر طول البرنامح وهو بيمارس الرياضة في صالة الجيم اللي في قصره .. واستمرت الفكرة تطور في راس عمرو فقرر انه يقدمها في كليب من كليباته ويضيفها مع البومه فظهر بلوك رياضي عام 2004 علي غلاف البوم ليلي نهاري وهو مفتول العضلات ولابس زي رياضي (كت) وظهر بنفس اللوك في كليب ليلي نهاري وركزت الكاميرا اكتر من مرة علي عضلات عمرو وظهر وهو بيمارس الرياضة في الكليب علي البحر وكانت طفرة وقتها اتهاجم عليها والبعض قال انه الغنا بقي بالعضلات والبعض زود وقال ده عمرو نافخ عضلاته .. ومن الجمل الشهيرة اللي اتكتبت عن اللوك اللي ظهر بيه عمرو كانت للناقد الفني اشرف عبد المنعم في تحليل البوم ليلي نهاري بالاهرام وكانت بتقول:
‏*‏صورة الغلاف‏,‏ علي جودتها‏,‏ تؤكد أننا قد تجاوزنا عصر‏(‏ المطرب العاطفي‏)‏ ذلك اللقب الذي كان المطربون يتوقون الي الحصول عليه في الماضي‏,‏ وبلغنا عصر‏(‏ المطرب الرياضي‏)‏ بدلا منه‏!!

وكالعادة صدر مجموعة البومات بعد البوم ليلي نهاري لمطربين تانيين وهما بنفس اللوك والتيشيرت الكت واخرهم كان حماقي في البوم "خلص الكلام" وطبعا ماحدش اتهاجم منهم غير عمرو ! .. ده غير مجموعة كليبات لمطربين تانيين وهما بيمارسوا الرياضة زي فرقة واما ماعملت في احد كليباتها.

ممارسة عمرو للرياضة بدأت من سنين وهو في بداياته وحس بقيمتها الكبيرة واهميتها بالنسبة لعمله لحفاظه علي جودة صوته وشبابه الدائم واعتبارها من افضل تمارين التنفس للمطرب عشان يقدر يغني اصعب الالحان ده غير انها كانت سبب الوصول بيه لجسم مثالي بعد ماكان اتعرض لزيادة وزن في منتصف التسعينات ، فاصبحت بالنسبة له رسالة استمر في تطويرها الي ان وصل للشكل اللي تم شرحه ولازال عنده طموح انه يطورها اكتر وده اللي هيخلينا نستني نشوف اللي هيقوله عمرو عن الرياضة واهميتها في مشواره الفني في برنامج مشوار حياته بعد ما قدر انه يضيف الشكل الرياضي للمطرب ويبقي قدوة لجيل كامل موجود واجيال لسا هتيجي.

الهضبة

من الألقاب المحببة لجمهور عمرو واللي بيلقب بيها مطربه هي الهضبة..واللقب محبب لعمرو نفسه وبيحب الناس تناديه بيه سواء فريق العمل او جمهوره..والاسم طلع علي عمرو من خلال أصدقائه تعبيرا عن مكانته في الوسط الفني وشعبيته ونجوميته..وأكيد الجمهور وفريق العمل مش هينادوا عمرو باسم وحش او يوصفه علي انه صنم ومن تراب مش من لحم ودم وأكيد عمرو نفسه ماكنش هيحبه..ولا إيه؟!

الهضبة مصطلح جغرافي ومعناه اعلي قمة في وسط المرتفعات المحيطة بيها وماحدش يقدر ينكر انه اللقب ينطبق علي عمرو وخاصة وانه محتل القمة من سنين وهو اعلي واكبر نجم شعبية وهو اعلي النجوم مكانة..وحقق اللي ماحققوش أي حد.

اما عن مقارنة لقب الهضبة بلقب العندليب واتخاذ بعض التشبيهات او المقارنات وتظبيطها علي اساس تظهر لقب الهضبة علي انه لقب وحش فكل ماقيل عن لقب الهضبة يمكن ان يقال مثله عن لقب العندليب واكتر..فاذا كان كوكب الارض ملئ بالهضاب والجبال والمرتفعات فانه ايضا ملئ بملايين الطيور وما علي شاكلتها كالعندليب..كما ان لقب الهضبة لا يشير الي القسوة بقدر مايشير الي القوة والفرق بين المعنيين كبير واذا نظرنا الي لقب العندليب من نفس المنظور سنجده يشير الي الضعف وقلة الحيلة ويقلل من شأن مطربه وكان من الواجب ان نطلق عليه لقب النسر او الصقر ليتناسب مع مكانته في عالم الغناء وخاصة أن هذا اللقب سوف يقلل من شأن عبد الحليم حافظ بجلالة قدره!!!..وإذا كنا نعتلي الهضبة ونبني فوقها ونسكنها كما انها مهددة بالانهيار فان العندليب يسهل صيده ببندقية رش (من اللي العيال الصغيرة بتلعب بيها) وحليم لم يستطع احد ان يصيده قط او يحتل مكانه!!..ولو كانت الهضبة صماء خرساء لا تتكلم والعندليب يغرد ويتناسب مع مهنة الغناء فماذا عن لقب أم كلثوم والذي يطلقه عليها محبيها وهو كوكب الشرق أم أن الكواكب في ذلك الوقت كانت تنشد وتغني وتغرد وبالمرة بتطير زى العندليب ولا هو أصلا يعني إيه كوكب الشرق..وهو في كواكب في الشرق وكواكب في الغرب؟!!!

عمرو دياب لم يطلق علي نفسه لقب الهضبة حتى يستعرض عضلاته علي أقرانه من الفنانين وإنما من أطلقه عليه هم اصدقائه والمقربين منه وأحبه جمهوره إيمانا بنجوميته وشعبيته ومكانته اللي قبل ما تكون في الوسط الفني فهي مكانته في قلوبهم وحبهم ليه واللي مش بيقارن بحب أي جمهور تاني لنجمه..من حق الجمهور انه يلقب مطربه باللي بيحبه ومن حقه أن يشعر بالفخر عندما يهتف بهذا اللقب وإذا كان اللقب استفز البعض فهو ماستفزش إلا كارهي نجاح عمرو دياب..ومش عايزين حد يخترع لنا لقب..ومكتوبة بالخط الأحمر!!!!

لا يوجد جولات فنية الشهر المقبل

علي عكس ما اشيع في بعض الصحف و المجلات و مواقع الانترنت..لايوجد اي جولات فنية للفنان عمرو دياب الشهر المقبل في امريكا وكندا وان كان في اتفاق ودي بين عمرو والشركة الراعية علي اقامة جولة فنية لكن عمرو ماحددش المعاد النهائي بسبب انشغاله في عدة اعمال...

موقع عالم عمرو دياب في كفة والباقي في كفة

الجمهور اختار موقع عالم عمرو دياب افضل موقع للهضبة بنسبة 54% متفوق علي باقي المواقع المشاركة في الاستفتاء واللي مجموعها كلها علي بعض ماجبش نسبة الموقع الرسمي..عالم عمرو دياب مش مجرد موقع لمعجبين الهضبة ده بيت بيجمع جمهوره كله لان لو علي المواقع فيه مئات المواقع والجروبات للهضبة علي الفيس بوك لكن عالم عمرو دياب حاجة تانية ممكن يقفل اكتر من سنة زي ما هو حاصل دلوقتي ومع ذلك يفضل الاول ويفضل اكبر مكان بيستقطب جمهور الهضبة عشان يكونوا اعضاء فيه يعني من الاخر الموقع بيستمد قوته من جمهوره عشان كده المنتدي يعتبر هو عصب الموقع ومصدر قوته ونقطة القوة اللي الادارة بتتحرك علي اساسها..لو عمرو دياب عمل حفلة خاصة تلاقي اعضاء الموقع بيتسابقوا عشان يصوروها وبيحاولوا يخدوا اروع اللقطات والمشاهد لعمرو ويسجلوا كل حركة بيعملها علي امل انها تبقي حاجة حصرية او وهمية يهدوها للموقع وفي النهاية بتنزل علي المنتدي وبس..من اكبر عيوب الموقع ان الادارة ديما بتستخدم اسلوب التعتيم علي قرارات معينة او بتفصل الاعضاء عن النواحي الادارية واللي ظهرت بشدة لما الموقع اتشالت عنه الرسمية الادارة ماوضحتش اي حاجة وكتبوا كلمتين علي الصفحة الرئيسية ولما حد يسأل يقولوا هو ده اللي عندنا ونقدر نقوله..عالم عمرو دياب كسب الاستفتاء ومفيش صفحة رئيسية من حوالي سنة..وكل مازادت المدة كل مازاد العبء علي ادارة الموقع انها تقدم حاجة احسن وتستحق المدة اللي اتقفلها وقبل ده كله حاجة تناسب صبر الناس دي وثقتها فيهم.

في المركز التاني اتساوا في الترتيب موقع شارع عمرو دياب وموقع عمرو دياب دوت نت بنسبة 19%..وموقع شارع عمرو دياب بقي ده حاجة تانية يعتبر اكبر مكتبة ميديا لعمرو علي النت وعلي النقيض تماما من موقع عالم عمرو دياب لازم الادارة هي اللي تقوم بكل حاجة يعني تصور الحفلات وتنزلها علي السايت اللي يعتبر رقم واحد في اولويات الادارة يليها المنتدي لان ده شغلهم ولانهم بيسعوا لتقديم كل ما هو جديد وحصري لجمهور عمرو وبيصوروا بعض الافراح اللي بيغني فيها عمرو وده يعتبر مجهود غير عادي من الادارة وخاصة ان الافراح من المفترض انها بتكون خاصة وممكن تسببلهم بعض الاحراج لكن الاكيد ان ده مش عيب لان مواقع النت حاليا قانونيا بتعامل معاملة الصحف والاعلام وزي مالصحف والمجلات او القنوات بتصور افراح لفنانين او رجال اعمال من حق المواقع انها تعمل كده..الصفحة الرئيسية للموقع ديما بتتميز بالبساطة بعيد عن التصميمات المعقدة او المبهرة لان محتوي الموقع من حفلات واغاني وصور يعتبر الاهم.

موقع عمرو دياب دوت نت يعتبر من اقدم المواقع لعمرو وعشان كده البعض كان بيعتبره الرسمي والموقع حاليا بيتميز بصفحة رئيسية شكلها شيك لكن الموقع عموما دلوقتي مابقاش زي الاول لكن قدر انه يتساوا مع موقع شارع عمرو دياب في المركز التاني وده يحسب ليهم مقارنة بالمجهود المضني اللي بتعمله ادارة شارع عمرو دياب والمجهود المتواضع او ربما المعدوم في الفترة الاخيرة من موقع عمرو دياب دوت نت.

علي استحياء ومن بعيد احتل موقع عمرو دياب ليجند المركز الرابع بنسبة 5% وموقع عمرو دياب انفو في المركز الخامس بنسبة 1%.

عمرو واحد مننا

من اعنف واقوي الثغرات اللي بيستغلها اعداء عمرو للهجوم عليه انه مش بيقدم اعمال وطنية كأنها سنة او فرض ولازم يعملها وكأن اي مطرب لازم يغني للوطن سواء بمناسبة او بدون واذا ماعملش الاغنية ام 4 دقايق دي يبقي مطرب وحش ومش وطني لان المطربين او بمعني اصح عمرو غير كل الناس وطنيته بالاغاني لان في مطربين كتير ماقدموش اغاني للوطن ومع ذلك بيتمدحوا من نفس الناس لانهم مش عمرو دياب.

وكعادة عمرو مش بيقدم اي حاجة لمجرد الرد او من النوع اللي بيضعف قدام الهجوم او بيرضخ لحد ولازم قبل مايعمل اي حاجة يكون حاسس بقيمتها وعارف هو بيعمل ايه وقبل ده كله امتي يعملها ولما جه الوقت المناسب قدم عمرو واحدة من اقوي الاغاني الوطنية في تاريخ الاغنيات الوطنية وفي الوقت اللي بيتزامن مع احتفالات ميلاد رئيس جمهورية مصر العربية محمد حسني مبارك اللي سبق وغناله لو فين هتروح تلاقي 60 مليون فدائي ايام ماكانت مصر 60 مليون..دلوقتي بقينا 80 مليون فدائي يعني لو واحدكح في وش ريسنا يبقي عيب علينا.

فريق العمل
كلمات:مدحت العدل
ألحان:عمرو دياب
توزيع:حسن الشافعي
الكليب من اخراج شريف صبري المتميز في النوعية دي من الكليبات واللي سبق وقدم مع عمرو اغنية القدس دي ارضنا والعائد للتعاون مع عمرو بعد غياب من اخر كليب جمعهم "ولا علي باله" وركزمن خلالها علي النماذج المشرفة في تاريخ مصر ولم يخجل عمرو بانه يضع محمد منير في كليب خاص بيه وبيظهر قبل منه احتراما لتاريخه وتقديرا لهذا النجم الاسطوري وياريت المطربين الشباب يتعلموا من عمرو.

محدث-متابعة لمشكلة الموقع الرسمي من الألف الي الياء

في حالة حزن بين جمهور عمرو دياب في الفترة الحالية راجعة لاختفاء الموقع اللي المفروض انه بقي رسمي (واللي مش معروف اذا كان فعلا بقي رسمي ولا لسا المفاوضات شغالة اللي اعلنوا من الاول انها قاربت علي الحسم يعني المفروض انها لم تحسم نهائيا) بعد يومين تلاتة من اعلان الخبر اللي اسعدهم وبعد مناقشات طويلة عن موضوع ضم كل مواقع عمرو دياب في موقع واحد تحت ادارة الموقع الرسمي لكن اللي حصل قفل الموضوع بدري ونهي كل المناقشات..و نتمني ان يتم وضع نقطة سرقة لنكات الموقع والهاك اللي حصل عليه في الاعتبار اثناء اعادة فتح موضوع تسليم كل المواقع للموقع الرسمي والتفكير في عواقب اي هاك تاني علي السايت في حالة عدم وجود اي سايت تاني.

الكلام عن الهاك الحالي لازم يتطرك لمواقف حصلت قبل كده اتعرض فيها السايت لهاك وكان اخرها في الفترة اللي كان لازال طنطاوي مدير السايت فيها ويومها عمل اعلان وصف فيها الاشخاص الحقيرة دي بالفشل والغباء وتحداهم بنبرة عنيفة في الكلام الي ان ترك طنطاوي الادارة لاول مرة باعتباره كان الوحيد اللي استمر في السايت من البداية للنهاية لحد اللحظة اللي سابوا فيها مع الوضع في الاعتبار انه افراد الاداة اتغيروا اكتر من مرة والجمهور اعتقد انه بالاعلان ده السايت بعيد المنال عن اي محاولة سرقة وانه حصين ومنيع ومشيت الاحداث كما سبق ذكرها..وفي وسط الفرحة الناس صحيت لقيت الموقع مش موجود ع النت واعلنت الادارة ان اللنكات مش بتشتغل وهما بيحاولوا يرجعوها كنوع من التجميل لكلمة اتسرقت او اتعمل هاك علي السايت والكلام الجامد ده..ولما اتاخر ترجيع اللنكات اعلنت الادارة التالي:

وصل فريق عمل عالم عمرو دياب بدعم من الفنان عمرو دياب إلي شكل
نهائي في المناقشات مع شركة النطاقات, وفي أنتظار القرار الأخير بنهاية الأسبوع
بأقصي تقدير سوف نستخدم الأجراءات القانونية أو نسترجع النطاقات أن شاء الله..في
النهاية في حالة أتخاذ الأجراءات القانونية فا من المتوقع أن يستغرق الحل
القانوني حوالي شهرين - وفي أي حال مهما أستغرق الأمر نعدكم بالعودة من أجلكم
أن شاء الله.

بعد الاعلان بدأ الموقع يظهر عليه عبارات غريبة..الاولي كانت بتحمل سخرية غير مفهومة وغير محددة:

وده قبل مايظهر رسالة تانية بتحارب الارهاب في شخص بن لادن:

الاعضاء اللي في الموقع افتكروا ان السايت ببياناته اتسرقت فظهر تاني اعلان من ادارة الموقع وكان كالتالي:

رداً علي التساؤلات العديدة حول أذا ما كان قد تمت القرصنة علي الموقع والبيانات
الخاصة به, أحب أن أطمئن الجميع أن جميع البيانات والمعلومات الخاصة بالموقع في حفظ
تام ولم يتم المساس بها وحول أشارة البعض أن الرسالة الظاهرة علي الصفحة الرئيسية
هي نتيجة قرصنة الشخص ذاته المحول له الدومينات أود أن أوضح بأن هذه الرسالة ليست
نتيجة أي قرصنة علي الموقع أطلاقاً, فالرسالة مكتوبة ربما تكون ضمن صلاحيات الدومين
التي توفرها الشركة المضيفة للدومين لتوضيح حالة النطاق, فالبعض مثلاً يكتب الموقع
تحت الأنشاء أو محجوز أو ألي ماذلك من رسائل لا علاقة لها بسيرفير أي موقع - ولا
علاقة لها ببيانات موقعنا ماحدث لنطاقات الموقع لا علاقة له بأي نوع من القرصنة ,
ماحدث عبارة عن عملية نصب وسرقة وتزييف لبيانات و وقائع وجاري التعامل معها هذه
الرسالة للتوضيح فقط وطمئنة السادة الأعضاء بعد وصول العديد من الأستفسارت عن
بيانات الموقع.

والي هذه اللحظة مازال كل شئ متوقف محلك سر ومفيش اي خطوة ايجابية ظهرت..ياتري الموقع الرسمي هيفضل يحارب الارهاب لحد امتي؟!

--------------------

أخيرا عادة الصفحة الرئيسية للموقع من جديد واستطاعت ادارة الموقع بمساعدة الفنان عمرو دياب استرجاع الموقع بدون خساير وهيتم افتتاح المنتدي بتاريخ 1 مايو 2008 الساعة الثانية صباحا..مبروك

أعضاء الموقع تسلموا رسالتين بنفس المضمون..وكانت الاولي:

يشرفني أن أبلغكم بخبر رجوع الموقع مرة أخري بفضل الله وأن شاء الله
سيعود للعمل كاملاً خلال ساعات قليلة..نود أن نشكر الفنان العالمي عمرو دياب علي
المجهود الكبير والمساعده اللي قدمها لنا علشان الموقع يرجع تاني

شكراً جميعاً علي صبركم ومساعدتكم.

اما الثانية كانت رسالة شخصية من وليد مدير الموقع:

مبروك لكل عشاق عالم عمرودياب تم اعادة السايت مرة اخرى وفى خلال
ساعات قليله سيعمل كما كان بشكر ربنا كتيييييييييييييييييراللهم لك الحمد كما ينبغي
لجلال وجهك وعظيم سلطانك وبشكر حبيبي الفنان عمرودياب اللى لولاا تدخله الشخصي ما
كان عاد عالم عمرودياب مبرووووووووووووووووووووووووووووك

وليد مصطفى

حمد الله علي سلامة الموقع وان شاء الله يتفادي السلبيات اللي اتسببت في المشكلة دي وكويس انها جت في البداية والموقع بيعلن انه بقي رسمي مش بعد مابقي في ذروة الرسمية كانت ساعتها هيبقي شكل الموقع وعمرو نفسه مش ظريف في وسائل الاعلام وخصوصا ان العين هتبقي عليه.

عبد الحليم حافظ وملك الجيل

في عز تألق حليم ومع بداية دخوله في الاربعينات بدأ البعض من اياهم من الموجودين في كل زمن وكل خرابة يتكلم عن سنه وانه ماعدش ينفع يغني اغاني عاطفية ولا بقي فتي احلام البنات وكان ديما حليم علي عكس ما بيعتقد البعض دائم الهجوم عليه من بعض القلة او المرتزقة او برده الشلة اياها اللي موجودة في كل زمن وخرابة ووصلت الاشاعات والهجوم الي حد التشكيك في مرضه وكانوا بيقولوا انه بيدعي المرض عشان يكسب تعاطف الناس ويفضلوا يحبوه ويساندوه وكانوا بيشككوا في سفرياته اللي كان بيسافرها عشان يتابع حالته ويتعالج من البلهارسيا وكانوا بيقولوا انها رحلات بيروح يتفسح فيها او يشتري آلة جديدة.

حليم كان زي اي نجم الصحافة والاعلام بتحب تجني من ورا اسمه المال من خلال اي خبر عنه او هجوم عليه للفت النظر تقوم الناس تشتري المجلة او الجريدة اللي نشرت الاشاعة او الهجوم عملا بمبدأ "الخبر مش ان كلب يعض انسان لكن الخبر ان انسان يعض كلب" وده مثل صحفي شهير بيتقال لاي صحفي مبتدأ ويا حبذا لو في مجلة صفرة .. يعني من الاخر لو واحد واقف قدام كشك الجرايد لقا مجلتين جنب بعض والاتنين علي غلافهم صورة عمرو دياب, واحدة عنوانها عمرو دياب ملك الغناء والتانية عنوانها عمرو دياب جاسوس لاسرائيل ياترى مين اللي هتبيع اكتر ومين اللي هتثير فضول الناس؟!! الطبيعي ان مجلة تكتب عمرو دياب ملك الغناء او عمرو الاسطورة او حوار مع عمرو مهو كل الناس عارفة الكلام ده لكن الغير طبيعي انك تلاقي مكتوب انه جاسوس ، جديدة عليك .. بتطلع الفلوس وتشتري المجلة وتقرا ياسيدي عن الجاسوس !

 

ومع وصول حليم ودخوله في الاربعينات ونجاحه وتربعه علي عرش الغناء وتفكير البعض في خليفة حليم واعتزاله كالعادة برده .. ظهر مطرب جميل وسيم صوته حلو اسمه هاني شاكر اتعرف بين الناس كويس وبدأ البعض يقول عنه خليفة حليم وهو مطرب الايام الجاية .. من الاخر قالوا عنه "ملك الجيل" وبدأت تطلع اشاعات عن ملك الجيل زي انه هاجم حليم في حوار وانه خطف الاضواء عنه والمقالات تنزل عن ملك الساحة القادم واغانيه اللي جذبت البنات وشدتهم وعجبتهم وسنه الصغير .. ونجح واشتهر بأسهل الطرق اسرع مما تخيل .. وحليم مايردش وبيتكلم بشغله بس واعماله اللي كانت بتحقق النجاح اللي مش بيحققه اي حد تاني لحد ما رحل حليم والكل بص لملك الجيل بتاع زمان اللي بدأ يعيش دور حليم زيادة عن اللازم (باعتباره الخليفة المنتظر) من اول اللبس وطريقة الغناء والوقوف ع المسرح وكملها بانه بقي يغني لحليم بعد رحيله!!

 

مرت الايام ووصل سن هاني شاكر للخمسينات من عمره ولازال بيغني لحليم في حفلاته .. مرت الايام لحد ماشاف ملك الجيل الجديد!!

عمرو دياب بالمغرب أخيرا

عمرو هيحيي حفل لجمهوره الكبير بالمغرب في مهرجان موازين بالرباط تحت الرعاية السامية لجلالة الملك محمد السادس واللي هيقام في الفترة بين 16 الي 24 مايو..وحفل عمرو هيقام يوم الاربعاء 21 مايو 2008 بساحة حي النهضة.

المغرب تعتبر تاني اعلي بلد عربي لعمرو دياب من حيث الشعبية بعد بلده الام مصر والشباب هناك مهووس بعمرو وديما بيستنوا البومه وجمهور عمرو الكبير بالمغرب ديما كان بيحلم بحفل لعمرو في المغرب عشان يشوفوا نجمهم المحبوب والمعشوق واللي يمكن ماتقلش شعبيته بالمغرب عن شعبيته بمصر.