الهضبة يمنع تسريب لو قادر ويكشف كذب الاخرين

بعد ما اعلن موقع الموزع فهد عزمه طرح البوم يضم 14 اغنية من اجمل توزيعات فهد وان الالبوم هيحتوي 3 اغاني جداد من بينهم اغنية لو قادر اللي اصبحت مطلب شعبي من الديابين رغم ان عمرو غناها مرة واحدة بس في حفلة الجامعة الالمانية كريمكس في اغنية ايام وبنعشها والكل استناها تنزل في الالبوم من شدة اعجابهم بالاغنية ولما نزل الليلادي ومفيهوش الاغنية كانت اكتر اغنية الجمهور زعل لعدم وجودها واستمر الطلب عليها من خلال المنتديات ومواقع الانترنت من الديابين والكل طالب بنزولها كسنجل والبعض تمني تسريبها لحد ماجه الخبر الوحش ان الاغنية خلاص مابقيتش ملك عمرو وخدها المطرب الشاب احمد سعد وهتنزل بصوته.

فهد ولانه موزع الاغنية قرر انه يستفاد من شعبيتها وعشق جمهورعمرو للاغنية بصوته رغم انه غناها في حفلة قرر انه ينزلها في البومه من خلال الموقع الرسمي الخاص بيه ونزل اول 40 ثانية من الاغنية كدعاية للالبوم وازداد شوق الناس ليها بعد مابهرتهم اكتر بصوت عمرو من خلال نسخة الاستوديو وفرحوا انها خلاص هتنزل وهيسمعوها وفجأة توقف كل شئ...

تدخلت الادارة الخاصة بالهضبة بعد ما نمي لعلمهم خبر نزول الاغنية وطالبوا فهد انه ماينزلش الاغنية حفاظا علي حقوق الناس المشاركين فيها وخاصة بعد ماخدها المطرب احمد سعد وبعد ما تدخل الملحن محمد يحيي ملحن الاغنية وطالب بعدم نزولها لانه ادي اللحن لمطرب اخر وزاد الضغط الديابي وعملوا جروب علي الفيس بوك يطالب عمرو بانه ينزل الاغنية بصوته .. الجروب اسمه "رساله الي عمرو دياب عاوزين لو قادر بصوتك انت" وكان ملخص طلب الجروب واعضائه التالي:

عملنا الجروب ده علشان نعلن فيه عن رغبتنا كـ ديابيه اننا مش عاوزين نسمع اغنيه لو قادر غير بصوت عمرو دياب فقط وغير كده مش عاوزينها في السوق اطلاقا.

هو ده الهضبة مهما كانت الضغوط لازم يحافظ علي حقوق الناس اللي تعبت واجتهدت عشان تعمل حاجة حلوة..هو ده الهضبة اللي بيقولوا عنه بيسرب اغانيه..وهو اللي اتهموا بتسريب اللي بيني وبينك عشان يحارب عملاقة الطرب جنات خصوصا ان تاريخها وشعبيتها الكبيرة كانت هتمثل خطر عليه بالظبط زي شعبية ملك الجيل ما بتشكل خطر عليه!!!..الهضبة رفض نزول لو قادر رغم انها مطلب شعبي لانها مابقيتش ملكه وراحت لغيره عكس اللي بيني وبينك ماحدش من جمهوره كان يعرفها او سبق انه غناها في حفلة.

تسريب مقطع من الاغنية مؤشر لتسريبها كاملة لان اللي نزل المقطع اكيد معاه الاغنية كاملة.

شاهد عمرو يغني لو قادر في حفلة الجامعة الالمانية..اضغط هنا.

الهضبة جوه قلب حسام حبيب

حسام حبيب واحد من الفنانين المحترمين وموهوب بجد وبيقدم مزيكا حلوة لفتت الانتباه ليه ونال اشادة من الهضبة علي البومه "اجمل قصة حب" قبل صدور الالبوم..الهضبة كان في الاستوديو بيجهز لالبومه وعمرو مصطفي سمعه اغاني حسام حبيب بتاع الشريط وعجبته جدا وعرف من عمرو مصطفي ان حسام عايش فترة قلق وخوف قبل طرح الالبوم فاتصل بيه وقاله انه من اكتر الناس في جيله اللي قدمت مزيكا بهرته وشجعه وقاله نزل الالبوم وان شاء الله هينجح وكان الاتصال اقوي دافع لحسام ونزل الالبوم ونجح وصرح وقتها حسام حبيب وقال ان اتصال الهضبة بيه وسام علي صدره وكأنه حضر الدكتوراة واكتر.

من هنا بدأت علاقة حسام بعمرو وبدأ يحضر معاه في الاستوديو جلسات العمل وتسجيل الاغاني وكان عمرو هو اللي ديما يحمسه انه يحضر ويجي ويتعلم منه وهنا صرح حسام انه ماشافش في حياته حد بيشتغل زي الهضبة في البومه ومش بينام طول ال 24 ساعة عشان يعمل حاجة تليق بتاريخه وترضي جمهوره ونزل البوم الليلادي وعليه شكر خاص من الهضبة لحسام وهو وقتها استغرب وقال انه كان بيحضر مع عمرو عشان يتعلم منه وفوجئ بالشكر ده.

ومع صدور البوم حسام الجديد "جوه القلب" كان في اهداء من حسام للهضبة علي غلاف الالبوم تقدرير وعرفان منه علي وقوف عمرو جنبه وتشجيعه ليه علي عكس ما بيردد اعداء عمرو انه بيحارب الجيل الجديد وكلمات الاهداء:

الى النجم عمرو دياب
الكل بيقول أن السر وراء نجاحك الكبير هو ذكائك وموهبتك.. ولكنهم لا يعرفون عن قلبك الذي تعبر عنه كل أغانيك التي تحمل قطع من روحك المليئة بالعطاء..شكرا على ما قدمته وستقدمه لنا من موسيقى عشقناها وأحببناها وصنعت تاريخ.

الهضبة يعود لجمهوره بسوريا

زي ما سبق واكدت قبل كده انه عمرو عنده رغبة يغني في كل البلاد اللي غاب عنها عشان يتواصل مع جمهوره فيها زي الاول..وبعد ما غنا في المغرب وكان مخطط انه يغني قي ابو ظبي وهيغني في الاردن..تأكد ان عمرو هيرجع لجمهوره في سوريا بعد غياب 5 سنين عنهم رغم شعبيته الكبيرة فيها.

الحفلة من تنظيم شركة إكسترا فجانزا وهتقام في فندق شيراتون دمشق يوم 6/8/2008 وهو معاد مبدئي قابل للتعديل واذا تم تعديله هينشر في حينه..وان كان اغلب الظن انها هتتم في اليوم ده بسبب استعداد عمرو بعدها مباشرة لحفله الاهم والاضخم في مارينا واللي تاكد احيائه ليه لكن ماتحددلوش موعد نهائي.

الشركة المنظمة اعلنت عن استقابل ضخم لعمرو من لحظة وصوله في المطار الي ان يحيي حفله وهيكون في مؤتمر صحفي لعمرو.

موديل "نقول ايه" في فيلم عالمي

الموديل العالمية اللي ظهرت مع عمرو في كليب نقول ايه "ناتالي مارتنز" واللي شاركته في احتفال الميوزك اورد ورقصت معاه ع المسرح وزي ما صرح عمرو بعد تصوير الكليب انها بتشارك في فيلم عالمي اعلنت الشركة المنتجة انه الفيلم هيفتتح ويبدأ عرضه في 22 اغسطس 2008..والفيلم اسمه Death Race.

مشاركة موديل عالمية زي دي مع عمرو واللي سبق وشاركت في كليبات نجوم عالميين كبار واهمهم جنيفر لوبيز ومشاركتها في فيلم عالمي حاجة تحسب لعمرو وخصوصا انه احيانا البعض بيلومه علي انه بيشرك موديلز اجانب معاه.

صورة بوستر الفيلم:

ودي مجموعة صور لناتالي بالفيلم وكليب نقول ايه والميوزك اورد ومع النجمة العالمية جنيفر لوبيز ومجموعة صور خاصة ليها.

صور ناتالي بالكليب:

صور ناتالي بالميوزك اورد 2007:

صور ناتالي مع النجمة العالمية جنيفر لوبيز:

صور ناتالي في الفيلم:

صور خاصة لناتالي:

الألبوم هيصدر العام الحالي

ألبوم الهضبة في 2008..ده مش خبر ولا شئ اكيد..ده توقع الجمهور او يمكن امنيته.

بنسبة 50% توقع الجمهور نزول الالبوم السنة دي وبفرق بسيط وبنسبة 41% كان احتمال نزوله في 2009 وطول فترة الاستفتاء كان الاختيارين دول هما اللي علي قمة المنافسة وكل يوم كان واحد نسبته تعلي عن التاني بفرق بسيط وكانوا في اغلب الاوقات متساويين لكن مع قرب نهاية الاستفتاء واذاعة مؤتمر توقيع عمرو لروتانا وتصريحه ان الالبوم هيكون في ديسمبر 2008 زادت نسبة احتمال نزوله في 2008 وتوقف تقريبا التصويت لعام 2009.

بنسبة ضعيفة واحتمالها الفعلي ما يزيدش عن نسبتها في الاستفتاء اللي وصلت 7% كان توقع البعض ان الالبوم هيتأخر اكتر من كده كمان!

الملك عبد الله ينفي التطبيع مع اسرائيل في مهرجان الاردن

بخصوص الموضوع المثار اليومين دول عن "مهرجان الاردن" ووجود تطبيع مع اسرائيل وعزم الفنان عمرو دياب مقاطعة المهرجان في حالة ثبوت ذلك..الملك "عبد الله الثاني" ملك الاردن نفي وجود اي نوع من التطبيع مع اسرائيل في تنظيم مهرجان الاردن من خلال حواره مع وكالة الانباء الاردنية (بترا) وتفاصيل الحوار الخاص بالمهرجان كالتالي نقلا عن الوكالة:

هناك موضوع ساخن آخر يتناقله الناس في ارجاء المدينة، وهو موضوع مهرجان الاردن وأن شركة تسمى "ببليسيز" تقوم بتنظيمه، والبعض يقول أن تلك الشركة لديها علاقات وثيقة مع اسرائيل، وقد نفت وزيرة السياحة والاثار ذلك، والكثيرون ما يزالون ينادون بمقاطعة المهرجان، ومن الاهمية بمكان أن نسمع من جلالتكم مباشرة لنعرف ماهية الحقيقة؟

لقد بحثت هذا الموضوع في الفترة الأخيرة مع رئيس الوزراء.
وعلمت إن شركة ببليسيز ليست هي الشركة التي تنظم مهرجان الأردن، ومن يقوم بالتنظيم هي شركة فرنسية تدعى / ايه فيزيتور دوسوار/ .

واليوم يفكر الفنانون العرب في إلغاء حفلاتهم والسياح العرب الذين كانوا يخططون لزيارة الأردن يقومون بإلغاء حجوزاتهم، والحكومة الآن تضيع وقتها ومواردها الثمينين في محاولة لحصر الأضرار، وكل هذا لأن بعض من يسمون أنفسهم صحفيين مهملين وغير كفؤين للقيام بواجبهم الأساسي قاموا بالافتراء وهو أمر معيب.

إن هذا يشكل اكبر مثال في كيف يتسبب الإنسان في إيذاء نفسه، وفي كيفية التخلي عن المسؤولية والتصرف بدون مسؤولية، وفي كيفية التسبب بضرر كبير لبلده وشعبه، وفي كيفية إيقاف مسيرة التنمية.

وفي الواقع وللأسف الشديد يبدو لي أن أسوأ أعداءنا يقيمون بين ظهرانينا، فهل سيكون مستقبل الأردن رهينة للإشاعات والثرثرة، وهل ستكون المعلومة الكاذبة مرجعية صحافتنا الأردنية، وهل سنصمت حتى تصبح الحقيقة ضحية الصحافة غير المسؤولة.

لنفترض للحظة واحدة، أن ببلسيز فعلا تساعد في تنظيم الحدث، وفي واقع الأمر فإنني لا أعرف شركة عالمية كبيرة لا تتعامل مع إسرائيل، وإذا كانت جميع هذه الشركات محرم علينا التعامل معها فلا شك اننا سنواجه مشكلات كبيرة.

فعلى سبيل المثال، إن شركة "إنتيل" التي تستعمل الرقائق التي تصنعها في 80% من أجهزة الكمبيوتر في أرجاء العالم، لديها استثمارات ببلايين الدولارات في إسرائيل، واقرب منافس لها وهي شركة "إيه أم دي" لديها أيضا استمثارات كبيرة جدا في إسرائيل، هل هذا يعني أن علينا أن نلقي بأجهزة الكمبيوتر بعيدا ونتوقف عن استعمالها؟ هذا هراء، وإذا ما اتبعنا هذا النمط من التفكير فسنكون قد أدينا أكبر خدمة لإسرائيل، وكل ما عليها هو أن تستعمل أفضل تكنولوجيا وأفضل المواهب في العالم كي تصبح اتوماتيكيا محرمة علينا.

ولكن البعض يقولون إننا لا نحتاج إلى شركة عالمية لمساعدتنا في تنظيم مهرجان الأردن، وكان علينا اللجوء إلى شركة اردنية؟

ربما كانت هناك شركة اردنية يمكنها القيام بالمهمة، أنا لا أعرف التفاصيل، إلا أنني على مدى حياتي تبينت شيئا وهو أن أذكى الناس الذين القاهم هم أولئك الذين يعترفون بسهولة أنهم لا يعرفون شيئا ما، ومن ثم يعملون بجد للحصول على المعرفة، أما الذين يقعون في المشاكل باستمرار فهم أولئك الذين يدعون أنهم يعرفون كل شيء، أنا أؤمن حقا أن مواردنا البشرية هي أعظم ما نملك، وبنفس الدرجة أؤمن أكثر من أي وقت مضى في التاريخ، بأن نجاح المؤسسات والشركات والدول يقوم على قدرتها على جذب المواهب وإطلاق طاقاتها مهما كان المصدر الذي تأتي منه، إن انتقال المعرفة أمر حيوي أساسي في هذا البلد في هذا اليوم والعصر، ونحمد الله على ان ثروتنا من المواهب المحلية توفر أرضا خصبة كي تتجذر هذه المعرفة وتنمو، مما يعزز في نهاية المطاف من قدرتنا على المنافسة لا على المستوى الإقليمي فحسب ولكن على المستوى العالمي أيضا .

إننا لا ندعي في الأردن أننا نعرف كيف نقوم بكل شيء على أحسن وجه، ومثلنا مثل جميع البلدان في أنحاء العالم، نرى من المفيد أحيانا أن نلجأ إلى الخبراء العالميين للاستفادة منهم ومن خبراتهم.

لقد تساءل البعض عن المنطق في الغاء مهرجان جرش واستبداله بمهرجان الأردن؟

مرة ثانية عليك أن تسأل وزير السياحة والآثار ووزير الثقافة حول التفاصيل، وبقدر ما أعلم فإن مهرجان جرش كان يتراجع على مدى السنين، مع ان الحكومة لم تتردد في تقديم الدعم له، وأنا شخصيا قدمت دعما ماليا للمهرجان، على مدى السنوات القليلة الماضية، وهناك أسباب عديدة لتراجع هذا المهرجان، بعضها إداري وبعضها تنافسي، وبخلاف ما جرى في الماضي، أصبح على مهرجان جرش اليوم، أن يتنافس مع مهرجانات ذات سوية عالية في العالم العربي، وبعد سنوات من التراجع البطيء كان على الحكومة في العام الماضي، أن تعطي إدارة مهرجان جرش، إلى شركة محلية، في محاولة لبث الروح في المهرجان، وكان الأمر اخفاقا ذريعا إلى درجة أن العديد من الفنانين المشاركين في المهرجان رفضوا الالتزام في المشاركة فيه في السنة التالية، وواضح أن الوقت قد حان لإتخاذ إجراءات جذرية، وكان هناك توافق بين عدد كبير من المعنيين ومن أبرزهم أعضاء لجنة مهرجان جرش، أن الوقت قد حان للتطوير ومن أجل حرصها على المصلحة العامة، أرسلت جلالة الملكة نور نفسها، رسالة لي حول موضوع الحاجة إلى التطوير، وعندها خرجت الحكومة بمفهوم إقامة حدث يجذب السياح سواء أكانوا زوارا لعمان أو جرش، على أمل أن ينتشر إذا ما قيض له النجاح إلى أجزاء أخرى من البلاد، ومن أجل التقليل من مخاوف الفنانين بعد ما حدث من مشاكل وأداء سيء في العام الماضي، قاموا بالتعاقد مع شركة أجنبية لها خبرة في تنظيم الأحداث والمهرجانات، وهي / لي فيزيتور دو سوار/ .

الهضبة مع روتانا بشروطه

بعد سلسلة من التصريحات الروتانية (الروتينية) اللي ظن مسئولوا روتانا انها هتجيب نتيجة مع عمرو وهيجدد بشروطهم بعد فشل مفاوضات الشركة اول مرة بعد انتهاء عقد عمرو مباشرة وقاد المفاوضات سالم الهندي وسمع شروط الهضبة للتجديد واللي شاف انها مبالغ فيها وطرح علي عمرو العقد اللي هتقدمه الشركة ليه وفي النهاية فشلت المفاوضات وكل واحد رفض شروط التاني..

بعدها صرح الهندي ان الشركة قدمت لعمرو عقد كويس يناسب حالة السوق دلوقتي وفي نفس الوقت مايتعداش سقف التعاقدات اللي حطاه روتانا للتوقيع مع المطربين وكل المطربين في الشركة بتعامل معاملة واحدة..وبالتصريح ده اثبت سالم الهندي انه فعلا (هندي) خصوصا انهم عارفين كويس مين هو عمرو دياب وايه حجم مبيعات البوماته والمبالغ اللي بتقبضها من وضع لوجو الشركات علي غلافه كدعاية (زي لوجو شركة بيبسي) وغير اعلانات الرنات واعلانات فودافون..بالاضافة للقيمة المعنوية لوجود عمرو في الشركة اللي كفيلة انها تجعلها الشركة الاولي في الوطن العربي.

بعد انتهاء المفاوضات الروتانية (الهندية) بحوالي 6 شهور ويأس روتانا من قبول عمرو للعرض بتاعهم وخوفهم من توقيعه لشركة تانية وخطورة ده علي شركتهم طلب الوليد بن طلال رئيس الشركة من الهضبة انهم يتقابلوا ويتكلموا من جديد عشان تبقي مفاوضات علي مستوي الكبار..وعرض عمرو طلباته ووافق عليها الوليد عشان يثبت انه فعلا رجل اعمال ذكي ومش هندي!

عقد عمرو مع روتانا يعتبر اقل العقود في الشركة من حيث الشروط الاحتكارية..ويعتبر اعلي عقد في الوطن العربي وهيسبب احباط لكتير من كارهي نجاح عمرو دياب واصحاب اسطوانة انها راحت عليها او سنه كبر.

كثرة المنافسين اثبتت انه بلا منافس

عشان هو المطرب الاول في العالم العربي فديما الغالبية بيحب يرسم صورة وهمية من المنافسة معاه إما للتواجد او لارضاء الغرور او نوع من الحقد عليه او البحث عن الشهرة السريعة والتواجد في الاضواء او للتمتع برؤية اسمهم جنب اسمه عشان كده عمرو دياب كان ديما في كل قطر وبلد هو المنافس الاول والاوحد لمطربيها حتي لو كانت منافسة وهمية.

المنافسة بدأت من اواخر التمنينات وكانت بعد نزول اغنية ميال لعمرو ولولاكي لعلي حميدة..فحصلت مقارنة بينهم وتوقع الكل للاتنين النجومية والصحف الليبية وقتها كانت شايفة ان عمرو دياب هيكون هو المنافس الاقوي لعلي حميدة علي الساحة..ده قبل ما يختفي منها اصلا وبعد ما ميال اختيرت من افضل 50 اغنية في العالم.

في فترة التسعينات وبعد اختفاء علي حميدة وصعود نجم محمد فؤاد الصحف المصرية كانت بتكتب عن فؤاد انه اقوي منافس لعمرو والاتنين بيتنافسوا علي زعامة الساحة العربية وكانت بينهم منافسة قوية جدا مش بس علي الالبومات والجواير والمبيعات كمان كانت في السينما خصوصا ان فترة اوائل التسعينات كانت هي فترة تواجد عمرو في السينما والفترة اللي شهدت افلامه..في نفس الفترة ونفس الزمان كانت الصحف اللبنانية شايفة ان مطربها راغب علامة هو المنافس الاول لدياب علي الساحة الفنية وعلي زعامة الاغنية العربية..وفي سوريا كان الكل بيبص لدياب انه منافس جورج وسوف..ورغم وجهات النظر العربية المختلفة في منافسين عمرو كانت الصحف المصرية لسا بتكتب عن المنافسة مع محمد فؤاد ومين فيهم أحسن!!!

بعد انتهاء فترة التسعينات ودخول الالفية الجديدة وظهور اجيال جديدة بدأ الاعلام المصري يكتب عن تامر حسني وعن المنافسة المشتعلة بينه وبين عمرو والحرب بينهم ومين فيهم أفضل!!!والاعلام اللبناني برده ماسكتش وبدأ يكتب عن المنافسة بين عمرو وبين وائل كافوري وتجسدت المنافسة بشدة وقت الميوزك اورد 2007 وكان مرشح ليها وائل وعمرو وفضل الاعلام اللبناني يلمع في وائل واحقيته بالجايزة اللي نزل البومه قبلها باسبوع واحد وعن مبيعاته الكبيرة وان البومه بيحن افضل من البوم الليلادي لعمرو دياب لحد ماكسب عمرو الاورد وزاد الهجوم علي عمرو وقالت الصحف اللبنانية وقتها انه اشتراها وحرم نجمهم العملاق وائل كافوري من الجايزة..اما سوريا كانت في قمة سعادتها لما اغنية من اغاني ساموزين نزلت في البوم فريق بودا بار العالمي عشان يبقي تاني مطرب عربي بعد عمرو دياب يحصل معاه كده..وبدأ التلميع في ساموزين عشان يكون ممثل سوريا في منافسة عمرو!!!

كل بلد عندها منافس لعمرو والصحف المصرية لسا بتتكلم عن مين احسن عمرو ولا تامر ولا فؤاد ولا حتي حماقي..كل المنافسين دول ولسا فاكرين عمرو ليه منافس!!!

 

مفاجأة عمرو مصطفي

مع قرب موعد صدور البوم عمرو مصطفي بدأ الاعلان عن وجود مفاجأة في الالبوم تخص الفنان عمرو دياب واصبح جمهور عمرو دياب في حالة شوق وانتظار للالبوم او بمعني اصح وادق للمفاجأة..فهل تكون المفاجأة اغنية من اغاني دياب بصوت عمرو مصطفي..ولا كلمة او اهداء للهضبة علي كافر الالبوم..ولا اغنية بيغنيها لعمرو.
ولا يمكن تكون مجرد دعاية للالبوم عشان يكسب اكبر شريحة جماهيرية او لجذب نظر الاعلام ليه!

الاجابه هتبان يوم 16/6 موعد صدور الالبوم الرسمي لحد اللحظة دي..ده اذا ماتسربش!

الجمهور قال كلمته

علي عكس الوضع في الصحف والهجوم اللي اتعرضله الهضبة من بعض النقاد والزملاء في الوسط الفني عشان هيصور برنامج عن مشواره الفني..جه رد الجماهير واعلن عن رغبته في مشاهدة البرنامج وتأييده ليه باكتساح والجمهور ديما هو المراية اللي عمرو بيشوف فيها خطواته وبيتحرك علي اساسها مش رأي النقاد لأنه طول مشواره الفني اثبت انه ديما هو اللي صح وكل النقاد كانوا غلط من اول ما قالوا انه موضة وهتنتهي لحد مافات علي الموضه دي 25 سنة وقرر يسجلها في برنامج وكل موضة وهما بالصحة والسلامة.

78% صوتوا بنعم لتأييد قرار عمرو لتصوير برنامج قصة حياته..13% شافوا انها مش وقتها لكن علي اي حال ماعارضوش الفكرة وان كان يبقي السؤال ان ماكنش بعد ربع قرن غناء هتبقي امتي؟!
7% رفضوا البرنامج واكيد ليهم وجهة نظر..لو كنت منهم ابعت وقول وجهة نظرك علي الايميل.